ﺑﺘﺤﺒﻲ ﺗﺘﺤﺒﻲ
* سمير الأمير




بتحبي تتحبي و تتباهي باﻷعداد
وكل ما يزيد العدد يتجننوا الحساد
فرحانة بالدنيا ..ياختي هنيالك
فكراها بقيالك .. يا محققه اﻷمجاد؟؟



بتحبي تتحبي..وتغيري العاشقين
كما تسريحات الشعر والفساتين
كما البنس والطرح وشددات الصدر
واللي فرح ف الصبح ع الضهر يبقي حزين.



بتحبي تتحبي والحب اخد وعطا
وبتلبسي وتقلعي ويوماتي متظبطة
بس الجمال افعال مش فرجه للمخاليق
والعيشه مهما تضيق مش عذر للخبطة


بتحبي تتحبي ورامي يكتب اغاني
و يرن عود القصبجي وقلبه بيعاني
بقيتي كوكب شرق من غير اﻷهات
آه يازمن حركات.. تقليد وبراني



بتحبي تتحبي كنك اله ف السما
والشقيانين ف الارض يطلبوا المرحمه
وييأسوا. يكفروا. تتقطع اﻷسباب
فتشبحيهم عذاب يا أيها المجرمة؟


بتحبي تتحبي ويعبدوكي البشر
من غير سبب واضح كأنك قدر
والمقدورين علي سكتك افواج
يبكوا كما الحجاج من ذنب لا يغتفر !




بتحبي تتحبي كنك وطن او دين
يستشهدوا في سكتك انبيا وتابعين
والوهم يحكم حبال العشق ع العشاق
وان حد منهم فاق ..عدوه من الكافرين


بتحبي تتحبي قوي كما يعبدوا اﻷصنام
لا تجبري من ضعف ولاتغني عن اوهام
ساعة الحساب تهربي وتقولي اخاف ربي
ده الذنب مش ذنبي ..هوه الحجر يتلام؟؟





ﺑﺘﺤﺒﻲ ﺗﺘﺤﺒﻲ "طوبه " ﻣﺎ ﺗﻨﻔﻌﻠﻴﺶ
ﻟﻮ شرحوا ﻗﻠﺒﻚ جواه ﻳﻼﻗﻮﺍ ﻣﻔﻴﺶ
ﺣﺎﻧﻔﺪ ﺑﺠﻠﺪﻱ ﻭﺣﺒﺎﻳﺒﻚ ﺭﺑﻨﺎ ﻳﻌﻴﻨﻬﻢ
ﺍﻧﺎ ﺑﺮﻳﺊ ﻣﻨﻬﻢ ﻭﺍﻧﺘﻲ.. ﻣﺎ ﺗﻨﻔﻌﻠﻴﺶ


بتحبى تتحبى .... عمرك ماتبقى حبيبه
بعد المشاعر ماشابت يبقى الغلط خيبه
علمت قلبى يحس, ما يملش إلا لحبيب
أصبح ذكى و لعيب وعظيم وله هيبه