ترنيمة للصباح.. للشاعر إبراهيم هلال العساسي

ترنيمه للصباح

بتزقزقي يا طيور
وصباحنا كله سرور
إحساس بهمس النِّدا
وعبير ورود وزهور
للفجر لما بدا
غنّى وشدا عصفور
شجانا باللحن ده
معنى ونغم وحضور
قال: يوم جديد ابتدى
ولكل واحد دور
والبركه فى اللى سبق
ولحق بداية النور
****** ****** ******
للنور يا عصفور
على نغمك تصحيني
قدام جمايلك أنا
جايلك على عيني
أمشي وخيوط النَّدى
فى عروقي ترويني
نسمة هوا الصبح
ترضيني وتحييني
خلتني سابق ولا
لاحق يعديني
والسعي للرزق عندي
من فروض ديني
خليني يا رب نافع
للعباد وصبور
دا يوم جديد ابتدا
ولكل واحد دور
والبركه فى اللى سبق
ولحق بداية النور

إبراهيم هلال العساسي