ربي كريم رحمــته دوم واســعه سبـــــــــحانه

رب الســـما والأرض والخــلايق عالي شـانه


أخشى ربك

خـــلي الوجه ناير بإيـــمان طــــــمن قلـــبك

دير الخير ف البعـــيد دوم و في اللي جنـبك

واللي تخاف من خبث شره تعوذ من شيطانه


براريم مصايب

يحــبك المولى مادمت عليـــهن صابر تايب

من خطاياك ذنوب ما يشــــيلهن عنك نايب

إللا الخيرات تمحى السوايا م سيات شقانا




توبتك للعالي

بروح صادقه مرفوع بحق دوم رأسك عالي

تمــــشي ف خــيار الطريق خــير كله طوالي

نــور علي نــور أنـــواره نــور ربــــنا مولانا



ثابت يقينه

القلب خليه صافي وعارف خــصايص ديـنه

را دليلك ف الحــياه يوم إن كان راك تهينه

يــــظل ضال في لعـــناد طول أوقات زمانه


جميل فعايل

من حبــيب الله عنها ما يحولك منــهن حايل

و خـــيار الفــــتى جود أجواد لا ينــهر سايل

يعود المريض ينشد علي من غاب من خلانه



حمايم داها

السوايا إن طــــغن ع الروح هي يا مشــقاها

لســــبد من صر سريره إلّبس صمـــيم رداها

و تبـيان الحقيــقة ظاهرات هن علي جـحدانه



خلي الفساق

عـنك في درب الحياه إصـطفي خـــيرة لرفاق

خوك حـبه في الله يحـبك مثـــيله و له تشتاق

حــب الرسول أعلى مــثل دوم في مـــــيدانه



دينك ناير

في أمر الحــياه متعكر و الناس كـــنك حاير

حسن ظـــــنك بهم وبــــهن ما ضـــعفاً خاير

الشرك بالواحد الجــــبار راه عظـــــيم خـيانه



ذنبك غافر

المولى بــتوبه نصوحه وله أنت علـــيها شاكر

لعضاء يشـــهدن عليه ينطقن مادام هُوَّ كافر

في الجحــيم يبقى حــطب شاعله ديمه نيرانه



رضى والديك

هو واجب و ما تزرعه تحــــصده كله بـــيديك

إن كان صاحبـتهم بالمعروف هو يعود علـــيك

والقـلب يطامن زها من القوي بجميع إحسانه



زمان ضلالك

هو قرينك الشيـطان ومسه علي شـين خيالك

اليوم ولى علـيك توى أنـــظر كيف هو حالك

قـــــدامك طريق نايـــره بــــعد كل عصـــيانه


سماحة ربي

يعـــلم سراير نفـــسي كلها وإن كـنت مخــبي

كي نساله هو أقـرب من حبل الوريد إلقلــبي

يرحــم فوادي و يبــــعد علـــيه جمـيع أحـزانه



شد رحالك

شور البــيت الحرام أن قدرت بحلال أمـــوالك

تقـــيم أركان الحــج و ســنن بهن هن تحلالك

تزور قــــبر النبي بشـــفاعته يشمـــلك حنانه



صادق وعده

الله هزم لحزاب بجنده و وحـده ناصر عــبده

لا تــغرك زيوف الحــياه القديمة بطول المده

ينــتــهي كـــمال الشي و يـــبدأ في نقـــصانه



ضلّل غياتك

خلـــنك تبــــيعْ النــساء وعــدم هــن راياتــك

علـــيك الزمان إنــعكس و قَلّْ إقِّــيمْ هــــناتك

عرفت ربك رحــيم يرعاك و حافــظك بأمـانه



طريد متشرد

شايلاتك بعـــيد أفــكار و بــــهن متــــــــمرد

تحـــساب روحك ف الحــــياة قوي متـــفرد

نفــسك ضعيـــفه تحت وجه ربــنا منــهانه



ظل نكايد

علي أنوار نور الحقيــــــقه بايــــنات غدايد

الدنــيا قديـــمه و هي الحق علــــيها سايد

السلــيم يبـــــقى و العــــفن تاكـــله ديدانه



عادات سقيمه

كاثــره ع الدين بـدع وأبدع تــقل القيـمه

خلـــيك مؤمن بربك تــــنال دوم نعيـــــمه

ف الدنــيا رضا في لاخره رفــــيع مكانه



غرايب دنيا

خـوك يدير السـوايا فــــيك قنــيا عنـــيا

لا دين لا مله و هـن في حـــياته قنــــيا

مات عرق الحــيا عنده من قل صــيانه



فروض الدِين

قيمـــهن صون إلـسانك و أبعد ع الدَين

تنال النعـيم بفواكه واجده و حُـور العـين

وأنـهار جاريه عسل بهن الكبابي مليانه


قيم صلاتك

داوم علي وقـتها وحافظ طول حـياتك

قـــيام وركوع و مرتاح في ســجداتك

الله أكبر سبحان الله بحـــــمده و بيانه



كاثرات جروحك

الله عـدل ما يـــظلم وأنت ظــالم روحـك

را الدنيا هي متاع غرور كل طــموحك

علي فــراش الموت ما ينــــفعك ندمانه



ليل نهار

تهاتي باسم الغوالي تايه بعــسر أفـكار

بعــشق العزيز تطـفي لهايب جمر النار

را الغلا مو مقــصور علي فــــلان فلانه


مراضي قرمه

أنت في صاحبك تبدأ في تقطيع و فرمه

خاف ربك وأتــــقي دوم و راعي حرمه

لنسان شي لسان مايغطيه علي حرمانه



ننساه سريبه

الخاطر أمــعا لولاف عاش في تغريـــبه

ياما من نساوين تسـمى دايرات كتيـبه

بكيد عظــيم خاب كـيدهن و رد هـــنانا



هموم غريبه

حايــطه بالقلب و ياس زاد في تنكيــبه

كيف الحلــيم حامل السفـيه في تهزيبه

عجيــبه أمور الناس و أخلاقهم تعبانه



وسع بالك

خلـيك دوم صابر علي ضــــيم أحـوالك

تاجد الفرج برحـمة ربنا وخير أعـمالك

في سلامة بياض قلبك و صدق إيمانه



يا ربي يا جبار

يا ولي اللي ما عـــنده و لا والي يا غــفار

تغفر الخطايا اللي بحملهن خاطري منهار

وتجعل النبي شفيعي في رفقته في حـبانه


د. عبدالصادق حمد الصويدق ( الصادق عبدالسيد )