فين الرحمه ياخلق الله ..؟؟؟ ضياء الدين البري

السلام عليكم .. مجرد رأي
كلام من قلبي
...
فين الرحمه ياخلق اللـــه ..؟؟؟
.....
شجرة زيتون
فاقده خضارها
يابسه فروعها
واتفرّقوا باقي الأغصان
فجأه لقيتها
طالعه وحيده فْ ناحية جاري
واقفه شريده فْ وسط جداري
والدنيا بتسمعها تنادي
شيفاها بتمد أيادي
وتـْزعّـق بعلوْ الصوت
ليه يا سْيادي ..؟
شايفنّي وسايبنّـي أعاني
ولا سألين ..
وقلوبنا بيسكنها أنين
ليه ناسْينّـي ..؟
عايزنـّي اركب قطر الموت ..؟
زي اخواتي ..؟
كل الناس شايفينها اتْـهاتي
بتـْصرّخ
وعتابها في القلب يـْجرّح
سكاكينها ، بتقطـّع فيّا
وأنينها ، بينادي أهاتي
ودموعها ، بتشعلل ناري
ليه سبتوني وحيده ياهوووه.؟
فين الرحمه ياخلق الله..؟
ليه الأقصي هناك سبتوه..؟
جوّا السجن يعيش مأساه
لما سمعت نداها جريت..
واتأملت ، فجأه لقيت
جت في عنيّا ، صوره عارفها
شوفت حبيبتي
هيّا بعينها
سر النبض الساري فْ قلبي
ومش هانساها
مهما يكون
مهما الدنيا لعبت بيّا
مهما الغوله ، طالت مني
مهما حاربني ، إنـْس وجنـّي
لأن انا عمري ، موهوب ليها
وقلبي ودمي ، راح يفديها
مرّه قالت لي ..
عشان تعذرني ، إسمع منـّي
لمّا لقيت الغوله مـُصِرّه
تقضي عليّـا جرّه فْ جرّه
هربـْت وجيت ..
قولت أكيد ممكن تحموني
واللي فاضللي
نبضه وحيده
هيّا الباقيه
وعايشعه فْ جدري
وجايّـه السوسه
ناويه تخللي الروح تعاديه
متوصيّه تقضي عليـه
جايبه اخواتها ، تـنـْخـُرْ فيـه
وبغباوتها
جايّه وناويه تمحي الصوره
وكلاب الغوله المسعوره ..
إتربت علي نحت فروعي
بتمزّع وبتاكل فيّـا
وبتنهش دايما في ضْـلوعي
خايفه لتطرح نبت جديد
يمد اْديـه
يرجع أملي التايه مني
ويْـواسي الدمع المحبوس
ويقدم لي
بواقي الميـّه
وييجي اليوم واقدر ينجدني
ويرجّع نـُصّي المقصوص
تزرّع فيّـا الروح من تاني
تهرب مني ، جروح زنـّانه
يطرح قلبي ، نبض جدودي
وينادي نبضاتي التايهه
المنسيّـه فْ قلب حدودي
أتجدد ..
وأكبّـر زرعي فْ أحضاني
تخـْضَرْ غيطاني
وتـْرجّع نبتات الخلد
وتْخضّر أوراقي الخايبه
الناشفه من مدّه وخايفه
الصابره علي ريقها المُـر
النايمه في قبور أنّـانه
ممدوده زي الأموات
وكل ما أملك..
هوّا الصبر..
وقْـلوب بيّا كتير مشغوله ..
شايله همومي ، حاسّـه بحالي
دعواتها دايما جيّالي
أرواحها بتـْقوّي صمودي
ونـْفوس غيرها
كتير نـَسْياني
قايمه ونايمه تزيد حرماني
دايما تبعد
كتير بتهدد
تمحي كياني
والدنيا سكناها بجد
بتخرّب فيها الهفوات
نسّـتها إيه معني المجد
نزعت منها أي صفات
نسيوا الإسم ، وفين عنواني
وكإني في الدنيا بليّـه
رامينّـي للغوله ضحيّـه
سايبنها بتخرّب فينا
بتدّهوس في قلوبنا بْحُـرقه
بتبعزق أوصالنا وسارقه
أي دليل يمكن يدّينا
حق العوده فْ يوم لولادي
أي تاريخ يمكن يحمينا
يثبت إن القدس بلادي
وبـْتسقينا المر كاسات
والغربان عمـّاله تمـوّت
في العصافير الباقية تزقزق
بتواسي القدس المدبوح
والغوله مش ساءله فْ حد
بتقطـّع في جسدنا الطاهر
وحمامه ماسكه الأغصان
بتسبّح باسم الحنان
واللي جسدها ، كله جروح
بالدمع الساكن في عنيها
بتنادي الأقصي المجروح
واللي مسيرها ..
تطير في الجنه ..
بعد ماتشكي لْرب كريم
من أمتنا القاسيه عليها
وسايبه الغوله تقسّم فينا
اللي يهاتي يقولوا هاتوه
وبْـأمر الغوله أكيد ينْـفوه
طب ساعدونا فْ شيل الهم
طول العمر نضحّـي بهمّه
وقت الجد يهون الدم
إمته يا أمـّه ، هاتقفي بذمّه
علشان حق ولاد العم
مصر تحاول ، تبني الوحده
تحيي مباديء ، طالها الردّه
حاولي يا أمّـه ، تساعدي ولادها
دول حافظين الغوله وعيبها
حرب اكتوبر تشهد لينا
شفتوا الغوله بتخاف منـّا
وقت الجد بنقْـطع ديلها
بكره الدنيا هاتنسي وجودها
نفسي يا أمّـه ، تكوني عفيّـه
إنتي فْ قلبي ، ونور في عنيّا
إحنا أخـدْنا إيه م الفرقه..؟
غير الصهد ونار الشِّـده
وانتي أمّـه ، بقالك مـُدّه
سايبه الغوله بتلبس توبنا
سرقت منا تاج العِـزّه
ساقه دلالها
وحاكمه حصارها
شوفتي فْ غزه ..؟
بتموّت أطفالنا بْـلذه
وبتعمل بدمامهم مـزّه
بالفسفور الأبيض قايده
بتشوي جلودنا
وزايده فْ نارها
وانتي يا أمّـه ناسيه وجودنا
سادّه ودانك
بصه الناحيه التانيه وشارده
وحاكمه ولادك
وساكته وبارده
سايبه الأرض الطاهره بتصرخ
طالبه النجده
ياللا يا أمـّه ..
فين الهِمّـه ..؟
لمّـي اللمّـه
وشدّي الشـدّه
قبل الروح ماتروح وتْـرخرخ
كل جذور الأمّـه تلخلخ
ويـْموت فينا ، مجد جدودنا
لمّـا بنوه ، حافظوا عليه
وحفروا حدودنا
جوّا قلوبنا
ورسموا الصوره جوّا عيونّـا
علشان نمحي مين يعاديه
عارفين يامّـه كل حقوقنا
وبرضه سايبه الغوله تْـلبّخ ..؟
ورايحه وجايّه
معاها الشله
عايزه تقرر مستقبلنا ..؟
خايفين منها
وبيساعدوها
بالأموال وأعز ماتملك
بالأسلحه وحمايه تصونها
وجوّا بلادهم ، برضه تعكعك
باين ماسكه عليهم ذِلـّه
ياتـْهم زَلّـه
بتمشّيهم بالفرقلّـه
وانتي يا أمّـه
ييجوا عليكي
ويمشوكي بكل مذلّـه
إيه العِـلّـه ..؟
داحنا اصحاب الدين والملّـه
وارجع اقولك
والله انا خايفه
لتكون ديـّـه
آخر ندهه
هيّا البرهه
ويْـضيع كللـك
أصل انا شايفه
نجوم الليل تعبت من همّك
هربت منّك
وشمس نهاري
من طول ليلك
نسْـيت شكلي
وملامحي التايهه فْ وديانك
سابتني فْ ناري
رسمت لي في عيوني الضلمه
ونـْهايه للسكـّـه العاميه
واللي تـْوَصّـل
لطريق الموت
تعبنا ياناس من كتر الْ آآآه
شبعنا مرار والعقل اهو تاه
فين الرحمه ياخلق اللــه ..؟
.........
أشكركم
وللجميع تحياتي