نبـــــــــــــــــــــــــــــــــــويه
نبـــــــــــــــــويه
شعر : محمد عبد القوى حسن
----------------------
تسهر وتبات ع اللمبه الفلاحى
وتقوم م الفجر تقول ياكفاحى
قصة ايامها عجيبه
وقصه احلامها غريبه
طول العمر تناجى الحظ
والحظ تملى عنيد
لا ف مره طاوعها ولا كان ف الايد
كات اجدع بنت فى كفر المساعيد
وجمال فياض من رب الكون
ولكنه مصون
والفقر ماكانش بعيد
كان لازق جنب الحيط
وبرغم داكله زواجها
كان من استاذ
مش فلاح كالعاده فى الريف
فرحت بيه
ولكن ماكانتش بتعرف
ايه متخبى ف الايام
كانت تانى بنات الشيخ امام
من اربعه بناويت
مالهمش اخ يعولهم
بعد وفاه الشيخ
قول وتمر الايام ياكرام
وتخلف نبويه ست عيال
ولدين.. واربع بنات
وف ليلة عرس البنت الاولى
تموت البنت بطلقه طيش
والحزن يفصل على كيفه
اتواب فى البيت
وتعدى الذكره
ويحط القدر المحزون
على راس نبويه
يتجوز جوزها الاستاذ فوقيها
مع انها لم تعصيه يوم
مع انها كانت بتاكلها بدقه
مش زى مابيقولوا فى الامثال
لا .. دى الدقه ام بحق حقيق
وكان الاستاذ عنده قيراطين طين
كانت زارعاهم
لجل توكل بدراعها اولادها
والاستاذ كان هايم ف ملزاته
لا سائل فى اولاده ولا بناته
كانت تجمعهم فى الظنقور
فى المقعد وتصبرهم
ياولاد انا.. صابره عشانكم
ياولاد .. كله يهون
بس تعيشوا
وافرح بيكوا
واشيل اولادكوا على اللحم
انا ميت واحد يتمنانى
لكن ما اقدرش ابيعكم
وصاحبنا الاستاذ ريحة الطبخ
تفج من عقب الباب
والمش بيهرى اكباد اولاده ولا سائل
وتدور الايام
يكبر لستاذ
تكبر نبويه
يكبروا الاولاد
حتى مرات الاستاذ التانيه
هيه كمان تكبر
وتطرد لستاذ م البيت
بعد ماصابه الامراض
كانت نبويه المسكينه
كمان مرضت
وراحو اولادها
لحد البيت ابو الطوب الاحمر
يسالوا عن ابوهم
قالت مرات الاستاذ ابوكوا مسافر
والراجل جوه وسامع
قول ماحدش كان سال بمرض نبويه
لكن والحمد لله كانت مستوره معاها
ولدها الوسطانى رزقه ربنا بشغلانه
ضيع كل فلوسه على امه
وحاول يفرش تحتيها نجيلة الايام
وحاول يقطف من بز الشمس ويديها
وحاول يروى من دمه كلاويها
وحاول يشطف قلب امه بحنانه
والعم الاستاذ مش دريان
ولا عاطى بال باللى بيحصل
قول دارت ليام
مرض الاستاذ
والست بتاعته
ما استحملتوش
طردته م البيت ابو الطوب لحمر
هايروح فين
مش قادر يرجع البيت القديم
كان دايما مع نبويه لئيم
لكن نبويه اصيله
بمجرد بس ما سمحت
لو كانت تقدر تطلع تجرى
كانت جريت
لكن اتعكزت على البنت
دلال بنت ابنها
وقالتلها فين سيدك يادلال
قالتلها تحت الشجرايه
بتاع عبد العال
قاعد حزنان مرضان
راحت له نبويه
وبعين مرضيه
طلت له بلهفه
وقالتله ماانساش انك راجلى
وابو عيالى
تعالى
وراحت واخداه ع البيت
وكانت بتطلعها من بقها
وتحطها فى فمه
لحد ماماتت
ماتت قبليه
ماتت قبل ماتغنى الايام ف عنيها
دبلت كلاويها
واتضخم قلبها وعنيها اتهدت
وفشلت كل محاولات اولادها
يعالجوها
ماتت قبل ماتلحق
قطر الافراح ف البيت
قبل ماتخضر زرعة بسمات العيد
قبل ماتفقس فروجة الاناشيد
ماتت
ماقالتش وهيه بتطلع ف الروح
حجولى ياولاد
ماقالتش ادعولى
ماقالتش اتصدقوا على روحى
لكن قالت
خدوا بالكوا من ابوكوا ياولاد
اوعه تحاسبوه او تهينوه
ماقالتش غير بس انتو
فى عنيكوا ياولاد حطوه
رد: نبـــــــــــــــــــــــــــــــــــويه
الأخ المبدع محمد عبدالقوي حسن:
لك أصفى تحية و أعمق تقدير على هذا النص الجميل: سيولة تعبيرية هائلة, و معان إنسانية أصيلة,
و مسحة رومانسية دافئة, و لغة واضحة تتيح سهولة التلقي..
ذكرتني بنص الراحل نجيب سرور:(بهية) أستسمحك في نقل جزء منه:
مالنا نعشق فينوس و مافينوس أحلى من بهية,,
فهي بدءاً أجنبية
ثم من غير ذراعين فما تصنع شيئا
أما هذه
من رآها و هي تطبخ؟
من رآها و هي تعجن؟
من رآها و هي تشدو مثلَ بلبل؟......
تحياتي أخي محمد.
رد: نبـــــــــــــــــــــــــــــــــــويه
جميل ما رأيت هنا
همسة:
لو تفضلت بتشكيل القصيدة يكون أسهل للقراء
دمت بخير يا غالي