حكمة وحلال ======شعر سمير الأمير
حكمة وحلال....... شعر/ سمير الامير
ساعة دخول المسكنه
الكائنات وطت رؤوسها
الكون فضى وهى استوت
على كدبها وحسب ظروفها
سابت هنا ووقفت هناك
بصت مابين الناحيتين
عرفت بأن الدور خراب
ومفيش شيطان باقى على
سكك القبور يكنس جماجم أو تراب
ومفيش ملاك
يزرع زهور للنور ويسلم م العذاب
وانت اللى متدلى بحبال
مبقعين وشك بلون المهزلة
مهما يسيبوك أو يرفعوك
انت فى قلب المشكلة
هارش بعود الخوف قفاك
مش مطمئن
إذ ربما حيفوت عليك قطر السكوت
او يركبك جن الهلاك
يأيها الولد الغبى
عملوك حلول اللولبى
فى الانتهاك
فا ازاى تكون
واقف على حد الجنون
والعقل زينة ف الانتظار
تتخبى جوه الليل وتغدر بالنهار
ماهو برضه لو طالك حمار
راح يركبك
وانت مؤهل للشبك
حمار سمك وسمك حمار
حاتقول و إيه جاب الشبك للى بودان؟
واللى على المسرح بيلعب دور جبان
حاقول وإيه حدفك هنا ع الامتحان
ريحة زفارة مكممة جو المكان
تلعن ف صمت الأزمنة بعد العبط
من امتى لعنك كان غلط يا ألعبان
يا شوك وراشق ف الحلوق
كل اللى عاش يديك عشان يرضيك
شعلل نيران الحقد فيك
ولقاك على درب الصحاب أكبر خازوق
وياريت بتستر ف الحلال أو ف الحرام
مع كل حاجه تقول أدوقها والسلام
مفطوم على لحس النعاج
ملحوق على جس البهايم والدجاج
إخييه بجد !
عملوك خيال لما المآته اتخّربت
وماعدش حد يقول لحد... حرام عليك
رد مع اقتباس
المفضلات