"العريس"
ـــــ *** ــــ
ألف مبروك يا عريس
م النهاردة انت الرئيس
نام .. وأحلامك سعيدة
والبس البدلة الجديدة
واحلم ان الناس يا ريس
مبسوطين
ألف مبروك يا عريس
شعبنا اتعود جنابك
يبقا عايش ع الحديدة
وانت برنامجك
مفييييش
..
ألف مبروووووك يا عريس
بس خد بالك جنابك
دم شهداءنا اللي ماتو
مش رخيص
دم هالة أو رفيدة
دم رامي ولا مينا
دم بطرس أو محمد
كلهم غاليين علينا
وانت بتقول نور عنينا
يا عريس
حد يقتل نور عنيه ؟؟!
حد يستحمل يا بيه
حد يسرق حلم بكرة
والحياة هانت عليه؟؟!
يا جنابك
فاكر ان الشعب ساهي
لا جنابك
يا ما تحت كل ساهي
ألف داهية م الدواهي
وبكرة جاي
بكرة تعرف
يعني ايه كلمة حياة
بس صبرك
ممكن اسأل يا جنابك
يعني ايه كلمة وطن ؟
قلت حضن..
قلت حضن ورحت ساكت
زي عادتك
ايه يا ريس
احنا فين .. ولا احنا مين ؟
الوطن
يعني المحبة والسلام
الوطن
يعني الوئام
الوطن .. حفنة متاعب
بالمحبة والأخوة
يبقا جنات النعيم
بس فين ؟؟؟!
وانت بتحرّم جنابك
حد ينطق يوم برأيه
أو يقول نفسسي ابقا حر
يا جنابك
المعادلة سهلة جدا
خد جنابك بندقيك
وارجع الثكنة هناك
سيب جناب الشعب يحكم مرة نفسه
وانت تتفرج عليه
تبقا فعلا .. نور عنيه
مش بتسرق منه حلمه
وان نطق تقطع لسانه
وانت شايف
انه بيفرفرط قصادك
وانت ساكت ..
لا جنابك
دا انت بتوجه رصاصك
جوا صدره
حتى لما تدبحه
كبّر عليه
؟؟
آااااااه جنابك
يا عريس
باختصار ..
مش هطولها عليك
استعد الشمس جايه
والشباب فاهم وعارف
بس خايف
من رصاص الغدر والتعذيب
فساكت
هان عليك ؟
هان عليك يحصل دا كله
وانت بتقول نور عنيك ؟
ياما في جرابك يا حاوي م الحكاوي
وبكره جاااااي
بس صبرك
ألف مبروك يا عريس
م النهاردة انت الرئيس
م النهاردة انت الرئيس