ملياردير
يانفس ليه الجزع
يا قلب ليه مكروب
عايش ف رعب وفزع
خايف من المكتوب
وبقيت بتضرب ودع
وتتوه فى وسط دروب
خايف على عيالك؟؟
حيعمل ايه الخوف
قلقان على مالك؟؟
حتعيش حزين ملهوف
وادى القلق جالك
من شئ ماهوش معروف
لابس هدوم ناعمه
وحاسس بشوك فيها
مش شايف النعمه
طب ايه مخبيها؟؟
والقلب لو يعمى
مافي عين تشوف بيها
خايف تجيك عله
و الخوف بقى مرضك
قلقان من الذله
والمال بقى غرضك
بعدك عن المله
خلى القلق قرضك
اديك جمعت المال
قوللى عمل لك ايه؟؟
ذليت رقابى رجال
وعملت باشا وبيه
ودخلت فى موال
مانتاش قادر تنهيه
شايف عجوز وفقير
شغال كمان عندك
قاعد ف كشك غفير
لكن سعيد عنك
نومه لذيذ بشخير
وانت النعاس عاندك
لو يوم يجيلو صداع
ديتها برشامه
وانت عايش ف صراع
والفكر دوامه
والنوم لجفنه انصاع
وانت ف سهاد يامه
لو تنشرى بفلوس
الراحه لأبتاعها
لو تنزرع بالفوس
كنت اقدر ازرعها
ومين حيهدى نفوس
غير اللى ابدعها
دكتور
عادل عيد
