صرت مثل النوارس

أعرفك ماجنت قاسي
هلقسوة جبته منين

أنت لي كل الناس
وروحي وكلبي وضي العين

جني احبك مو من شهر
جنت احبك صار لي اسنين

شكد تحبني يالغالي
حبك بكلبي بكدهه مرتين

شلون أرضيك والهجر تنساه
والكه وجهك الزين

من همي أمشي وراك
ادورلك ومحتار بكل الدرابين

إسأل تقاطع عنتر
وزيونة وشارع فلسطين

مل الجدم مني و منهه مامليت
بس من المفارز و لوين

أسأل عني شرطة الاعظمية
عددهم الف لو ألفين

جم مرة حجزوني
وجم مرة سألوني منين

وآنه احلف الهم بالله
وكبل الله احلف بالحسين

وصرت مثل النوارس افتر
ومن اتعب انزل بين الامامين

بلكي الكه حبيب الروح
ويرحم الله بحالي هين

بلكي الكه حبيب الروح
ويرحم الله بحالي هين

الشاعر حامد الرعد