رباعيات راجح المصرى

[الشاعرمحمدأسامةالبهائي]

1
رباعيات
الشاعر المصرى
إبراهيم راجح


حيرة


( ألف ) و ( بــاء) كان
أول درس بالطباشير
أيــام ما كنــا صغيـرين
يـــادوب تبـاشير
مرت عليـــنا ســنين
وبرغم تـعليـمنا
وجـودنــا فيـه أسـئلة
محيرانا كتيـر
****
2
ليـــه لمـّـا أدوق ســـكر
بـافتكر به الملح؟
واحـس إن الـكلام
تمللي محتـاج شرح؟
وفي الصغيـرة والكبيـرة
بحتار قوي وبتوه
أطرح بــدال الجمع
واجمع بدال الطرح
****
3
يا ميّة م الأرض طالعة
ولاّ نـازلة من السـحاب؟
طول عمري افكر فيكي
ولسه ما وصلت لجـواب
قالتـــلي لــو قلت لك
الحيرة فيـك هتزيد
أنــا دمعة المـظلوم
من أقرب الأحبـــاب
****

4
ستيـن سنـة عمــرك
وشعر راســك شــاب
و لســــه ما فهمتـــش ؟
دي الحيــاه كُتـّـاب
لو ترضى باللي اتقسم
هتعيش أكيد مرتاح
كرهــت انا جهلــك
وماليــك عليـّـا عتــاب
****
5
مشيت فى كل السكك
تايه منيش عارف
قريت قلوب الناس
من يومها أنا خايف
فيه ناس قالولى يمين
وناس قالولى شمال
وقفت فى المنتصف
أبص مش شايف
****

6
سـألت مرة البـحر
ــ : ليـه ميتك مالحة؟
قال : وانت ليه كلمتـك
عن العباد جارحة؟
أنا قلت : فعلاً دا فيه
حاجات كتير تنصلح
لـو ابن آدم في يوم
حط ف عنـيه ملحة
****

7
إرسم براحتك سكتك
إرسم بكيفك
حدد ربيعك والخريف
وشتاك وصيفك
وفى النهاية
هتلقى رسمك ينشطب
وتمد إيد ع الجراب
ماهتلقى غير سيفك
****

8
لبستى توب الفرح
وركبتى ضهر الخيل
وعريسك اللى اتخدع
مابقاش يحب الليل
عشان فى يوم دخلته
لقى غيرك فى سريره
ولقاكى بتحميه
وتنجّسى به النيل
****

9
جريت عشان ألحق
قالولى قطرك فات
مشيت على القضبان
أعد فى محطات
لاوصلت لمحطتى
ولاعرفت أرجع
كل اللى سافر رجع
إشمعنى أنا بالذات
****

10
يـاطالع النـخلة
خدني معــاك يــــاذوق
مشتاق أدوق البلح
وتعبت أنا م الشوق
طالت عليا السنين
تحت النخيل عاجز
علمنى أبوس أيدك
إزاى أنا أطلع فوق
****

11
نحـات نحت تمثــال
كبيـر من الصوان
راجل طويـل وعريض
غريب مالوش أوطان
ســألته يـطلع ميـن
الأخ دا وقـــــاللي:
دنا كنت ناوي اسألك
كان قصده إيه الفنان؟
****


12
نفـس الشـبه والملامح
نفـس لون العين
دي بنت ويـّــا امـها
ولاّ دول أختين ؟
دا كان ســؤال النـاس
أمـا انـا سـؤالي
يكونش جاني الحَوَل
والواحدة اشوفها اتنين ؟
****

13
يا عود خشب مغروس
في الأرض شـكله غريب
آه لـو تــدوق الميّـــة
هاترعرع وتبقى عجيب
هتـقوللي إيــه سر الحيـــاة؟
هقول اسكت
أصل السـؤال دا
الجواب عليه حقيقي صعيب
****


14
تعبان قوى وهمدان
مهدود ياولداه
لقيت حصير مفروش
صليت له جل علاه
ودعيت ونا فى حضرته
ربى استجاب ليا
ومشيت ونا حاسس
إنى أقوى خلق الله****