صلى ع النبى ف قلبك
شعر \ سمير الأمير
****
يا عم صلى ع النبى ف قلبك
لا انت داخلى النار ولا حشيل ذنبك
ولا انت باليافطه حتهتنى
و تشلنى
مااعرفش اسير جمبك
عملتها من قبل، صدقتك وكنت معاك
فاكرك حبيب النبى والدنيا مش واخداك
اتاريك شيطان رأسمالى
و قبلتك سوقك
بتدارى سوءك بكدبك
وعاملى فيها ملاك
*****
الدين لوجه الله
وانت اللى وجهك لئيم
لما بتيجى معاك
تغرف ولا يهمك
لما بتيجى عليك
تحسبها بالمليم
زى الجدار هديته وبنيته
ماهوش يمك
زى الجدار بالميه وضيته
وعملت رحيم
***
ياعم صلى ع النبى ف قلبك
وزيده صلاه
هوه النبى مش نبى
غير ع الورق مكتوب؟

والدين صديق الحياه
نقراه بأفعالنا
والا الكتاب مقلوب؟

ياعم صلى بعيد
هوه احنا حنعيده
وترجعونا عبيد
للى الدينار سيده؟