رباعيات زمان الكورونا ...... سمير الأمير
منهم كما مننا المُرة والمزة والمُر والأمّور
زى القماش فيه حرير وفيه البفته والدمًور
ياللى نويت ع السلامة ،حاذر تجرب ألامى
"م الآخر اسمع كلامى "الصنف كله يغور"
أول ما تعطس تبوسك عشان تجيبلك كورونا
ستين سنه كنتوا فين ؟ ده انتو نشفتونا
خدنا خلاص ع العطش ، عجبنا طعم المرار
3
طبيعى تيجى الكورونا للعالم المختل
تجار بتنهب شعوب ف حماية المحتل
و ناس بتقتل ناس ع الكفر أو ع الدين
لازم يموت ملاين؟ عشان نفكر ف حل؟
كورونا مين يا غجر ده رأس مالكم أمّر
شردتوا بيه الشعوب ،حروب وكر وفر
عايزن كورونا بضمير بينصر الانسان
يرجع يعيشها بأمان ، بعد انهزام الشر
فيه فيروسات واضحة جدا حتى للعميان
القهر و الفقر، والجهل والجهر بالعصيان
امتى بقى راح تهمدوا يا مطلعين عين أبونا
إيه تانى بعد "الكورونا"، يأدب الإنسان؟
يا كورونا حس ، وخلى عندك ضمير
إيه اللى ريحك حتاخده من بلاط الفقير
جسمه اللى ندره الزمان للغلب والتريقه
ولا جمال بسمته ف الشقا و الهجير؟
حبة قرود كدابين بيقرّعوا على بعض
يتنططوا ف الهوا ويتشقلبوا على الأرض
مالى ومال فرحهم وانا قرد إنسانى
منعتنى أحزانى ، إنى اشترك ف العرض
آه لو كورونا " مناضل" ضد راس المال
يجيب حقوق الغلابة وينصف العمال
تبقى بلاد واحدة ، و كل البشر شركاء
ودنيا من غير غباء ولا بلطجة واحتلال !!
آه لو " كورونا" مناضل بس " مِطوّع"
عمره ما يتموّل لو اتعرى أو اتجوّع !!
