شكرا للحيطان

الشكر كل الشكر للحيطان
اللى بتدارى الفقير والغلبان
ورا الحيطان
فى فقير جعان
فى مشاكل عند الإنسان
وراها فى غنى بيأكل كلبه
والفقير من الجوع بيوجع قلبه
وفى وراها ناس نايمين
مش هاممهم
لا أكل ولا عيال ولا بنى آدمين
بس فيه بشر لازم تتشال عنها الحيطان
زى يا ناس الفقير والغلبان
عشان يعرف قد إيه فى نعمة كل إنسان
عشان يعرف اللى زعلان
إن معهوش غير عشرة جنيه
إن فى غيره مش لاقى ربع جنيه
عشان يعرف إللى نايم مستريح
إن فيه غيره عارف إن بكره مش هيريح
فكر فى حالك وشوفه مع الناس التانيين
هتعرف إن إنتا أحسن البنى آدمين