شايفاه في كل مكان
حساه بكل جوارحي
عاشقاه؟....
يااااااه من زمان
وملامحه ساكنه في ملامحي
وف يوم بتكلم عنه
سالوني الناس ايه شكله؟
قلت حقيقي مش فاكره
يمكن عمري ما قابلته
قالولي وبتقولي حبيبك؟؟
قلتلهم ايوه وحبــيــبــته
مش فاكره ابيض او اسمر
مش عارفه طويل ولا قصير
يمكن ادي ويمكن اكبر
ويمكن عمري ما قابلته
لكنه حبيبي وحبــيــبــته
قابلت كتير وعجبني كلامهم
لكن ابدا مش زي كلامه
وناس كتير تشتاق لسلامهم
ولا يوم اشتاق غير لسلامه
من ضعفي سمعت ملامهم
ايه يعني اما اضعف ادامه
-ادامه؟؟؟؟؟
-يبقي اكيد شافك
يمكن
يمكن شافني ويمكن شفته
ويمكن عمري ما قابلته
لكنه حبيبي وحبــيــبــته
لاموني الناس تاني وقالوا
-ازاي تستني العمر سراب؟
سراب ازاي دا انا عايشاله
ايه تسوي الدنيا من غير احباب
حبوا ولو من غير حبيب
وعالأحبه ما تلوموش
حبوا زيي الحب نفسه
حب صافي من غير رتوش
جايز اكون مش فاكره ملامحه
شفته ولا ما شفتهوش
جايز اكون معرفش حتي
ليه وجود او مالوش
اما هو ساكن في قلبي
وعمري ابدا ما انسهوش
شيماء النادي
المفضلات