اتكلم

======

اتكلّم يا ابنى
وما تخافشى
عين الجبان
ما تنامشي
وان نامت
تصحّى مفزوعة
وراحة البال
ما تطولشى
وتعيش حياتها
كدا مخدوعة
وعنيها تايهه
وما تشوفشى
وان شافت
ما تلقى إلا كابوس
وجوه قلوبهم
لسه مضلّم
!!!!!!!!!!


اتكــــــــــــــــــلّم

اتكلم وليه
ها تخنق شكوتك
وتحبس دمعك
وتنشف جواك
ضحكتك
اتنفس . اغضب
اتضايق
مخالب الخوف جواك
خنقتك
البدله الحمره
لسه لابسها
باشارتهم تتحدد
ساعة حضرتك
وتروح يا حبيبى
كدا.... فطيس
طول ما انت
دايماً كده ..مسلّم

!!!!!!!!!!!!


اتكــــــــــــــــــلّم

اتكلم ولاّ انت
عاجبك زُلك
وطنك بيتسرق
دمك بيتحرق
ولسه محتاج
حد يدلك
وياخدك من ايدك
ويقول لك
شبابك شاخ
فى انتظارهم
وتصدق وعود
اللى قال لك
وتستنى عايش
فى الأوهام
ولقوت ولادك
تفضل تلملّم
!!!!!!!!


اتكــــــــــــــــــلّم


اتكلم
يمكن تلقى أحباب
أصحاب يمكن
نفس التراب
والصوت يبقى اتنين
تلاته
تعلى .. وتكتر
تشق الضباب
وبداية القصه
بالحق ... كلمه
فتحت عنيهم ..
ع السراب
يا ناس إحنا بنحلم
ولاّ .....
فاق الدراويش
ونطق المعلّم
!!!!!!!!!!!!


اتكــــــــــــــــــلّم

اتكلم
وما تورثى خوفك
تاريخك ها يلعنك
وينكر ظروفك
والكل هنا عايز
يسمعك
وبكلمتك هاتبنى
كل صفوفك
ومافيش حد ها يقدر
يمنعك
دا كلمتك هيّ
بداية وقوفك
وما تقلقش من حد مره
شافك
دا الكل زيك
ساكت بيتألّم
!!!!!!!!!!!

اتكلــــــــــــــــــم