كوابيس
مسرحية شعرية، في ثلاثة فصول
تأليف إبراهيم هلال العساسي
الشخصيات حسب الظهور :
قائد حرس القصر
حارس ١. حارس ٢
حارس ٣. حارس ٤
الحاجب
أمين شئون القصر
الأميرة: حاكمة الجزيرة، جميلة في الخامسة والعشرين.
العميد : صاحب الشرطة، في العقد الرابع.
السفير: المتحدث الرسمي باسم الإمارة، في العقد الرابع، وسيم، أنيق.
وصيفة١ : دون الثلاثين.
وصيفة ٢: في مثل سنها تقريبا.
وصيفة ٣: في مثل سنها.
المهيب: قائد الجنود والمسئول عن الدفاع، تجاوز الأربعين.
مندوب الصحافه: المسئول الأول عن الصحف، تجاوز الخمسين.
أبو حصيرة: شاعر الجزيرة، وعميد المثقفين بها، تجاوز الخمسين.
حمدان: فلاح، في الخامسة والثلاثين.
إسماعيل عبد المعين: مدير شئون العاملين، اقترب من سن التقاعد.
مظلوم الدييهي: موظف بالجهاز الإداري في الدوله.
رابح : أحد الذين ظهر عليهم الثراء فجأة.
المذيعة: صغيرة، جميلة.
صحفي ١. صحفي ٢
صحفي ٣
الشحات: من المتطفلين علي مجتمع الإمارة.
مجدي: جامعي لا يعمل، في الخامسة والعشرين.
حراس. حجاب
إعلاميون. فلاحون
مواطنون
المكان: جزيرة “الأحلام الجميلة“، دولة صغيرة، إلا أنها تظهر بوضوح علي خريطة العالم.
الزمان: المعاصر.

الفصل الأول
المنظر: قاعة الاجتماعات في القصر الأميري، يتصدرها مقعد كبير، على الجوانب مقاعد وثيرة، خلف المقاعد وفي أركان القاعة مجموعة من الحراس يستمعون إلي توجيهات قائدهم ويناقشونه، بينما يقف الحاجب بجوار باب الدخول الرئيسي.
قائد الحرس :
الأمان منا وإلينا..
وإحنا صُناعه وملوكه..
كل شئ سهل ف إدينا..
وبأوامر سلطانيه..
واحنا مش غاويين أزيّه..
أو قضايا م اللي هيّه..
حارس ١:
بس برده رغم ذلك..
الطريق قدامنا سالك..
أي واحد م الرعيه..
مهما كان شوكته قويه..
لو يجازف أو يخالف..
إحنا بنعدل سلوكه..
القائد:
باللوايح والقانون..
والنظام موكول إلينا..
عندي تفويض خاص بينا..
(يخرج ورقه من جيبه)
زَيّنه ختم الأميره..
وثقتها الغاليه فينا..
هيّا تاجنا ونور عنينا..
كلمتني وفهمتني..
ووجهتني وعلمتني..
جه في مرسومها المصون..
كل شئ ممكن يهون..
إلا لو ضاع الأمان..
شغلتك أمن المكان..
حارس ٢:
واحنا قد القول وأكتر..
إحنا جاهزين من زمان..
حارس٣ :
كلنا حنكون عيون..
لجل نحفظ الأميره..
رمز وشعار النظام..
بالعمل.. مش بالأغاني والكلام..
حارس ٤:
واحنا صفوة الجنود..
يعني قد المسئوليه..
القائد:
إحنا حراس الأميره..
والعيون دايما عليها..
إللي راغب في جمالها..
واللي جاي طامع في مالها..
واللي يقصد بيها شر..
الجميع :
كلنا حنكون فداها..
إحنا مانخافش الخطر..
القائد:
في صفاتها وإحساساتها..
كل معنى الإنسانيه..
(بحسره)..
أما يا خساره ف حياتها..
لسه عايشا وحدانيه..
حارس ١: (للقائد)
والأميره ليه مصره..
إن تفضل آنسه؟!..
القائد: (منفعلا)
وانت مالك يا فضولي!!
(ساخرا)
واللا يمكن جه في بالك..
إن تتقدم عريس!! (يضحكون)
حارس ٢: (للقائد)
في الحقيقة عنده حق..
يستحق كمان نيشان..
أصله خايف ع الأميره م الزمان..
القائد:
مسأله ماتخصناش..
دي حياتها وهي حره ..
حارس ٣:
إحنا ناس عايشين في حالنا..
دي مسائل خاصه جدا..
هيّا تختار واحنا مالنا..
القائد:
بس نخلص في عملنا..
منتهي وغاية أملنا..
يرضي عنا المسئولين..
حارس ٤:
ربنا يحسن ختامنا..
حارس ١:
ويفتح الباب للأميره..
الحاجب:
الأميره الله يصونها..
واخده كل أمورها جد..
واللي شاغل بس بالها..
كل أحوال البلد..
القائد:
البيوت أسرار ويمكن..
لسه ماتقدمش حد..
حارس ١: (للقائد)
آنا شايف انك مناسب..
شفتها لك في المنام..
إن حتفوز بالأميره..
تعلى وتحقق مكاسب..
وساعتها تشوف زمايلك..
يا أصيل وماتنسناش..
القائد: (لحارس ١)
إنت أحلامك جنان..
راعي رهبة المكان..
الحاجب عينه علينا..
والحيطان ليها ودان..
إنت أفكارك جنان!!
والجنان مش سكتي..
(بحزن).. آنا عارف قسمتي..
إللي جابني في المكان ده..
حسن سيري وسمعتي ..
آجي في الآخر وأضيع..
كل أيام خدمتي..
يبقى غلطك آنا شيلته!!
إنت مش داري بخطورة..
الكلام اللي انت قلته؟!
ربما مانتش في وعيك!!
واللا بتمارس هوايتك في السماجه؟!
حارس ٢:
في الحقيقه ماكانش يقصد..
الإساءه يا قائدنا..
قصده إنك تستفيد..
وكمان تفيدنا وتساعدنا..
حارس 1: (للقائد)
أيوه كان قصدي أشوفك..
قبل منهم محترم..
تفهم اللعبه ..
تنط م القاعده لفوق راس الهرم..
مسأله حصلت كتير..
إيه بقى يعني أما تحصل في عيلتنا؟!
هوا يبقى حرام علينا..
لو يزور الفرح بيتنا؟!
القائد:
لأ يا جندي بلاش تخرف..
اللا حد يكون مشرف..
نعمل إيه لو يسمعك؟!..
حارس ١:
مش بخرف ولا حاجه..
آنا في غاية الوضوح..
واللي مطلوب من جنابك..
يبقى فيه عندك طموح..
وانا اهه واقف وراك..
النهارده انا أحمي ضهرك..
بكره حبقى في حماك..
قد ماتشيّل تشيل..
واحنا أولى م الغريب..
والأمور وضحتها لك..
قلت إيه بقى يا لبيب؟!..
القائد:
(يفكر في الأمر، وتبدو عليه مظاهر الحيرة والتردد، والعجز عن اتخاذ القرار)
(لنفسه).. الحارس ده مش طبيعي ..
ولا يمكن عنده حق!!..
الأميره مره واحده ..
لأ وإيه مش أي واحده..
في الحقيقه تليق عليّه..
زبده.. قشطه.. مهلبيه..
(ينتفض في فزع)
لأ.. دي فكره جهنميه..
اللعين ده مخه طق..
حشتمه وأقول له لأ..
(للحارس)
يا غبي فيه قبل مني..
ناس كبار ماطلبوهاش..
إنت ليه مانتش في وعيك..
إنت سخن ولا حاجه؟!..
يا خساره!!..
كنت من خيرة جنودنا الموهوبين..
الحاجب:
(لحارس 1)
إيه يا حارس؟!.. إيه يا حارس؟!..
إنت ليه تنفخ دماغه..
يفتكر نفسه انه فارس..
يبتدي يسمع نصايحك..
تنقلب فوقه الكوارث..
وساعتها يروح بلاش..
تستفيد بقى من جنانه..
آنا فاهم كل قصدك..
إنت طامع في مكانه..
دي مؤامره يا خبيث!!..
إنت بتزفه لهلاكه..
لجل قال يبقى عريس!!..
(ينقض حارس ١ على الحاجب، ويلتف بقية الحراس حوله، بينما يبقى القائد في لحظة تفكير)
حارس 1: (للحاجب)
إنت ليه تفتن ما بينا..
واحنا كنا أسره واحده؟!..
الحاجب:
كلمتي لله بقولها..
خالصه.. والدين النصيحه..
حارس ١: (للحاجب)
إنت راجل مش كويس..
آنا حاعملك فضيحه..
حارس ٢: (للحاجب)
لسه بنوفق ما بينا..
وانت بتشعللها نار!!..
الحاجب: (بتوسل)
آنا قصدي الكل يسلم..
قصدي خير والله أعلم..
حارس ٣:
لو تسيبها تكون عمار..
الحاجب:
آنا قصدي الخير يا عالم..
آنا قصدي الخير يا ناس..
(يشير إلى القائد)
أصله في الموضوع مالوش..
رسمكم مايهمهوش..
إنتو لسه ماتعرفوش..
كل واحد عنده وزنه..
إللي بيه يحفظ توازنه..
يبقى ثابت في الأساس..
كل واحد له مقاس..
القائد: (فجأه)
آنا من أكبر مقاس..
واللي معروف ليكو عني..
من طباعي وعادتي إنّي..
أي خطوه باحتراس..
حارس ١:
آهو قالك واقتنع..
وماكانش ممتنع..
حارس ٢:
يبقى لازم تعتذر..
(يهدد).. تاني مره تكون حذر..
الحاجب:
يا جماعه انا كنت بانصح!!
حارس ١: (مقاطعا)
برده م المفروض تصحح..
كل غلطه غلطها..
حارس ٣:
إعتذر.. إعتذر..
حارس ١:
إحنا مش حننتظر.. إعتذر..
(يصيحون)
إعتذر.. إعتذر..
(يدخل أمين شئون القصر، فيصمتون،
ويذهب كل إلي مكانه)
الحاجب: (للجميع)
جه أمين القصر.. شرف..
كلنا تعظيم سلام..
(يرفعون أيديهم بالتحيه)
وانا شايف من ملامحه..
إن فيه عنده كلام..
(يصيح).. إستماع.. إستماع..
أمين شئون القصر:
يا حرس قصر الأميره..
فيه هنا اليوم اجتماع..
كل واحد عنده واجبه..
واختار الدور اللي ناسبه..
يبقى لو قصر نحاسبه..
والمكافأه لمن أطاع..
قائد الحرس:
إحنا بنأدي واجبنا..
فوق حدود المستطاع..
الأمين:
بس انا شايف قصادي..
النظام من بدري ضاع!!
القائد:
ليه بتظلمنا سعادتك..
وانت ليك في الحق باع؟!..
إحنا كنا في استراحه..
يعني راحه م العمل بعد الطابور..
الأمين:
مهملين وكمان بتكدب؟!..
هوّا ده وقت الراحات؟!..
إنتظم.. نظم رجالك..
مشغولين والوقت فات..
في الطريق لينا الأميره..
راح تشرفنا السعادي..
وانا شايف ان النهارده..
محتمل مايكونش عادي..
القائد: (متلهفا)
يعني فيه أخبار سعيده..
ننتظر علاوات جديده؟..
أو منح.. أو ترفيهات؟..
الأمين:
بالأكيد ماقدرش أجاوب..
كله تفكير اجتهادي..
الحاجب:
الأمين دايما يبالغ..
دا اجتماع دوري وفاضي..
الأمين:
إلتزم دورك يا حاجب..
إحترام الأمر واجب..
وان ماكانش الشغل عاجب..
إستقيل من الليلادي..
الحاجب:
(لنفسه منزعجا)
خصله مش ممكن تسيبني..
واللسان دايماً تاعبني!!..
أعتذر واركع وانافق..
لجل واحد زي ابني!!
واترك الخدمه كمان..
والسبب.. زلة لسان؟!..
أعتذر له.. (يتقدم للأمين)..
يا معين..
إصطبحت بوش مين؟!..
(للأمين) تحت أمرك حبقى دايماً..
خدّام القصر وصحابه..
حابقى راجل من رجاله..
وابقى واحد من كلابه..
هوا انا معقول ماجيشي..
إوعى تقطع منّه عيشي..
واجي اشحت جنب بابه..
آجي اقول لله يا محسن!!
على إيه.. الطيب احسن
لك علىّ يا سي الأمين..
والشهود السامعين..
إن اكون دايما في مأمن..
عند دوري وعارفه جدا..
إما أسكت.. أو أنادي..
وانجلي واعمللي جو..
لما حتنور حدانا..
صاحبة الصون والسمو..
(يصيح)..
الأميره.. الحكيمه.. الرزينه..
إللي بتنور حياتنا..
إللي بتعمر بيوتنا..
إللي بتضلل علينا.. إللي ..
الأمين: (يقاطعه)
لما توصل الأميره..
هيّا ورجال الإداره..
إبقى عبر عن شعورك..
وساعتها تقوم بدورك..
(يسخر)..
وانت بالإتكيت ملم..
عارف التوقيت مهم..
مستحيل تقلبها غاره..
إنت فاهم ده شطاره..
الحاجب: (للأمين)
لما ييجي ميعاد وصولها..
برده تديني إشاره..
الأمين:
إطمئن.. أكيد حيحصل..
كلها لحظات وتوصل..
وابقى بيّن المواهب والمهاره..
القائد: (للحاجب)
عندي إحساس ان يمكن..
فيه مفاجأه أو بشاره..
الحاجب:
ربنا وحده اللي يعلم..
فيها مكسب أو خساره..
الأمين:
يعني يا حرس البلاط..
عايز اشوف الانضباط..
والعدد مصحوب بعده..
والنظام مش ناقصه حده..
وامّا توصل بالسلامه..
عايز اشوف الإبتسامه ..
تبقى عنوان الموده..
والعواطف والحراره..
القائد:
يعني نثبت للأميره..
إننا أهل الجداره..
(يصيح على الحرس)
إنتباه.. إنتباه..
التكاسل والتساهل
انتهى من مبتداه..
إللي حيوضب أموره..
يبقى ليه حق الحياه..
كل واحد عنده دوره..
يفتكر لو كان نساه..
(لجندي اليمين)
إللي في الزاويه اليمين؟..
الحارس: (يتثاءب)
سهرانين ومفتحين..
القائد: (لحارس اليسار)
واللي في الركن الشمال؟..
الحارس:
(يرد بعد الصيحة الثالثة)
كل شئ مظبوط وعال..
القائد: (بارتياح)
قمتوا بالمفروض عليكم..
برده ده كان عشمي فيكم…
الأمين هنا حيكافئكم..
والأميره حتجازيكم..
آنا مليان فخر بيكم..
(يصيح).. إنتباه.. إنتباه..
(للأمين)
الحرس واخد مكانه..
والنظام في منتهاه..
(يدخل الموكب الأميري، الأميرة، وعلى يمينها صاحب الشرطة .. وعلى يسارها السفير، ومن خلفها وصيفاتها الثلاث، يحيط بالموكب الحرس الأميري)
الحاجب:
(يصيح للجمهور)
الأميره شرفتنا..
وليها موكب معتبر..
كلكم عارفين عاداتها..
جت بذاتها..
في الميعاد المنتظر..
جت تقول وتشوف وتسمع..
للي منكو عنده شكوى..
واللا نجوى..
واللا ليه وجهة نظر..
الأميرة: (للجمهور)
سلام سلام.. سلام سلام..
وكل خطوه للأمام..
وكل يوم حيفوت علينا..
إنجازه يبقى بألف عام..
إلي التعلم.. إلي التقدم..
إلي التمدين والاحترام..
الوصيفات:
سلام سلام.. سلام سلام..
وكل خطوه للأمام..
نركب صاروخ.. ولا يوم ندوخ..
وينتهي عصر الترام..
الأميرة:
قلبي يفوت على البيوت..
يلقاكوا في الوضع التمام..
كل الحبايب.. حاضر وغايب..
بعاد قرايب..
الود موصول على الدوام..
الوصيفات:
روح شعبنا عزم وبنا..
طول عمرنا..
واحنا هنا آخر انسجام..
الأميرة:
فوق الجزيرة.. أنا الأميره..
إللي يحاورني.. أحسن له ردي..
واللي يناورني.. مين يبقي قدي؟!
واللي يجاورني.. أحسن له جيره..
الوصيفات:
كريمه في الأصل م الكرام..
سلام سلام.. سلام سلام..
وكل خطوه للأمام..
الأميرة:
وكل يوم حيفوت علينا..
إنجازه يبقى بألف عام..
العميد:
شكرا أميرة البلاد..
ع التعليمات والتوجيهات..
السفير:
ثقافه وافيه.. ونيه صافيه..
وبحر زاخر بالمعلومات..
العميد:
أنا كل واجبي أنشط وأحفّز..
السفير:
من النهارده في الخطه اجهّز..
العميد:
وانا في اختصاصي لازم أنفذ..
السفير:
فين الإداره.. باقي الوزاره..
من النهارده. من الليلادي..
كل الأيادي تبني الإماره..
العميد:
خلينا نلحق ركب التطور..
خلينا ندخل باب الحضاره..
(للسفير)
اكتب كلامها..
وذيع بيانها ف كل الجهات..
العميد والسفير:
شكرا أميره البلاد..
ع التعليمات والتوجيهات..
وصيفة ١: (للجميع)
شوفوا الأميره وطبعها..
روحها صحيح في شعبها..
ضحت عشانه بالكتير..
وهوا بالذات حُبها..
وصيفة ٢ :
خايفا صحيح ع المصلحه..
ومفتحه ومصحصحه..
وصيفة ٣ :
و مخططه وموضحه..
وصيفة ١: (للأميرة)
يا ورده بلدي مفتحه..
راسما طريقنا للهنا..
الأميرة: (للوصيفات)
من قلبي بشكركم أنا..
وصيفة ٢:
إحنا اللي واجب نشكرك..
وعلى الأعادي ننصرك..
وصيفة ٣:
ونعرفك ونريحك..
ونبصرك وننصحك..
الوصيفات:
بتفرحينا.. نفرحك..
ويدق قلبك زينا..
الأميرة:
لغه جديده سمعتها ..
ماحكمش إني فهمتها!!..
من فضلكم هاتوا المفيد ..
الوصيفات:
حنوصلك إحساس جديد..
ناسياه وعنك كان بعيد..
وحيبقى ليه مفعول أكيد..
زمن الفراغ راح وانتهى..
الأميرة:
مافيش فراغ ومافيش ملل..
أنا كل وقتي في العمل..
صحيح معايا المسئولين..
وانا قبل منهم بنسأل..
وروني إيه المشكله؟!..
وصيفة ١:
خدي أجازه من العمل..
ودا حق ليكي مهملاه..
وصيفة ٢:
الوحده صعبه وكلنا..
رغم اهتمامنا بشغلنا..
فأي واحده مننا..
ليها حبيب.. ليها خطيب..
بتيجي وبتخرج معاه..
الأميرة:
مش فاهمه برده قصدكم..
ولا غمزكم ولا لمزكم..
حتحيروني ف أمركم!!..
خلوا الكلام ده في سركم..
أو حتى نبقى لوحدنا..
الوصيفات:
حبك بيجري في دمنا..
واحنا الوضوح من طبعنا..
وصيفة ٣:
عايزين نشوف توب الزفاف..
والطرحه بيضا ع الكتاف..
وصيفة ١:
ونغني جنبك بالألاف..
وهو ده اللي يهمنا..
وصيفة ٢:
يعني الحكايه بالصريح..
شفنا الجواز حلو ومريح..
وصيفة ٣:
قلنا الأميره تستريح..
الوصيفات:
بنمد إيدنا وننقذك.. (يغنون)
حنجهزك ونجوزك..
حنجهزك ونجوزك..
الأميرة: (بخجل)
خلوا الكلام ده في سركم..
أو حتى نبقى لوحدنا..
وصيفة ١:
كل البنات بتنطلب..
وتنشبك وتنخطب..
وصيفة ٢:
أصل الجواز حلم البنات..
طول عمره كان أول طلب..
وصيفة ٣:
شايفا الأميره مصهينا..
ودا من مظاهرعجزنا..
الأميرة:
حتكسفوني يا غجر..
إنسوا الخبر.. فكوا الحصار ..
أوعدكم اني عن قريب..
في المسأله حاخد قرار..
العميد: (للأميرة)
مافيش ضروره نأجله..
أنا زيهم بستعجله..
السفير:
ومن زمان قالوا في المثل..
لو تقصدوا الخير عجلوا..
وصيفة ١: (للأميرة)
سيبي الأمور على طبعها..
تمشي وتاخد وضعها..
تجمع قلوب على بعضها..
واتنبهي وخدي الحذر..
وصيفة ٢:
هنا الرجال علي كل لون..
مترصصين زي السلع..
عارضين عليكي حبهم..
وأي واحد منهم..
يتمنى إيدك قبلهم..
لو حتى عينه تنقلع..
وصيفة ٣:
فيهم كتير ناس مخلصين..
(يبتسم العميد)
وصيفة ١:
وفيهم المليان طمع..
الأميرة :
يعني المغامره مزعجه..
وطريق طويل مليان صعاب؟!..
وصيفة ٢:
أبدا.. ضروري مبهجه..
فرحتنا يوم كتب الكتاب..
الوصيفات: (للأميرة)
سيبي الظنون وانسى الشكوك..
الورد دايما جنبه شوك..
بنعدي منه ونقطفه..
ونرتبه.. ونصففه..
ونقول عليه ما ألطفه..
وصيفة ٣:
مولاتي يا كل الأمل..
منايا سعدك يكتمل..
تلقي الأمير المنتظر..
يا حسن بيسر النظر..
وصيفة 1:
لو فارس الأحلام ظهر..
حتحققي كل المنى..
السفير:
نعمل فرح.. وننشرح..
يبقى الوجود فل وورود..
رقص وغنا..
الوصيفات:
(يغنين ويرقصن)
رقص وغنا.. رقص وغنا..
الأميرة: (حائرة)
أنا كنت شفت الحب فين..
خليتوا قلبي بين نارين..
يا ريتني عارفاه زيكم..
القصد.. لو طاوعتكم!!..
مش عارفه حتعذب معاه..
واللا نا حندم ع اللي فات!!..
فتحتوا عيني يا بنات..
وزرعتوا في القلب حكايات..
وصيفة ٢:
طبيعي قلبك العنيد..
يكون هدا وسمع الندا..
الوصيفات:
نهني بالحب الجديد..
ونأرخوا بيوم مابتدا..
وصيفة٣:
ومافيش عليكي أي لوم..
دا الحب كوم والعمر كوم..
حتجمعي بين دا وده..
تِبقي الأميره المسعده..
الأميرة:
خايفا على قلبي البرئ..
يصبح في بحر الشوق غريق..
ونضيع سوافي وسط الطريق..
نعيش في دنيا من الآهات..
وصيفة ١: (بمرح)
يا أميره حبي وافرحي..
وان تعبك الشوق سوحي..
وماتحرميش ست البنات..
تحب وتعيش سننا..
الأميرة:
(في نشوة)
القلب بالأشواق طرح..
مع النسيم عدى وسرح..
ادعو له يوم ما ينجرح..
ويعيش في دنيا حنينا..
الوصيفات: (يبتهلن)
يا ربنا.. يا ربنا..
إقبل دعانا كلنا..
قلب الأميره الرقيق..
يتهنى بيه أجمل رفيق..
أعظم وفيق..
السفير: (يكمل)
ويكون دا واحد مننا..
حساس.. وجيه وف سننا..
العميد:
باتمنى تطلبني أنا..
السفير:
أنا اللي مقصود من زمان..
وف قلبها خدت المكان..
العميد:
أنا باحميها وبيها أحق..
هيا العبره كلام بالبق..
ياسي مغرور كان لازم تفهم ..
عمر ما قلب بحبك دق..
السفير:
برده انا أولى ان جيت للحق..
وصيفة ٢:
كتر خيركم.. فيه ناس غيركم!!..
وصيفة ٣:
والمسألة أكبر بكتير..
الوصيفات:
زي ماتعرف تطلب حقك..
برده تراعي حقوق الغير..
والموضوع موضوع ع الساحه..
مش مشروع متروك لضميركم..
العميد والسفير:
(لهن في توبيخ)..
الشور شوركم؟!..
العميد: (مهددا)
حطوا بقى لموضوعكو نهايه..
انتو فتحتوا الباب وكفايه..
السفير:
واحنا حنقنعها ونرضيها..
الوصيفات:
إحنا هدفنا نفرح بيها..
عمر ماكنا وصايه عليها..
العميد: (للسفير)
سيبلي انت المسأله واتفضل..
وانا حخلصها وأنهيها..
السفير:
أنا باقترح ان انت تريح..
وانا يا عزيزي حقوم بالدور..
العميد:
إيه يعني أريح لا مؤاخذه!!..
حد شكالك قال تعبان؟!..
السفير:
يعني تقوم بأجازه بسيطه..
تروق مخك.. تبقى غسيل..
وانا حاعمل لك خطه حويطه..
وحنفذها بالتفصيل..
خطه تجيب الكل ف جيبك ..
كده على طول من غير مجهود..
وامّا أخلص شغلي تجيلي..
بس كفايه انك تدعيلي..
معروف إنك راجل صالح..
وأنا زميلك وإنت زميلي..
شايفك كده خجلان من كرمي..
ماتفكرش يا شيخ في جميلي..
داحنا اخوات والمصلحه واحد..
وانت يا دوب بس اللي باقيلي!!..
شفت ازاي يا صديقي بحبك..
أنا مش ممكن أكسر قلبك!!..
العميد: (يرتاب)
ماتقول إنك مرعوب مني..
خايف ازيحك.. واخمد ريحك..
السفير:
أنا اخاف منّك..
عيب على سنّك..
مش دايم غير المعروف..
من بكره حتعرف وتشوف..
المسأله مش قصة خوف!!..
العميد: (باستخفاف)
مش محتاجه ذكاء ومراوغه..
أحسن نلعب ع المكشوف..
أنا باعرض لك أكبر صفقه..
(يهمس له)..
إن تشيل إيدك بمقابل..
السفير:
وضح أكتر.. أنا مش فاهم؟!
العميد:
يعني تغور وتاخد لك مبلغ..
السفير:
مهما حتدفع أنا مش قابل..
العميد: (منفعلا)
فهمني حكايتك ويايا..
عامل بس ان انت صديقي..
واما تشوف عيني على حاجه..
تضرب مناخيرك في طريقي..
(بود)..
وانا باعتبرك زي أخويا..
من أمي وأويا..
أخويا شقيقي!!..
السفير:
المفروض ان أنا شريك..
واني كبير في مكاني ولامع..
وانت مافيش حاجه بترضيك..
مهما اسيب لك دايما طامع..
غيّر نفسك واهدا شويّه..
ياخي بلاش تعملها قضيه..
خُد الأمر بروح رياضيه..
سيب الحل يا سيدي عليٍه..
ننسى خلافنا ونعمل قرعه..
واهو يبقى الموضوع تسليه..
العميد: (غاضبا)
مش معقوله.. ومش مقبوله..
انا واخد الأمر بجديه..
مش تسليه..
أنا بكره اتصرف بطريقتي..
واعلنها عليك من دلوقتي..
أيوه حنافسك.. واكتم نفسك..
جيبته لنفسك..
ما تلومنيش على أي أزيه..
الوصيفات: (لهما)
سبتوا طريق الود بسرعه..
وشربتوا وزودتوا الجرعه..
(كل منهما بحاول أن يحتل مكانا في مواجهة الأميرة، ويدفع الآخر بعيدا)
السفير:
(يدفع العميد).. ابعد..
العميد:
(يدفعه).. وسع..
زي ماجيت لمكانك إرجع..
السفير:
(يبتعد).. طول بالك..
هيّا مصارعه!!..
العميد:
أنا يا سمو الأميره..
أخلصت في خدمتك..
الأمن خدته دوري..
ومأكد فيه حضوري..
وقائد شرطتك..
قابض ع الكون وصاحي..
سهران ليلي صباحي..
مستني في أي لحظه..
إشارة حضرتك..
الأميرة:
متشكرة.. متشكرة..
وانا مهما اعبر عن شعوري..
مش راح ابقى معبره..
العميد:
مستني أي كلمه..
أو أتشرف بخدمه.. وانفذ خطتك..
الأميرة:
(مقاطعة).. وتطلب إيه؟!.. مكافأة؟
العميد:
أعرف إيه نيتك؟..
صاحب منصب أميري..
معقول فيه حد غيري..
يآنس وحدتك.. ويشاركك دنيتك؟..
أنا يا سمو الأميره..
أخلصت في خدمتك..
الأميرة:
أنا شاكره وعارفه دورك..
ومقدره شعورك..
بتبص لفوق وأعرف..
اللي بيرضي غرورك..
إنك تكون أمير!!
العميد:
مظلوم وحياة عيونك..
عايش علشان أصونك..
إنشالله اللي يخونك..
(يشير إلي السفير)
يموت غرقان في بير..
الأميرة: (مازحة)
إيه قصدك يا خطير؟..
تتخلص م السفير؟!..
العميد:
تمللي في قلبي حبك..
أنا قصدي أبقى جنبك..
لو حتى في بيت جريد..
ونبدأ من جديد..
نفيد ونستفيد..
نبقى صبرنا ونلنا..
ويتجنن عزولنا.. (يشير إلى السفير)
ونفرح في البليد..
نطير من السعاده..
ونعيش نفس المصير..
السفير: (للعميد)
بتقول كلام سخيف..
ودا حيكون من نصيبك..
وضروري راح يصيبك..
يا شرير.. يا مكير..
الأميرة: (للعميد)
خليك شديد وناشف..
بلاش من العواطف..
اللا السفير يغير..
العميد:
سيبي السفير عليّه..
هوا حيزعل شويه..
بعدين يرجع يروق..
دا لو كان عنده ذوق..
السفير: (للعميد)
كلام أجوف وفارغ..
حقيقي إنك مراوغ!..
العميد:
سكتنا عليك كتير..
السفير:
ياخي داري أمورك..
واتصرف من ضميرك..
لو كان عندك ضمير!!..
الأميرة: (مؤنبة)
يا جماعه فيه أسلوب أفضل!!..
امال تعملوا إيه في غيابى؟!..
أبقي معاكو وكل دا يحصل ؟!..
ليه تتخاصموا؟!.. دا انتو خوات..
متعاونين طول الأوقات..
إحنا بنكبر فوق خلافاتنا..
وبنمتص جميع أزماتنا..
مش وقته نصفي الحسابات..
السفير:
إنت أناني..
العميد:
مش راح تنفد.. إستناني..
الأميرة:
اللتنين من معدن واحد..
مافيكوش حد احسن م التاني..
السفير: (للأميرة)
آنا ضحيه وهوا الجاني!..
فاكر ان احنا خدم وعبيده!..
العميد:
حاكسر راسه وحاكسر إيده..
الأميرة:
بس.. كفايه ..
هوا اللي احنا نقوله نعيده!..
(يهمان بالسباب ولكنها تنهرهما في حزم)
بس.. خلاص!..
العميد:
.. حاضر..
السفير:
.. طيب..
إنتي كلامك فوق الراس..
الأميرة:
آنا حزينه من اللي سمعته..
واللي عرفته..
تخسروا بعض بدون أسباب؟!..
طب ازاي ممكن تتفاهموا. .
أو تتعاونوا..
واللا تراعوا حقوق الناس؟!
العميد: (للأميرة)
أنا بصراحه كنت معبي..
وكنت مخبي..
وجاتني الفرصه لحد الباب..
أعمل إيه؟!..
أكدب على قلبي؟!..
واللا أصرح واعلن حبي؟!..
دا اللي عملته..
طب إيه ذنبي؟..
مش بيقولوا "الهوى غلاب"..
الأميرة:
برده تراعي حضوري..
وتحترم شعوري..
كان لازم تعرف انك..
رضيت أو غصب عنك..
في حبي مش وحيد..
وعشان ليه اعتباري..
مش حاعلن لك قراري..
حفكر من جديد..
(يشعرالعميد بالإحباط ويبتعد قليلا)
الوصيفات: (يفخر)
يا جمالك!!.. يا دلالك!!..
مين هنا يجاوب سؤالك؟!..
واللا يعلم إيه قصدتي..
واللا يعرف مين في بالك..
زيد يا ربي الخير علينا..
ع الرعيه.. واللي مالك..
يرتفع نجم الأميره ..
في المسالك والممالك..
وصيفة ١:
عايزين الأفراح تزورنا..
زي غيرنا ييجي دورنا..
ييجي وينور قمرنا..
ينمحي كل الظلام ..
الوصيفات:
فهمينا..
عرفينا فارس الأحلام..
الأميرة :
ماعرفتش لسه اسمه..
وعندي وصف عام..
لو أشرح ليكو رسمه..
حيحصل فيه صدام..
(تشير)..
آدي رجال الإداره..
واقفين زي الديوك..
مافيش بينهم تفاهم..
وقطعوا السلوك..
وصيفة ٢:
لازم وسيم في شكله..
زي البدر التمام..
خالي وخلّص مشاكله..
ونال أكبر وسام..
الأميرة:
مافهمتيش لسه قصدي..
وكلامك مش تمام..
الوصيفات:
لازم وسيم في شكله..
زي البدر التمام..
خالي وخلّص مشاكله..
ونال أكبر وسام..
(يتقدم السفير من الأميرة مختالا،
ويصلح من وضع رباط عنقه)
السفير:
أنا واجهة الإماره..
وصوتك البعيد..
ناطق باسم الإداره..
دايما بقول واعيد..
بتكلم ع الرخاء..
والحب والانتماء..
والخير اللي في بلدنا..
وطهارة الأداء..
شعبك طال السماء..
في عصرك المجيد ..
الأميرة:
حقيقي وشئ أكيد..
السفير:
متربي في حضن داده..
وتعليمي زياده..
وبقيت في جهاز سموك..
سفير فوق كل عاده..
أطير لمهمه وارجع..
وأكره البلاده..
الأميرة:
أنا في غاية السعاده..
السفير:
دايما باختار كلامي..
علشان حيكون كلامك..
وبافرض احترامي..
لجل تنولي احترامك..
مسئول مقبول ودايما..
مقامي من مقامك..
العميد:
(ينتفض ويشير إلي السفير)
كل شئ إلا التجاوز..
السفير مغرور وعاوز..
يبقى في مقام الأميره!!..
ابتدا ينسج خيوطه وحيله..
ويمارس ضغوطه..
ويكدب الكدبه الكبيره..
أمّا أفعاله حقيره..
السفير: (بهدوء)
يا عزيزي.. يا عزيزي..
بتهاجمني بسهم طايش..
والغضب عندك غريزي..
العميد:
وانت مت وانت عايش..
بُخت ببرود انجليزي..
السفير:
فيها إيه؟!.. عادي وإيزي..
(أكثر هدوءا)
بس ممكن اطفي نارك..
أو أسبب في انفجارك..
مش حتلقى حد جارك..
كنت نار تصبح تراب..
قلت إيه؟!.. عندك جواب؟؟..
العميد: (غاضبا)
قلت إنك سبت واجبك..
وابتديت في بحور غزل..
واللي زيك مهما يعلى..
بكلمه مني يتعزل..
يعني من بدري تاخدها..
من قصيرها وتعتزل..
واشتري مني حياتك..
مش حيكفيني سكاتك..
لم أوراقك وفارق..
بدي أقري مذكراتك..
وابقى قول عني..
رئيس شرطه رزل..
الأميرة: (تقاطعه)
يا عميد.. يا عميد..
قلت مره..
وألف مره بقول واعيد..
اللي عنده كلام يقوله..
بس يبقى في المفيد..
السفير:
يفتري ويفرض إرادته..
زي عادته..
خد خياله وراح بعيد!!..
قصده اكون بإدين سيادته..
زي بعض الناس شهيد..
والأكيد..
إن بالحكمه وبالرأي السديد..
ينتهى الإرهاب..
ونبدأ يوم جديد..
الأميرة: (للسفير)
إنت فخر للإماره..
واختيارك كان موفق ..
السفير:
تعليماتك وبجداره..
لسه ياما كتير نحقق..
الأميرة:
راضيا عنّك.. لأ.. موفق..
السفير:
(مخاطبا الأميرة، وقد انتشى بالنصر)
السلك الدبلوماسي..
رقيق وبطبعه ماسي..
بنعمل في تفاني..
ماتهمناش كراسي..
وانا دايما في تواضع..
وحيد بين كل ناسي..
باهتم بقص شعري..
مهندم في لباسي..
(بغزل)
وراسي تدور في بعدك..
دا قربك شئ أساسي..
والمهر اللي ف إديه..
قلبي وحبي وحماسي..
وانا كلي بين إديكي..
وعمري ملك ليكي..
مانتي شفتي بعنيكي..
دول حاولوا إفتراسي..
وقلبك الحنين..
يخللي الصعب هين..
رقيق.. حساس ولين..
وعمري ما شفته قاسي..
الأميرة:
أشكرك على حسن ظنك..
شئ حقيقي يا صديقي..
عمري مش حستغنى عنك..
الوصيفات: (بفرح)
انشبك قلب الأميره..
والسفير حاز القبول..
نرفع الرايات ونعلن فرحنا..
دا الطبيعي والأصول..
الأميرة:
ملهوفين والطبع حامي..
كل عيبكم في الفضول..
لسه مافهمتوش كلامي..
قصدي احييه ع اللي قاله..
السفير مخلص ورائع..
مالتقيش زيه ف مجاله..
أما بالنسبه لغرامه..
(ضاحكه)
لسه ماجاوبتش سؤاله..
السفير: (وقد أحبط)
يعني يا سمو الأميره..
حانتظر واصبر كتير؟!..
العميد: (شامتا)
انتظر.. مش مكتوبالك..
إنت سهمك راح يخيب..
السفير:
مهما جنحت بخيالك..
رايح اكون صاحب النصيب..
العميد: (يقلده)
لما تطلع من هنا..
أنصحك روح للطبيب..
السفير:
إنت حد بيسألك؟..
في الكلام إيه دخلك؟!..
إنت ليه أمرك مريب؟!..
(يدخل المهيب، مسئول الدفاع،
مندفعا، غاضبا)
المهيب: (لهما)
واللا طيب.. واللا عال..
أبقى ع الجبهه الشمال.
وجبتي بين الجنود..
عدس مخلوط بالرمال..
قائد الجيش ع الحدود..
واما اعود..
ألقى قدامي مؤامره..
أو مغامره!!..
شئ مانعرفهوش..
ولا يخطر ببال!!..
دي خيانه للأمانه..
دي مهانه واحتيال..
حانتبه لحدود بلادي..
واللا اشوف شغل العيال؟!
(يضرب بإحدى يديه على الأخرى)
اللي حاصل شئ محال!!..
العميد: (ساخرا)
إهدا يا حامي الحصون..
فوق وماتسيئش الظنون ..
السفير:
صحتك يا مهيب مهمه..
سبعنا وأخ وحنون..
العميد:
الحقوه يا جماعه سرعه..
روقوه بعصير لمون..
السفير:
استريح من ظنونك..
واطمئن الدارعمار..
مين هنا يقدر يخونك..
وانت صاحب القرار؟!..
العميد:
ربنا يدعم حصونك..
والعدو يبلغ فرار..
السفير:
إحنا دايما شخص واحد..
العميد:
ربنا يديم المحبه..
السفير:
فرض زودناها حبّه..
إنت ليه تعملها قبّه؟!..
والطبيعي ان الأميره..
هيّا صاحبة الخيار..
المهيب:
(يشتد غضبه)
صدفه بينكم كان حضوري..
لجل ما اوضح أموري..
رايح اقول وبصوت جهوري..
مين ينول قلب الأميره غير بطل؟!
كل واحد فيكو قدامه عمل..
مش أمل!!
وانتو ماتعدوش بحوري..
السفير:
عند مولاتي الأميره..
الأدب بيكون ضروري..
المهيب:
جاي تعلمني الأدب؟!..
شئ عجب!!
وإنت مالك بالأدب؟!..
إنت تعرف الأدب؟!..
إنت خايف ع الأميره..
واللا جاي تضرب زنب؟؟..
يا مشاعرك الرقيقه!!..
تبقى قدامك حريقه..
وترمي فوق النار حطب؟!..
السفير:
(لنفسه ويشير إلي العميد ثم المهيب)
دا ابتدا ودا جه بدوره..
(للمهيب).. يا مهيب..
كل واحد له حضوره..
كان صغير أو كبير..
بند في الدستور قريته..
المواطن ليه كرامه..
مش جهاز وانت اشتريته!!..
فيه حقوق للشعب كله..
واحنا دايما ع الحقوق دي سهرانين..
المهيب:
(ساخرا)
إجري روح للشعب قول له..
مانتو جنس مهرجين..
العميد:
إللي يقصده السفير..
نحترم حتى الغفير..
المهيب:
الغفير م الناس بتوعك..
إللي بيقيدوا شموعك..
في الشوارع والحارات..
أمّا انا بكل الفخار..
جندي حقق الانتصار..
شغلتي أحمي الحدود..
وامّا اعود…
ألقى قدامي مؤامره..
أو مغامره م الصغار!!..
أما غاب القط..
جه دورك يا فار؟!..
باختصار..
الأميره عينها دايما ع الكبار..
ليه تسيب القمه وتروح للقرار!!..
(للأميرة)
واللا إيه رأي الأميره؟؟
وصيفة١:
الأميره لما جت تفرح..
بقت منكم حزينه!
وصيفة٢:
ليه يزيد البعد بينكم!!..
ليه يكون بينكم ضغينه؟!..
وصيفة٣:
والعتاب ينصب كله..
عند مسئول الدفاع..
ع الشراسه والاندفاع..
المهيب:
(للوصيفات)
آنا بسأل الأميره..
وعودتنا ع الجواب..
رأيها هوّا اللي حاسم..
واللي حيحل الخلاف..
الأميرة:
السؤال جه بعد وقته..
بعد ما قلت اللي قلته..
بيه بتقفل كل باب..
للعتاب أو للحساب..
وصيفة١:
وابتدت نزعه خطيره ..
ضيعت حلم الأميره..
والفرح أصبح سراب!
الأميرة:
كل واحد عنده سلطه..
يفتري ويفرد له باع!!..
المهيب:
المهيب مابيفتريش..
ملتزم وقوي وشجاع..
الأميرة:
دا الشجاع..
إللي عدى م الخطر وسمع وطاع..
إللي بالرأي انتصر مش بالدراع..
المهيب:
كنت دايما في اختصاصي..
وبرضى وصدق وحماسه..
عارف المفروض عليّه..
وخالي إيدي من السياسه..
الأميرة:
يبقى ليه الشر زاد؟!..
مين نفخ في النار وقاد؟!..
المهيب:
(يسخر من العميد)
إللي حارس ع الفضيله..
(ثم السفير)
وابن عمه السندباد..
الأميرة:
تاني نرجع للعناد!!..
المهيب:
دول عارفهم.. مش جداد..
إللي حارس ع الفضيله
وابن عمه السندباد..
السفير:
(للمهيب)
لو سمحت.. لو سمحت!!..
من كلامك يا عزيزي..
حتى في شعوري انجرحت..
المهيب:
(غاضبا)..
يا حبيبي.. يا حبيبي..
بالدجل تبلع نصيبي..
(يرفع يده إلي فمه ويحدث صوتا)
السفير:
إنت عديت اختصاصك..
المهيب:
(مهددا)
وانت فين مني خلاصك..
الكلام مش كل حاجه..
(وللعميد)
وانت فى الأحلام سرحت..
الأميرة:
(غاضبة)
يا جماعه.. يا جماعه..
لو يغيب العقل ساعه..
كلنا حنكون ضحايا..
وانتو خليتوا عقولكم..
في أجازه م البدايه..
زي ما يكون التنافر..
والخصام بينكم هوايه..
المهيب:
(يشير إلي السفير)
ده مناور وبوضاعه..
السفير:
(يقصد المهيب)
صنعته مروّج إشاعه..
الأميرة:
إعرضوا أرخص بضاعه..
كله تفكير مش صحيح..
العميد:
قصده ياخد فوق حقوقه..
بادّعاء انه فصيح!!..
السفير:
ليه تزيد عن مستواك؟!..
العميد:
إنت بتروح للهلاك..
المهيب:
تنتهي وحلمك معاك..
وصيفة١:
يا جماعه.. الأميره مش بضاعه..
واللا سلعه تتنهب!!..
وصيفة ٢:
الأميره نجم عالي..
روح وقلب من الدهب..
وصيفة٣:
واللي يرغب انه يكسب..
برده يحسن الطلب..
(يثوبون إلي رشدهم فيتندرون)
المهيب:
(يقصد العميد)
العرق بلل جبينه!!
السفير:
(يقصد المهيب)
إرتبك.. ربك يعينه..
العميد:
إنت بيغرك إناقته..
ومشيته وإيده ف جيوبه..
مش حيخدعنا بشياكته..
نرفزه تعرف عيوبه..
السفير:
(ناصحا)
الغلط زاد بينا ليه؟!..
المهيب:
(في خجل)
واللي أكتر م الغلط..
إن خدنا دور عبط!..
السفير:
طب نعود للصح أفضل..
واللي منا يطيش ويزعل..
يبقى ياكل الزلط..
العميد:
كلنا حنكون عَليه..
إحنا بس جرالنا إيه؟!..
السفير:
كنا دايما كل واحد..
منا للتاني صديق..
والتلاته ف سكه واحده..
ليه يضيع منا الطريق؟!..
المهيب:
اتحسدنا ع النفوذ..
سلطه وبناخد كنوز..
السفير:
والنفوذ فادنا بإيه؟!..
شر وبنُحسد عليه..
العميد:
حتى مابنلقاش تجاوب..
السفير:
اترفضنا بالتناوب..
المهيب؛
(للأميرة)
لو يفوز واحد بعينه ..
مين؟؟..ونعرف السبب؟؟
الأميرة:
لو نويت اختار بقلبي..
مش حخبي..
لأ.. حقول واعلن لشعبي..
للصغير والكبير..
كل واحد عنده فرصه..
حتى لو راجل فقير..
وصيفة ١:
واللي يسعد بالأميره..
الأميرة:
مش ضروري يكون أمير..
(يشعرون بالخطر، فيتندرون، ويناورون)
السفير:
آنا شاعر بالتفاهه!!..
العميد:
وانا حسيت بالخطر..
المهيب:
وانا أول مره أفشل..
في مواجهة مشكله!!..
السفير:
(محذرا)
آدي أخرة الاختلاف..
انتهى زمن الخشاف..
وابتدا عصر الجفاف..
العميد:
يقطعك.. سيّبت رُكبي..
المهيب:
ابتدا الواحد يخاف!! ..
الجميع:
أيوه مش حنختلف..
وضروري نلاقي حل..
السفير:
وان ماكانش من اقتراحنا..
راح يكون مفروض علينا..
الجميع:
أيوه مش حنختلف..
الأميرة:
بكره أعلن في الصحف..
ييجي مندوب الصحافه..
يستلم إعلان خطير..
ينشره على صفحه أولى..
مقري بالبنط الكبير..
الوصيفات:
ييجي مندوب الصحافه..
ييجي مندوب الصحافه..
(تتردد الجملة في جنبات القاعة حتى يدخل المندوب، وفي يده تقرير، يبدأ في قراءته،
موجها الخطاب للأميرة، ومتجاهلا اعتراض الجميع)
المندوب:
الصحف فوق الجزيره..
تحت حكمك الرشيد..
نورت للشعب فكره..
قدمت كل المفيد..
العجايب والغرايب..
والقديم ويّا الجديد ..
وصيفة ١:
إحنا جبناك بس تسمع..
مش تثرثر واللا تلمع..
المندوب:
الصحافه سُلطه رابعه..
وصيفة ٢:
لأ.. بنستدعيك لأنه..
المندوب:
همّه وأمانع ومتابعه..
والصحافه والصحافي..
مهما كان الإتجاه..
كلهم في إدين سموّك..
زي سبحة الصلاه..
هوّا ده دور الصحافه..
مرنه وف غاية اللطافه..
إللي يملك في بلدنا..
الصحافه تتوّجُه..
أي رأي للإداره..
في السياسه والكياسه..
الصحافه تروّجه..
الخبر نعرف طريقه..
والقال بندبجه..
القلم سهل ف إدينا..
عارف المفروض علينا..
وإحنا دورنا نبرمجه..
اللي يقصد يبقى شعبي..
لجل يكسب ود شعبي..
نرسمه ع المصطبه..
أو نطبّل له بألفين مرحبه..
واللي يتفرنج ضروري نفرنجه..
عندنا كل البلاوي..
للي غاوي واللي ناوي..
واللي يستسلم لنا بنبنجه..
وصيفة ٣:
إدي فرصه للأميره تعلن الخبر العظيم..
المندوب:
بالتخصص..
والتخصص يعني عنوان التقدم..
والصحافه للشعوب هيّا المعلم..
برده اوضّح من جديد..
واجبي كله يستفيد..
الصحافه عارفه دورها..
ليّنت مخ العنيد..
بالتخصص.. والتخصص..
المهيب:
مفهوم.. مفهوم..
يعني عنوان التقدم..
المندوب:
اللي يكتب عن كفاحنا..
واللي يكتب عن نجاحنا..
واللي يكتب عن معاني..
المهيب:
(َمقاطعا)
لو تواضعنا وسمحنا..
المندوب:
ع الحقيقه الكل شاهد..
والنظام نفديه بروحنا..
يعني يا سمو الأميره..
الصحافه ماشيه صح ..
حطمت عقبات كتيره..
ماشيه بمخطط نجح..
الأميرة:
رغم نص الشعب أمي؟!..
المندوب:
لكن الإلحاح مفيد..
واللي مانحسش برده ..
راح نعيده من جدبد..
(لنفسه)
ورانا إيه يعني..
(يكمل)
كان شعارنا في الصحافه..
الثقافه للجميع..
واللي مهمل في حقوقه..
عندنا مش راح يضيع..
كل واحد له نصيبه..
لو نجامل.. أو نبيع..
تحت تأثير الصحافه..
الجميع أصبح مطيع ..
المهيب:
كلنا نحيّي الصحافه..
العميد:
ناضجه والمفعول سريع..
(يصفقون)
السفير:
(للمندوب)
من فضلك يا مبجل..
يا فاهم يا حويط..
عندي موضوع صغيّر
يعني استفسار بسيط..
لو تسمح لي جنابك..
ممكن أسمع جوابك؟..
المندوب:
اتفضل يا صديقي..
قول وانا حاسمعك..
واضح إنك مثقف..
واحنا حنشجعك..
السفير:
علّيت دور الصحافه..
ورفعت قدرها..
واحنا بنضم صوتنا..
وعاجزين عن شكرها..
بس الذكي اللي فاطن..
يعرف دخل المواطن!..
يدوبك بالأكاده..
بياكل عيشه ساده..
قللتوا ليه ورقها..
وزودتوا سعوها؟!..
(ينظر المندوب إليه مندهشا، فيبرر)
ماهوش طلب إحاطه..
ولا محاوله ألاطه..
أجيبها لك بلاطه..
قصدنا الاستفاده؟!..
المندوب:
(في ضجر)
شوف يا مسيو.. شوف يا مسيو..
مهما اقول.. الكل نسيوا !!..
وانتو دايما بتلومونا..
إرحمونا.. إرحمونا..
الصحف من غير موارد..
والقروض عندي بفوايد..
والورق بقى سعره قايد..
كيف نمول؟؟.. فهمونا!!..
السفير:
عندنا تمويل خصوصي..
وبرده فيه تمويل عمومي..
وان ماطلتش منّه حاجه..
عندك الدعم الحكومي..
المندوب:
(منفعلا)
الحكومه.. الحكومه..
هوّا كله ع الحكومه..
مرّه تدعم الثقافه..
ومره تدعم الرغيف..
ومره تبني في المساكن..
للي ساكن ع الرصيف..
شئ سخيف!!..
مانت عارف قبل منّي..
موضوع الدعم ومشاكله..
مسأله مطروحه دايما..
للمناقشه ع الجميع..
اللي قال شيلوه.. كفايه..
واللي قال يبقى ودا حقه..
إحنا دوله ديمقراطيه..
يبقى ليه حنسد بقه..
المهم نطمعه..
بس مين راح يسمعه؟!
القرار مختوم وجاهز..
إن يعني نميّعه..
ثم بعدين نقطعه..
شفت؟!
خطه عبقريه..
وانتهى الدعم وملفه..
والأهم ان الثقافه شئ كمالي..
(يقترب منه)
يكفي بس ان انا وانت مثقفين..
السفير:
المفروض ان احنا نأيّد..
العميد:
(للمندوب)
إحنا بنهنيك يا سيّد..
المهيب :
نشكرك.. ردك عظيم..
العميد:
الصحافه في بلدنا..
ماشيه ع الخط السليم..
المهيب:
واللي شكّك في مواهبك..
سيبه..
حيروح للجحيم..
وصيفة١:
وانت تسمع لاتفاقتا..
بعد ماعرفناه ورُقنا..
وصيفة ٢:
لو مجاش اليوم في وقته..
وصيفة ٣:
.. كنا تهنا أو غرقنا
الجميع:
الأميرة بصوت رخيم..
تعلن النبأ العظيم..
الأميرة:
.. ندائي لشعبي في كل البلاد..
في كل النجوع والقرى والمدن..
رجاء الاهتمام..
ولو حتى يمكن كلامي معاد..
أنا منّكو.. بقرّب لكو.. بروح عندكو..
ومن فضلكو. . رجاء الاهتمام..
دي فرصة وجاتكو ومن غير ميعاد..
ويمكن ماترجع ولا ألف عام..
ودعوه نعيش الحياه في سلام..
لا تبقي مشاكل.. ولا تشتكوا..
ومن فضلكو.. رجاء الاهتمام..
قبلنا الخطوبة كفكره وكمبدأ..
وبنعمموا..وحنتمموا..
مادام صمموا..
أنا فاتحه قلبي عشان تفهموا..
.. وبطلب عريس..
مابسألش سنه.. ولا مهر منه..
ويكفاني إنه من المخلصين..
وبيأدي واجبه وعارف حقوقه
وإنسان رزين..
وشرطي الأمانه تكون الحصانه..
بلاش الحصانه تخليه أمين..
سألت وانا في انتظار الجواب..
نعلي رايتنا ونكتب كتاب..
وقلبي اللي كان عالي فوق السحاب..
حيبقى هديه لناس منكو..
لمين يستحقه .. قوام يملكه..
ومن فضلكو..
رجاء الاهتمام.. رجاء الاهتمام..

ستار

الفصل الثاني
المنظر: قاعة الاجتماعات في قصر الاميرة، الاميرة بين وصيفاتها بينهن رئيس الشرطة، الحوار حول موضوع الساعة.
العميد:
(للأميرة).. نفذنا والاعلان ظهر..
عم الأمارة وانتشر..
اتعرف بين الجموع.. في البراري والنجوع..
والقرى قبل المدن..
الأميرة:
ممكن أعرف رد فعله؟؟.. بالحقيقة واليقين..
قالوا إيه البصاصين؟؟
العميد:
شعبنا كان مش مصدق!!..
قالوا عنه كلام جرايد..
اتقصد بيه الاثاره.. ولا توزيع الصحف!!..
بعضهم قالوا اشاعه!..
واللا يمكن نكته بايخه.. أو دعابه..
يا أميرة الشعب طيب..
في الحقيقة الناس غلابه..
المهم.. مش حيظهر منهم أي استجابه..
الحاجب:(يدخل إلى المسرح، ويتجه إلى الأميرة)
فيه مواطن جاى طالب الاميرة..
وانا مانعه من الدخول..
مافتكرش ينول قبول..
قلتله عندك ميعاد؟..
طل من عينه العناد..
بصلي من فوق لتحت.. انشرحت..
طال لسانه و قال يا شحط! ..
انت مش فاهم قواعد شغلتك؟!..
صنعتك انك تبلغ.. وأنا واجبي انتظر..
ِالأميرة:
المواطن عنده حق..
النهارده انا فاتحه بابي..
شايفه كل الناس حبايببي..
شايفه كل الناس قرايبي..
شايفه كل الناس صحابي..
أي واحد جاي يزورنا..
رحبوا وفي أي وقت..
الحاجب: (يصيح)..
المواطن الكريم.. يحظى بالشرف العظيم..
(يدخل أبو حصيرة، وفي يده صحيفة، وفي اليد الأخرى بعض الكتب الصفراء، وعلى عينيه نظارة طبية، مظهره متواضع)
أبو حصيرة: (للجميع)..
قرأت في جريدة "الأنباء الغامضة"..
عن اشاعة أرجو ألا تكون مغرضة.. (يتجه للأميرة)..
أن أميرتنا الحسناء..
ذات الجمال والبهاء..
تبغي الزواج..
بغير مهر أو فلوس.. بلا جهاز أو شقة..
فهل هذا يحدث حقه؟!!.. فقلت هذه ساعتى..
قد حانت فرصتي.. وجئت يا سادة.. بإرادة..
أقدم نفسي وأعلن منهجي..
وأنا لقرب الأميرة أرتجى..
العميد:
وسيادتك تبقى مين؟! .. زعيم الدجالين؟!
أبو حصيرة:
أنا فارس القوافي.. وأستاذ البيان..
العميد:
ربك هوا اللي شافي.. وعندك ايه كمان؟!
أبو حصيرة:
ثقافة وعلم نافع..
العميد :(مقاطعا)..
نعرف عنوان محلك؟؟
أبو حصيرة:
ماباثبتش ف مكان بدور بيه ع البيان..
والناس مابتشتريش
قاري وصاحب بصيرة ..
وبعيش أيام مريرة..
وضعي اكبر مثال..
على أزمتنا الخطيرة..
في الشعر..
والثقافة مابتوكلش عيش!!
العميد: (ساخرا)..
ممكن تلجأ لملجأ.. أو عندك الشئون..
حتصرفلك أعانه.. وتعمل لك مكانة..
أبو حصيرة: (مقاطعا)..
بقيت غيركم ماليش. .
العميد:
متشوفلك حل تاني..
(لنفسه).. دا لزقه أمريكاني!!..
أبو حصيرة:
لو يوم تتخلوا عني..
أو تخلوا ايدكو مني..
ازاي اقدر اعيش؟!
العميد :
يا شيخ المساكين.. شايفك مقهور حزين..
أنا بكرر سؤالى.. وضحلى.. أنت مين؟؟!
أبو حصيرة:.(يصمت خجلا من اسمه)..
وصيفة 1:
.. ماتقول.. لا فض فوك..
ممكن تاخد مكانك..
مش ممكن ننصفوك!!
أبو حصيرة:
أنا شاعر الملوك..
ومن سوء السلوك..
سموني أبو حصيرة..
من غير ذنب و جريرة..
العميد: (يضحك)..
صحيح الاسم تافه..
بيفرش اي أرض..
بمقاس وطول وعرض..
وبيكسف أي واحد..
في الدنيا عنده عرض..
لكن تشد حيلك..
وتروح لحال سبيلك..
أحسن يستعوقوك..
أبو حصيرة:
خليك دايما محافظ.. وحسن الملافظ..
العميد:
وعايزني أعملك إيه؟!..
اضرب تعظيم سلام؟!
أبو حصيرة:
بلاش تغلط أمامي..
يا راجل يا نظامي..
الجهل وسوء علامك..
خلوك تجهل مقامي..
العميد: (بغضب)..
حتعلمني الأصول؟!..
وبتتدخل في شغلى؟!
أبو حصيرة:
الذوق انك تجامل..
وتكون فاهم وكامل..
وبتقدر علامي..
العميد: (ساخرا)..
أقولك ايه يا بابا؟!..
أبو حصيرة:
قوللي تعيش الأسامي..
أخدهالك جميلة ..
وتكون لفتة جميلة..
ورمية بغير رامي..
العميد:
باين عليك حرامي..
حاعمل عنك تحري..
وصيفة 2:
...أيوه تعيش الأسامي..
لو كان الاسم يعني.. لكن..
المعنى سامي..
أنا رفعته بطريقتي..
وعليته بمشيئتي..
وحليته بكلامي..
أبو حصيرة:
انتي كلامك ظريف..
وتفكيرك نضيف..
الحق بان وواضخ الذوق من السخيف..
آدي حسن المعامله..
وصيفة 3: (مازحة)..
اطمن يا خفيف..
بنفهم في المجامله..
الأميرة: (للشاعر)..
اغفر له أي عمله..
واحنا حنعوضوك..
العميد: (مهاجما)..
كنت فين يا وحيد زمانك؟!..
ليه حارمنا من جنانك؟!..
أبو حصيرة: (يتجاهل الهجوم)..
كنت بين العلم والفن أتأرجح..
كبندول الساعة.. يا جماعة..
وبما أني في الحقيقة.. شاعر بالسليقة..
ومن أسرة ثقافية عريقة..
فقد جئت إليكم من هذا الباب.. (يشير إلي الباب)..
أحمل في رأسي ألف كتاب وكتاب..
جئت أطلب الأميرة.. حاكمة الجزيرة.. والآن..
وقد وضحت الأسباب..
ولم يعد أحد في أمري يرتاب..
فهل أسمع الجواب.. يا أحباب؟؟
العميد:
انت جيت صدعتنا.. وقتنا مش ملكنا..
بالسلامه يا سي الغراب.. (لا يخرج)..
وصيفة1:
الأميرة إيه تقول؟؟..
ترضى أصحاب النفوذ..
ولا أرباب العفول؟!
وصيفة 2: (لزميلتها)..
اسكتي.. يمكن تقول..
قسمتى شاعر رومانسي..
شعره بيهز القلوب..
والأميره قلب ناعم..
زي كحك العيد يدوب..
الأميرة:
.. صنفوهم.. اوصفوهم..
ادرسوهم.. واشرحوهم..
كل ده مش راح يفيدني..
أو يكون رأيي فيهم ..
وصيفه 3:
يبقي مش حتنصفيهم..
ولا ناويه تضيعيهم..
الأميرة:
آنا حاختار اللي يسوى..
واللي من قلبي قريب..
كل واحد عنده ميزة..
وكل واحد عنده عيب..
العميد: (يشير إلي الشاعر بحقد)..
زي ده راجل عجيب..
كهل واقف جنب بابك. .
رغبته يكتب كتابك!! ..
يرتوي ويروح شبابك!! ..
كهل متصابي وأناني..
جاي هنا ياخد مكاني..
صُبي فوقه سوط عذابك..
واكتبي قدام في بابك.. يافطه..
ممنوع الدخول..
الأميرة: (ساخرة)..
أو أعين عند بابي..
صاحب الشرطه بعصايه..
يبتدي يملي شروطه..
وبكدا يفرض وصايه..
والنبي حكايتك حكايه!!..
انت دورك تحرسه..
مش تهاجمه وتنحسه! ..
وصيفة 2: (للأميرة)..
أصله يقصد يخرسه..
العميد:
يلتزم حده ومقامه..
وصيفة 3:
جاي يعبر عن غرامه..
والغرام مقبول..
وعمره ما كان جريمة أو حرام..
أبو حصيرة : (سعيدا)..
قد كنت بقلب مرتاح..
ماعرف الحب ولو مرة..
اذ قرأ بيوم اعلانا..
فغدا مملوءا كالجرة..
أخذته الأشواق اليها..
(يشير إلي الأميرة)..
واحلوت أيام مرة..
يحلم أن يعلو منزله..
ويفوز بهاتيك الدره..
العميد:
حتروح بهزيمة أليمة..
وحتلقي الخيبة والحسرة!!..
أبو حصيرة:
أنا شاب بحلم يا سادة..
وشباب اليوم لهم فورة..
الوصيفات: (يصفقن بإيقاع الشاعر)..
.. انت احلويت.. بعد ما حبيت..
أبو حصيرة:
الحب تراث مقدس في أسرتنا الشريفة..
العميد:
..يعني وراثة عن جدودك!!..
(يهدد)..انتبه والزم حدودك..
ربنا دايما يزيدك..
م الخيابه والعبط.. يا لبط!..
أبو حصيرة: (يتجاهله)..
وهل نملك إلا الحب؟!..
(في وله).. أشبعنا به يا رب..
ان تزرع حبا تحصد حبا..
قد تمسح من أعمالك ذنبا..
العميد:
.. الحب لواحد لسه شباب..
ما يناسبكش يا عم هباب!..
مش معقول ولا مقبول أبدا..
بعد الشيب هتروح كتاب!!..
تبقى فضيحة يا عم تراب!!..
أبو حصيرة:
هذه مسائل عاطفية لا تقحم نفسك فيها..
(بترفع).. ابق بين السوقة والدهماء..
وتحدث كيف تشاء..
العميد: (للجميع)..
فاكر إن القصر منبر للخطابة..
وحيقلب المناسبة..
مسرحية مضحكة!!..
دي دعابة والنبي..
بس من النوع الغبي..
أبو حصيرة:
تقصد إيه بكلام سيادتك..
غير تهييج الخواطر!..
العميد:
.. بس رغما عن إرادتك..
أأمرك وتقوللي حاضر..
(في تأفف).. امشي..
روح وبلاش تحاضر..
أبوحصيرة: (يكمل)..
قد كان الحب هو المبدأ..
نبع فياض لا يهدأ..
أتيت الآن لكي أبدا..
لا أرضي فيه بسلوان..
الحب أمان.. الحب أمان وضمان..
(ناصحا).. حبوا بعض يا جماعة..
وانزعوا الحقد الدفين..
احنا أخلاقنا الوداعة..
والسماح با محسنين..
(للعميد).. ليه بقى بتحقد عليّه؟!..
انت وضعك ده مشين!!..
ربنا يهديك يا صاحبي..
ويهدي كل السامعين..
العميد:
غلبه وتهويش.. والمعنى مفيش..
يمكن محتاج.. عايز بقشيش..
(للأميرة).. اديله الفكة اللي ماتمشيش..
(للشاعر).. ادعيلها.. وعدي.. وهنا ماتجيش..
أبو حصيرة: (بحزم)..
لو تسمح بقى.. ماتهددنيش..
العميد:
أنا حبتدي عد عليك يا عليش..
وبعد تلاته ماتسألنيش..
حتغور من هنا منتوف الريش..
أبوحصيرة:
أنا أغور من هنا؟!..
(يسخر).. انشالله تعيش..
ما هو دا قصرنا.. بطلوا تلطيش!..
الأميرة: (للشاعر مازحة)..
أنا فرحت بوصولك.. وباعلن ابتهاجي..
بنقضى علي الخرافة.. وبندخل بالثقافة..
وبمنتهى اللطافة..حنسكن بيت زجاجي..
وصيفة 2:
.. او يمكن برج عاجي..
الأميرة:
زي شاعرنا المفضل.. اللي بيرغب في تاجي..
أبو حصيرة: (منزعجا)..
وحياة طلعة سموك..
انشالله يموت عدوك..
لو المقصود مصالح..
مش ممكن كنت آجي..
(برقة).. أنا جيت انظر واشاهد..
مخلص والكل شاهد..
وبروحي واحساساتي..
ع الحب جيت أعاهد..
(يقترب منها).. أصل الجواز ده سنة..
وحيكون سر بينه.. على الضيق يدوب..
ادخل معاكي جنة.. ونكمل نص دينة..
ونجمع القلوب..
وصيفة 3:
خدنا الجواز في غاغة..
السلطة والبلاغة..
الأميرة :
وبدال مانروح لصاغة..
عكر دمي ومزاجي..
(لوصيفة٣) .. أنا ليه طاوعت غشك..
كات شورة زي وشك..
العميد:
..حلو وزي العسل.. وأنا المسئول يا فندم..
عن كل ما حصل.. ححل المسألة..
وبستأذن سموك.. دي ماهش مشكلة..
وصيفة 1:
الصبر يا أميرة.. الصعب في البداية..
بنرمي في الأساس.. ونعلى طوبة طوبة..
لسه طريقنا طويل.. ماوصلناش الخطوبة..
الأميرة:
ازاي اسكت وأصبر..
على شورتك يا أروبه؟!
وصيفة٢:
لازم نصبر عليه.. نستعجل بس ليه؟!..
أصل الجواز حكاية..
من بكره حتعرفيه..
وصيفة ٣:
زي مادقتي مراره..
دوقي الحلو اللي فيه..
حتعجبك حلاوته..
ورقته وشقاوته..
وتعيشي العمر ليه..
الأميرة: (بدلال)..
أنا رجعت في كلامي..
وبارفض أي عرض..
أبوحصيرة:
حلم سموك علينا..
مش قالوا الصبر طيب..
حنعمل ما ف طاقتنا..
وحتتعدل قريب..
الأميرة:
حتعمل إيه يا قلبي..
وانت مواطن ضعيف!!..
كل سلاحك دراعك..
وبتجري ورا الرغيف..
أبوحصيرة:
صبرك كمان شويه..
وانتي تشوفي مواهبي..
الأميرة:
طول بالي يا ربي..
أبوحصيرة:
أنا بانهل م الثقافة..
والعلم مالوش كبير..
قريب المتنبي..
ودانتي وشكسبير..
موهوب بإذن ربي..
وبتوفيقه البصير..
زي الموسيقي صوتي..
لغاتي عالميه..
في كل معني أفهم..
وبدرجة ميه ميه..
العميد: (ساخرا)..
بلاش تقول مواهبك..
سيب الموضوع عليه..
أبوحصيرة: (يكمل)..
أعرف أقول يا مرحب..
وأعرف أقول.. (برقة).. هالوه..
واكتب كلام مرتب..
واضحك م اللي يقولوه..
واتكلم في السياسة..
والحب اللي أغتالوه!!..
فاهم جاهز لكله..
مطلوب عند الكبار..
والكلمة بسن قلمي..
تخللي البور عمار..
ومن طبعي التواضع ..
وأموت أنا في الهزار..
وأشيل سلة في دراعي..
وأشتري الخضار..
العميد:
لكن قلت السياسة.. أمال فين الفراسة..
أمال فين الكياسة..
(للحرس).. خدوه على الرياسة..
(ينقض عليه الحرس).. يللا علي طول شيلوه..
أبوحصيرة:(لا يأخذ الأمر بجدية)..
طب مانا في الرياسة.. باعرض طلبي بسلاسة..
وليه بقي الغلاسة.. يا صاحب السيادة؟؟!..
العميد :(بصرامة)..
مافيش كلام زيادة.. الموضوع انتهي..
عنينا مفتحين.. أيوه.. مش نايمين..
صاحيين ومن سنين.. بنعمل مسح شامل..
والدور وقع عليك.. وليك ملف كامل..
مكتوب فيه النشاط.. اتفضل من سكات..
(للحرس).. يللا علي طول خدوه..
أبو حصيرة:(يتوسل فجأة)..
ماغلطتش في الأميرة..
ولا دستور الجزيرة..
ولا هيبتك الخطيره..
مظلوم يا سي العمبد..
العميد:
أخرس.. عليك شهود..
(في نفس اللحظة يتقدم شاهدان من كواليس المسرح، لم يكونا متواجدين في المشهد)..
ولكل شئ حدود..
أبو حصيرة: (يائسا)..
لجل تفوز بالأميرة.. بتحط لي السدود!!
وتحطني في قيود!!..
العميد:
حاشيلك من الوجود..
أبو حصيرة:
برئ.. برئ يا عالم.. برئ.. برئ يا هوه..
العميد: (للحرس)..
يللا على طول خدوه..
(يخرج أبو حصيرة من المسرح مقبوصا عليه، وفي نفس اللحظة يدخل السفير)
السفير: (للعميد بمغزي)..
قلبك مسامح.. ببطفح ع الدوام بحنان..
العميد:
عامل مثقف وأول من قرى الإعلان!!..
عابزني أبوسه؟!.. حدوسه..
السفير:
.. يتحسب انسان..
العميد :(بامتعاض)..
بند الثقافة أنا منه بقيت قرفان..
ماتقوللي أعمل له إيه؟..
إيه خطوتي التاليه؟!..
أفرض لهم ع المدارس مصروفات عالية؟؟..
زودنا سعر الكتب في السوق..
بقت غالية..
ورغم ذلك يجوعوا..
ويشتروا الجرنان!!..
السفير:
معقول تسيبه عشان يزعج أميرتنا!..
(يتعمد رفع صوته ليلفت نظرها)
العميد :
هيا السبب في انشغال بالنا وحيرتنا..
السفير:
ماحنا هنا وفين تلاقي زي جيرتنا..
العميد:
معقول تسيبنا وتتجوز فقير غلبان؟!..
الأميرة: (عاتبة)..
من حقي أنقي ومن بين الجميع أختار..
واللي يجيني هنا يبقي في اكرم دار..
(للعميد)..
مش تيجي تقبض عليه ..
ويروح كأنه ماكان!!..
العميد :
من قبل ما تغضبي أنا حشرح الموضوع..
أصل الحكاية ان ده فكر بصوت مسموع..
عامل مثقف وسقف ..
خش في الممنوع..
مشى في الطريق اللي بيروحه..
ماليهش رجوع..
فعملت واجبي..
قبضت عليه وانا زعلان ..

(يدخل حمدان - ابن البلد - إلي المسرح بزيه البلدي عن طريق صالة المسرح، ومعه مجموعة من أقرانه في حدود الأربعه يحملون العصي).
حمدان: (للأميرة)..
كسرت طوق وحدتي
في غربتي ومنفاي
مجروح وإنتي الطبيبه..
يا حبيبه جاي
جايلك وقلبي بيغلي
زي براد شاي..
الأميرة: (في ود)..
عيني عليك يا بطل..
حمدان: (في شكوى)..
مجروح وإنتي دواي..
عشتي ف خيالي السنين..
أنا والحنين وأساي..
الأميرة:
.. باين عليك الهوى!..
حمدان:
.. م العشق قلبي انكوى..
واللي قتلني هواي..
جايلك وشوقي اكتمل..
ونسيت همومي وراي..
الأميرة:
بتشوف معايا الأمل؟!..
حمدان:
بتثبتيلي خطاي..
الأميرة: (برقة)..
لو شفت نظرة رضا؟؟..
حمدان:..
راح تنتهي شكواي..
(يمد يده).. مديلي إيدك..
الأميرة:.. (تصافحه).. كده..
حمدان:..
يا سلوتي وليلاي
قصتنا في عصرنا..
حتكون نغم ع الناي..
(ينظر رئيس الشرطة إلي السفير
نظرات ذات مغذى)
السفير: (للعميد)..
ذوق الأميره تواضع!..
إحساسها بينا تراجع!..
العميد:..
يرتفع لسماي..
السفير:..
شبك الغرام قلبها..
وبقينا في الباي باي..
العميد: (غاضبا)..
ماتفضلوش عننا..
يخرج قوام من هنا..
السفير: (يلومه)..
وسمحتوا ليه ازاي؟!..
الأميرة: (لهما)..
عاشق وقال كلمته..
صرحلي بمحبته..
السفير: (ساخرا)..
شوف هيئته!.. شوف عمّته!!..
العميد: (يضحك)..
.. هأهاي..
ماعرفش ليه حبته..
وسابتني رغم غناي؟!
السفير:
وحتى من نظرته..
ممكن تجيبلي قضاي!
متخلفين ميت سنه..
عن عصرنا الهاي هاي
(يضحك)..
لهم نوادر كتيره
في البلد دي.. ياباي..
ده جده لما اتغنى..
جه واشتري الترماي..
(يضحكان أكثر، فينظر إليهما
حمدان نظرات شرسه)
حمدان: (يهجم على العميد)..
البيه بيشتم وفاهم إنّي مش قده!!..
الأميرة: (تحول بينهما)..
ماكانش قصده يا عمده..
سيب لنا ردّه..
السفير: (لحمدان وقد ابتعد خوفا)..
وراح تكون انت مين؟!..
العميد : (صائحا)..
مجنون وطالب موت!..
حمدان:
إنتو اللي جيتوا منين؟!..
بقى ضدّي متفقين؟!..
السفير: (وقد تشجع)..
سكوت يا إبني.. سكوت..
حمدان: (يتحفز للهجوم)..
ماتغوروا من سكّتي..
خلوا النهار ده يفوت!..
العميد:
لو زدت كلمة غلط
حنرجّعك في تابوت..
حمدان:
إنت اللي تعمل كده..
(يشهر عصاه)..
ليه ؟.. مامعايش نبّوت..
السفير :
ماتضيعوش وقتنا..
يخرج قوام من هنا..
العميد :
مغرور وطالب موت!..
حمدان : (يتحدى)..
حاخد حقوقي ويعلى ع الدوام صوتي..
ربي خلقني..
وإنتو ماتملكوش موتي
أنا حياة الجزيرة..
(للعميد).. وانت تعطل مسيره..
لكن عيونّا بصيره..
وعلى الدوام بنفوت..
وصيفة 1: (ناصحه)..
خلّيك في حالك وسيب الخلق في الملكوت..
حمدان:
.. حقه هنا زيّنا.. وإبه يزبد عنّنا؟!..
عاش في الرحم قدنا..
وعن قريب حيموت..
طول عمره ضايع..
ومين عمله بطل وزعيم؟!..
عشان يجيني النهارده مبتسم ووسيم..
ناكر وجودي.. ومستقوي ومستعظم..
الله أعظم.. ولا من فوق إرادته عظيم..
العميد :
ورغم أنفك أنا ما تلقى زيّي زي..
السفير:
وانا تمللي هنا رمز الأناقه الحي..
العميد : (يهدد)..
وانا اللي أغضب عليه ويروح..
يروح مش جي..
حمدان:
وانا اللي عرقي يروح للأرض يرويها..
حبيت عليها النهار..
وعشقت لياليها..
طلّعت منها الثمار في زرعها الأخضر..
أكل الشجاع والجبان واللي مابيقدّر..
ودراع يجيب الثمار ماتملكوله لي..
الأميرة:
إذا تملكوه حتلاقوه طالع في بكره الجي..
حمدان: (لهما)..
أنا مهما أشوف منكم شايل في قلبي حب..
ليه الأذى في طبعكم؟!..
يا ناس أنا زيكم!..
السفير : (مقاطعا)..
حتقول وليّه قلب؟!..
الحب حيسهرك.. أحسن تنام بدري..
العميد:
دا شئ سخيف ان اشوف قدرك مع قدري!
حمدان:
إنت زمانك مضى وبيبتدي فجري..
العميد :
الحكمه إنك تروح.. أحسن تروح فيها..
السفير:
لو كلمة جاتلك بلاش قدامنا تحكيها..
العميد:
واللي انت قلته حقول
انا كنت مش سامع..
حمدان:
.. اللي بحسه حقوله…
العميد : (يشير إلي الباب)..
بره في الواسع..
الأميرة: (لهما غاضبة)..
حيكون تطاول عليه..
وماتملكوش طرده..
بالرغم إنه سأل وماقلتلوش رده..
لكني راضيا عليه..
وحافظا ليه وده..
السفير:
إزاي ينول الرضا وحاله على قدّه..
الأميره:
قده كبير رغم إنه ملتزم حده..
هوا الأمل…
العميد :
…. إيه حصل؟!..
الأميرة :
… حتى على بعده..
مهما تمر السنين باقي على عهده..
(تستدعي أمين شئون القصر الذي
يحضر أمامها ومعه أوراق التسجيل)
يا أمين..
اكتب اسمه نمره واحد في اللي جونا..
قدرونا وشرفونا ونورونا..
الأمين:
اسمه مكتوب جنب اسمك يا حنونا..
الاميرة: (للأمين)..
يحضر المحروس يسلم بالسلامه..
الأميرة: (تصافحه)..
سبت جوّه القلب قبل الإيد علامه..
وصيفة 1:
شرفوا قبلك ولسه يجينا يامه..
وصيفة 2:
وانت بينهم كنت زينهم..
بالفتوه والشهامة ..
الأميرة: (مازالت تصافحه)..
يا مثال الجد والإخلاص
ورمز الإستقامة..
شفت ناس قبلك وسبت كتير ورايه..
والجدل قايم بعيد عنّي ومعايه..
حمدان:
.. واللي يكسب؟؟..
الأميرة: (ضاحكة)..
اللي يضحك في النهايه..
حمدان:
يبقى مين؟؟..
الأميرة:
اللي حتصادفه العنايه..
(يخرج حمدان ورفاقه، بينما تجلس
الأميرة بين وصيفاتها، ويبدأ العميد
والسفير حديثا جانبيا)
العميد : (يجفف عرقه)..
مخه أنشف م الحجر..
شوف تعبنا قد إيه!!..
السفير:
إنت ليه طولت بالك؟!..
ورّطه واقبض عليه!..
العميد :
إنت مسئول مش صغير..
كل شئ لازم يبرر..
طب حتقول التهمه إيه؟..
السفير:
التهم بزياده عندك..
بس دور في الجراب..
أي تهمه.. أي بلوه..
حتى جنحه ع الحساب..
العميد :
آنا أبحث عن مصيبه ؟!
دا هوّا نفسه بحاله بلوه..
ليه؟.. وزي مانت شايف..
الجدع ما أخدش غلوه..
السفير :
متخلفين.. ناس بقر..
جاي مصدق الخبر!..
العميد :
سُخن ومسلح بشومه..
والصحاب ويّاه حرس..
السفير :
صدقوا الإعلان وجونا..
كان طبيعي الكل يفهم..
إنه كان إعلان حكومه..
يعني كان إجراء روتيني..
أو تحايل ع القانون..
العميد :
والنصيب معروف طريقه..
مننا صاحب النصيب..
مش تلاقي الكل يطلب ..
رغم إنه كل مكسب..
السفير : (مقاطعا)..
ينقسم بينك وبيني..
العميد :
بس امتى يفهمونا..
حيّرونا ودوّخونا..
السفير :
نستريّح.. ياللا بينا..

(يتجهان إلي الأميرة ويقدمان التحية ويخرجان، بينما يدخل إسماعيل
عبد المعين من الباب الآخر، يحمل
في يده صحيفة، ويقدم نفسه للأميرة)
المدير:
إسماعين عبد المعين..
اللي غاوي واللي عاشق..
جاي وسهم الحب راشق..
طالب الإيد الشريفة..
والوظيفة..
مدير شئون العاملين..
كام سنة واطلع براءة..
والمؤهل.. الكفاءة..
علم كافي مالوش نظير ..
المؤهل كان صغير..
بس بينا صبح كبير..
إحنا لينا وضع خاص..
جيل محسّن م الأساس..
نعرفوا ف أي اختصاص..
كلّنا متفوقين..
والأساس يا هندسه..
إبتدا م المدرسه..
كنتي تلقي الفصل فاضي..
والمدرس زي قاضي..
عن حياته وعيشته راضي..
جيبه مليان بالفلوس ..
عمره ما يفكر يدوّر..
عن ولد يدّيه دروس..
الأميرة:
كل ده كان من سنين؟!..
المدير:
.. أيوه كان تعليم متين..
النهارده تلاقي بامه..
زحمه ولا يوم القيامه..
ده بيدرس في الطبيعه..
ده بيدرس في القانون..
ده طبيب أو ده مهندس..
بس فين العلم.. فين..
الأميرة:
المدارس ليها دورها..
يا اسماعين عبد المعين!..
المدير:
طب يا افندم هوّا فين؟؟..
كل واحد خد شهادته..
تسأليه إيه استفدته؟
ماتلاقيش إنسان رزين!..
راح يجاوبك من كتافه..
من حواجبه ومن خلافه..
لو رئيس الشرطه شافه..
يستحق اربع سنين..
الأميرة: (تضرب بيد علي الأخرى)..
يبقى ضاع العلم يا عبد المعين!..
المدير: (يحتج)..
لأ يا فندم..
حتلاقيه.. موجود وجاهز..
عندي.. في الجيل القديم..
(لنفسه)..
زيّي ماتلاقي
والدهن في العتاقي..
(يكمل)..
واحنا من فضله ونعيمه..
ع الإداره مسيطرين..
إللي وارد عندنا..
جيل جديد مش قدّنا..
لمّا ييجي ف يدّنا..
نصنعه على ذوقنا إحنا..
بالقدوم والمسطرين..
واحنا دايما منصفين..
الموظف ييجي خامه..
ماستفادش بعلمه يامه..
عندنا نلغي وجوده..
ويبتدي يعرف حدوده..
يبقي عبد للروتين..
(في نفس اللحظة يدخل مظلوم الدييهي، أحد موظفي الجهاز الإداري في الإمارة ، ومن مرؤسي المدير، عندما يري المدير يرتبك، وتسقط الصحيفة من يده، وبحاول العودة، ولكن المدير يتعرف عليه، ويحاصره)
المدير:
.. إنت مين؟!..
مظلوم أفندي!!..
ماتحاولش تزوغ وتهرب..
لأ تعالى يا ابني عندي..
كنت فاهم م البدايه
ان الحكايه تمرهندي؟!
والله صدقت فيك ظنوني.
إنت فين من بدري ضايع..
عندك استجواب قانوني..
قلت إيه بقى للمحقق؟؟..
إعترفت بكل تهمة..
واللا قلت كلام مزوّق..
مانا عارفك يا مراوغ..
مظلوم:
ياخي حسّن المقابله..
حتى رد سلامي قبله..
المدير:
العمل عطلان يا شاطر..
وانت واحد من التنابله..
مظلوم:
يا رئيسي إنت عارف
ان انا راجل شريف..
في العمل باتعب وباعرق..
لجل أحصل ع الرغيف..
المدير: (يقاطعه)..
القانون كان قلبه طيب..
انتهى زمن التسيب..
مظلوم:
لو سمحت اديني فرصه..
لمّا اخلصلك كلامي..
أفتكر فيه حد غيري..
أو بتغلط في الأسامي..
المدير :
إنت يا مظلوم أفندي.
زي إبني كنت عندي..
بس دي عهدة حكومه..
والقانون هوّا القانون..
مظلوم:
طبقوه والكل يفرح..
ع اللي يظلم أو يخون..
المدير: (غاضبا)..
انتبه واسمع يا شاطر..
كان لابد تتنى فاكر..
إللي ضاع منك يا ماكر..
عهده مش حتنشري..
شر ماعملتش حسابه..
يعني فَتَح السجن بابه..
واختاروك بالذات نقاوه..
تاكل العيش والحلاوه..
قلت إيه بقى يا حلاوه؟؟
مظلوم:
دا تعسف واضطهاد..
إنت يا خي ف كل شغلك..
سيف مسلط ع العباد!!
غاوي تخنقني بحبالك!..
زي مأكون خدت مالك!..
المدير:
.. يابني مالي تحت أمرك..
(يصمت)..
بس مش حتطوله عمرك..
آنا تايه عن مثالك..
أيوه خلي يكون في بالك..
قبل ما تضيّع أمالك..
إلزم الصدق ف جوابك..
والزم الحق ف سؤالك..
مظلوم:
.. ربنا ع المفتري..
المدير:
اللي ضاع خِتم الحكومه..
مظلوم:
..افترا وأكبر ظلومه..
المدير:
لأ زميلتك مش ملومه..
عهدتك يا عبقري..
مظلوم :
شوف سيادتك..
المدير: (مقاطعا)..
بس فالح..
بتهاجمنا بشكل كالح..
مانت لاقي حد صالح..
وانت خيبتك تنقري
مظلوم:
إنت فوق راسي ورئيسي..
وانا مش ممكن أزعل حضرتك..
هوّا سوء الفهم لكن..
الخلاف في الرأي وارد..
وانت من جيل الأماجد..
يعني أوامرك فرض وواجب..
هيّا العين تعلى عن الحاجب ؟!..
وانا كمان غلبان وف حالي..
والميّه ماتمشيش في العالي..
وانت عليت وعليت.. عقبالي..
بكره أجيك وارضيك وأصالحك..
المدير: (بجفاء)..
إنت سايب ليه مصالحك.؟!..
تفتكر دا يكون في صالحك؟!..
(للأميرة)..
مش في شغله.. تصوري!!
الأميره:
هوّا مين؟.. وإيه حكايته؟..
جي يخطب زي غيره..
في الحقيقه انا عارفه غايته..
بس بدّي اعرف بدايته..
واعرف إيه حتكون نهايته؟..
المدير:
ده بقى عندي موظف زي غيره..
إبتدا يخالف ضميره..
له حكايه شيّبت حتى الصغار..
باختصار.. كان صغار..
لسه يعني ماكانش عارف..
شال دروسه سلاح في إيده..
قصده يقهر العزول
ويروح يكيده..
راح يذاكر..
يملا راسه بالمعارف..
والمدارس بحر واسع..
يغرفوله بالمغارف..
وانتهى وخلص سنينه..
ولسه راح يرفع جبينه..
بالدعايه والغوايه..
قمنا جبناه من عرينه..
الأميره:
.. بالدعايه والغوايه؟!
المدير:
كل شئ معمول حسابه..
خدمه بمرتب أميري..
كل شهر وله ثوابه..
(لمظلوم)..
يبقى لو مالقيتش ميري..
تلقى قدامك ترابه..
(للأميرة)..
المثل مشهور يا فندم..
شعب غاوي ذكريات..
الأميره:
شئ بديع والمعنى قيّم..
المدير:
.. إحنا عايشين ع اللي فات!..
الأميره:
الدعايه شئ عظيم..
المدير:
وبكدا نضمن سكوته..
وان تذمر أو تحرر..
إحنا نملك حتّى موته..
الأميرة :
لو كلامه يعني موته..
يبقى مستقبل مهين..
المدير:
كل شيء مدروس يا فندم..
وبقانون العاملين..
الأميرة:
القانون ان شفته ظالم..
النهارده نعدّله..
واللا حتى نبدله..
مش نسيبه يهين موظف..
عندنا ويبهدله..
المدير:
كل شئ رهن بإرادتك..
والمشرّع برده قال..
واللي جه قدام سيادتك..
عندنا أسوأ مثال..
مظلوم: (لنفسه)..
كان ضروري تاخد جزاءك..
بس خايف ع العيال..
الأميرة:
يا اسماعين مظلوم مؤدب..
بس وضعه مش عاجبني!..
المدير :
زي ما يكون حيصاحبني..
واللا جاي ناوي يناسبني!!..
الأميرة:
شايفا شكله مش مرتب!!..
خايفه اروح النار بذنبه..
هوّا ليه من غير مرتب؟!..
المدير:
أوه..ده موظف درجه أولى..
راتبه كميات مهوله..
والحوافز والمنح..
غير العموله..
مظلوم:
دي من اختصاص سيادتك..
بند سري وانت عارف..
المدير:
تقصد ايه؟؟..
مظلوم:
.. العموله!! ..
المدير:
بس مين قال العموله؟..
(لمظلوم برفق)..
يا غبي دي بينا فوله..
لو بتفهم كان دا حالك!..
مظلوم:
أعمل إيه في قسمتي؟..
المدير:
جي ليه؟..
هنا مش مجالك..
مظلوم:
جاي آخد فرصتي..
المدير : (يدفعه)..
رُوح لحالك..
مظلوم:
مش حروح.. وانت مالك؟!..
المدير:
يا ابني إنت حرجتنا..
ومرفوض سؤالك..
مظلوم:
مين عطاك الحق ترفض أو توافق..
واحنا في الموضوع سوا..
مانت زيّي وانا زيّك..
واحنا لتنين في الهوا..
يعني إيه؟.. خصم وحكم!!
المدير: (يهدد)..
مش كده بالظبط لكن..
الخصومه حاله طارأه
واما نبقى في الديوان.
يلزمك دور الجبان..
أمّا انا أشتم بجرأه..
يوه.. إنت ليه توهتني.
قصدي اقول ان الإداره..
سيطره ومخ الإماره..
واللي بيمثلها ليه همه وجداره..
وإنت ليه دايما مبهدل..
زي تمثال للقذاره؟!..
حتى قلد مظهري..
مظلوم:
بانفرد على طول لحافي..
المدير:
ميت دينار مبلغ خرافي..
مظلوم:
في الغلاء ميكونش كافي..
المطالب فوق طاقتنا..
المدير:
واحنا ليه عايشين بنشكر؟
مظلوم:
إنت ليك راتب وراتب..
إللي ظاهر واللى خافي..
المدير:
ليه تعيش تحقد وتحسد..
انتظم في عمل إضافي..
واللا شاطر تمشي حافي..
وع القهاوي فنجري!!
مظلوم:
مانت عارف اللي باخده قد إيه!
المدير:
إللي زيك يحمده ويبوس إديه..
كل واحد له ماهيه..
تتبني عليها المهيه..
مين يجيب مظلوم أفندي جنب بيه!!
(يشير إلي صدره)..
لسه ماعرفتش بأن الناس مراتب؟!
إحنا يا بني في الإداره جامعه..
حاجه تعمل فرقعه..
اللي زيي باربعه..
واللي زيك إمعة..
مظلوم:
نستفيد بوجود سيادتك..
المدير:
حتنافقني زي عادتك!!..
مظلوم:
يا مديري يا هُمام..
مش نفاق.. اسمه احترام..
المدير:
بس شاطر في الكلام..
والعمل عندك قليل..
مظلوم: (يستعطفه)..
السماح طبع الكرام..
المدير:
لو عملت المستحيل..
مظلوم:
قصدنا يا زعيم نعيش..
سيبنا ناكل فول وعيش..
المدير:
لأ.. مافيش ..
إللي انا سمعته النهارده مايتنسيش..
وانا عنك كنت ساهي..
زي نايم كنت ومغمض عنيه..
مظلوم:
.. طب في إيه؟..
المدير :
تختلس!!.. تختلس!!..
إن ماكنت تنحبس..
تختلس وجاي تكابر..
جاي تخوض ويا الأكابر..
فين رئيسك المباشر..
لو بأفعالك دري..
مظلوم:
نحتكم ودا شيء بديهي..
نحتكم برده لدوسيهي..
اسمي مظلوم الدييهي
شوف دوسيهي..
حتلاقيه أبيض وناصع..
زي وشك الجميل..
المدير:
لأ طلبته كتير وشوفته..
مظلوم:
شفت إيه؟!
إلا ده أنا مش ناسيه..
صفحه بيضا وخدمة عال..
المدير:
شفت فيه بالخط الاحمر..
كام مخالفه ع الشمال..
واللا اقول لك.. مش حفسر..
مظلوم:
بس أشر..
أعرف الموضوع واصلح غلطتي..
المدير:
الحكايه كبيره وحسابك طويل..
وإحنا مش جايين هنا ننشر غسيل..
يا سقيل..
مظلوم:
.. قصدي أقول..
المدير:
.. إخرس.. كفايه!
إنت حتحقق معايه..
لسه فيه أشغال ورايا..
وانت واحد م الرعايا..
(يشير إلي الحرس)..
إمسكه يا عسكري..
(يمسك به بعض الحرس)
مظلوم: (يائسا)..
لجل صاحبة الجلاله..
جي بدري وعندي حاله..
عايز اقولها في عجاله..
وارجع اكتب محضري..
تمسكوني زي سارق..
واللا قاتل واللا حارق..
ماتسيبوني قوام حفارق..
خدت فوق الفقر قهر..
الأميرة: (للحرس)..
طب سيبوه بضمان وظيفته..
(يتركه الحرس)..
المدير:
حنسيبوه بضمان وظيفته..
من دوسيهه خلاص عرفته..
يستريح لو رفدته..
يتخصم له نص شهر..
(يخرج مظلوم أفندي مقهورا)..
الأميره: (للمدير)..
ليه عاقبته وكنت قاسي؟!
المدير:
يستحق يعيش يقاسي..
أصله تاه عن الأصول..
حط راسه جنب راسي..
زي انا مابقول يقول!..
لمّا اقول له أي كلمه..
بتشوفيه يزعق قصادي..
ياما علمته ولكن..
"لا حياة لمن تنادي"
إلتزم.. جامل رئيسك..
تضمن الفوز والوصول..
.. كنا نرتاح لو ماجاش..
عكر الصفو وكلامنا في بدايته..
مانتهاش..
الأميرة:
مانت خدت الوقت كله..
لسه حاجه ماقلتهاش؟!
المدير:
قلت يامه وباقي ردك؟؟..
الأميره:
.. لو مصمم تعرفه..
المدير: (مقاطعا)..
.. لأ.. لأ بلاش..
المهم اسمع جوابك..
قبل ماطلع ع المعاش..
(يخرج، بينما يدخل آخر، يحمل
في يده صحيفه، ويقدم نفسه)

رابح:
اسمي رابح..
جي ممثل للتجاره..
والشطاره والمهاره..
هم راكب فوق دماغكم..
حتى مش حنزاح بغاره..
شغلتي وطول عمري فالح..
إنت تخسر.. هوّا يخسر..
كله يخسر..
عمري ما عرفت الخساره..
اسمي رمز للمكافح..
إبتديت وبكل همه..
في السنين المدلهمه..
والقدر كان في انتظاري..
طرت من قمّه لقمّه..
إلتقيت الحظ جاري..
سبت ذمه وجبت ذمه..
قالوا اسم على مسمى..
وابتدت تجري الفلوس..
والفلوس نعمه ومنّه..
نشكر الرب الودود..
الحياه قدامنا جنّه..
والوجود من غير حدود..
زيد يا ربي كمان رصيدي..
مال في جيبي..
وشيك في إيدي..
الأميرة: (تقاطعه)..
زي ما تكون جاي وناوي..
تشترينا بالفلوس!..
مره تغري.. دور تلمح..
لجل قال بعقولنا تسرح!..
تقصد إيه؟!.. قول وصرح..
رابح:
جاي لكم شاري وغاوي..
ورصيدي ثروتي..
الأميرة:
لو حتعمل حتى حاوي..
مش حتلقى محبتي..
رابح:
الرضا والقرب منك..
كل أملي في دنيتي..
والفلوس هيّا الوسيله..
سكه للغايه النبيله..
الأميرة:
.. حتاخدنا بالديباجه..
الفلوس مش كل حاجه..
رابح:
الفلوس روحي وحياتي..
جنبها بسهر ليلاتي..
جمعها عندي هوايه..
يا هَوَايه..
وصيفة 1:
بس صبحت ليك غوايه..
ضيّعت حسن النوايا..
رابح:
بالفلوس أبلغ منايا..
تمشي كل الناس ورايا..
حبها بيجري ف وريدي..
الأميرة:
لمّا تخسر حتى نفسك..
إيه يفيد المال يا سيدي!..
رابح:
نفسي عندي مش كفايه..
الفلوس هي البدايه والنهايه..
عندها باعزف نشيدي..
قبلها انا كنت مهمل..
لو حضرت ماحد يسأل..
فيّه ويقدر وجودي..
لمّا جت بقت لي حاشيه..
فين ما اروح حواليّه ماشيه..
زي هارون الرشيدي..
اندهست وجيبي خالي..
واتنصفت بحر مالي..
فرق ببن حالي.. وحالي..
درس منه تستفيدي..
وصيفة 2:
يبقى تفريق في المعامله..
فضلوا إنسان بماله..
وصيفة 3:
الغني مطلوق يمينه..
الغلط بالمال يزينه..
والفقير مستضعفينه..
كل من يقدر يهينه..
رابح:
يقطع الفقر وسنينه..
واللي يخبز من عجينه..
يقطع الفقر وبلاه..
أما شفت سنين معاه..
الأميرة :
فقر إيه؟.. فينك وفينه..
فيه بلاد بينك وبينه..
لسه فاكر اللي كان..
مانت سيبته من زمان..
وصيفة 1:
مستحيل يقدر يطولك..
حتى لو يركب حصان..
وصيفة 2:
برده ليه تأثير في فكرك..
(للأميرة)..
كان من المفروض نساه!..
رابح:
من عمايله معايه.. ياه..
أما شفت معاه سنين معاه..
الأميرة:
شوف يا رابح..
برده رابح؟؟
رابح:
اسمي رابح.. اسمي كاسح..
كلها أحلى الأسامي..
بس إوعي تقولي عني..
زي بعض الناس حرامي..
الأميرة:
وانت بتقدملي نفسك..
إبتديت لغة الغنى..
واشتكيت من الفقر برده..
إنت ليه توهتنا؟!..
إنت ليه ضللتنا؟!..
جاي تخوفنا بكلامك..
واللا تكسب ودنا..
وصيفة 3:
إحنا ممكن نعرفك..
لو تحدد موقفك..
رابح: (بفخر)..
الحقيقة إن رابح..
اللي كان طول عمره ناجح..
اللي جه وشرف جنابك..
عنده كام قصة كفاح..
كلهم وبدون تفاخر..
كانوا رحله للنجاح..
في البدايه..
السياسه كانت هوايه..
والتجاره كانت في راسي..
الأميرة:
بس إيه دخل السياسه..
في المكاسب والمآسي؟!..
رابح:
زي أي زعيم مخضرم..
عشت كام تنظيم سياسي..
مرتبط بتاريخ بلدنا..
هوّا ده واجبي الأساسي..
عشت كام تنظيم سياسي..
اللي ينحل ابقى اسيبه..
وف غيره نأسسوا
واكلين من خير بلدنا..
وعايشين بنميسوا..
وف كل زفه كنا
دايرين بنهيصوا..
لما كسبنا الكتير..
وبقيت اهه مليونير ..
الأميرة:
وجاي تقول ان انت فاضل..
أو زعيم بين الأفاضل..
وصيفة 1:
دا اللي فاضل..
يا مناضل..
رابح:
.. بالرغم انّي مناضل..
وحقيقي منتمي..
لكن للي يهاجمني..
أنا ببقي جهنمي..
الأميرة: (ساخره)..
واضح إنّك مناضل..
ونضالك ملحمي..
رابح:
عادي مابنساش مصالحي..
واعمل اللي يكون في صالحي..
الأميرة:
لمّا فكّرت ف مصالحك..
خدت أسلوب ابتزازي..
رابح: (باستهانه)..
بعضهم قال انتهازي!!
بس دول عاجزين يا فندم..
في البلد مالهمش دور..
غير يهاجموا كل ناجح..
الوطن كان بيه فخور..
وصيفة 2:
قول وعلمنا يا خبرة..
إحكي لمحة من حياتك ..
واحنا ناخد منها عبرة..
الأميرة:
قد إيه كانت مفيده..
رحلة المال السعيده؟..
وصيفة 3:
رحلة المال الرشيده؟؟..
الأميرة:
عايزه رأيك؟.. وبصراحه..
رابح:
عرفنا طعم الراحه..
و ركبنا التمساحه..
دَخّنّا الكينج..
وطرنا في البوينج..
بنينا الأبراج..
وسكّنا المحتاج..
صاحبنا الأكابر..
ودخلنا المنابر..
مسكنا المكروفونات..
وبقينا بشوات..
(يتنهد بارتياح).. هيه..
حقول لك إيه واللا إيه..
(لنفسه)..
كنا في جره وطلعنا لبره..
الأميرة:
والنهارده إنت مين..
وصيفة 1:
لو تكون غيرت جلدك..
تبقى راجل مش أمين..
الأميرة:
إنت مين؟؟!..
رابح: (في غرور)..
تاجر استيراد متين..
حسبتي بالملايين..
صوري ماليا الجرانين..
شهرتي من فين لفين..
الأميرة:
انطباع عنّك في بالي..
إنت راجل رأسمالي؟..
رابح:
أيوه طبعا رأسمالي..
ودول كتير..
نوع طفيلي.. ونوع جبان..
مستحيل يعمل عمايلي..
ونوع بيطلع في العلالي..
آنا م الصنف الأخير..
وصيفة 2:
يامجير!!..
رابح:
تاجر استيراد كبير..
قالوا عني مليونير..
بس اقولك..
خللي سري يكون في بير..
مليونير دي مش كفايه..
الحكايه..
إن دخلي من مداخلي مايتحسبش..
وصيفة 3: (بدهشة)..
حاجه أكبر م الحساب؟!..
الأميرة:
إنت تخضع للعقاب!!..
فوق كده مطلوب تفسر..
جبتهم من أي باب؟!..
رابح؛
بس انا من كام سنه فوق القانون..
الأميرة:
تبقى إيه؟!.. ومين تكون؟!..
رابح:
شاب عصري ركب الموجه وسبح..
لما قال افتح وفتحوا..
كل شئ عندي انفتح. .
الذكاء.. حسن التصرف..
إتصالي حتى بضعاف النفوس..
كل ده بيجيب فلوس..
والفلوس بتجيب فلوس..
واحنا ليه نتعب؟!..
(للأميرة بغزل)..
مانيجي نطلب ايد أجمل عروس..
قلتي إيه؟..
الأميرة:
لأ يابيه..
اللي يطلبني لابد اسأل عليه..
رابح:
ما احنا قلنا السر كله..
وكشفنا المداريه..
لسه برده محناش الناس اللي هيه..
وصيفة 1:
الغريبه اللبس عصري..
بس لغتك بربريه..
الأميرة:
على العموم مش دي القضيه..
رابح: (للأميرة)..
قلتي إيه يا نور عنيه؟..
الأميرة:
انتظر.. صبرك عليّه..
رابح:
داحنا سلطه تشريعيه..
كل أفكارنا لبلدنا..
نخدمه من غير مهيّه..
الأميرة : (ساخرة)..
ليه..ما تقبض م التكيه!..
رابح:
مبسوطين والرب عاطي..
عمري ماستنيت مناصب..
بالخصوص التنفيذية..
بس كله تحت باطي..
عندي جيش يخدم بأجره..
الأميرة:
لازم اختارته بعنايه؟..
رابح:
برده فيه عالي وواطي..
الأميرة: (محتجه)..
لما تسرق كل خبره..
تبقى بتجمد نشاطي..
رابح:
في الزمان ده يا أميره..
كله عند المال يطاطي..
والحقيقه انا مش مقصر..
للي يخدم في بلاطي..
الأميره:
مستحيل.. دي مؤامره شامله..
ثروتي هنا أيدي عامله!..
وصيفة 2:
ماتخافيش..
لسه فيه ورديّه كامله..
رابح:
دول سايبهم احتياطي..
الأميرة: (غاضبه)..
باختصار.. وبدون مجامله..
إنت مش حتناسبني..
يبقى روح للمال وسيبني..
رابح:
لأ حناسبك..
الأميرة:
حتناسبني!!.. إيه غاصبني؟!..
(لنفسها)..
دا كله بالخناق إلا ده بالاتفاق!!
رابح:
الهوى قادر وجابني..
الأميرة:
واللي نابني؟!..
مش حتقدر تغتصبني!!
روح يا إبني..
في الهوى إبني قصور بأساس متين..
رابح :
فكري.. ثروتي..
سلطان نفوذي.. مظهري..
تحت أمرك.. بس إنتي تأمري..
وانا اقول أمين..
الأميرة:
مهما كان مهري توافق؟..
رابح:
لو طلبتي المستحيل..
(بغزل)..
حتى لو قدمت عمري..
للجميل يبقى قليل..
الأميرة: (بمرح)..
سيبنا من عمرك وعمري..
مهري تتبرع بمالك..
يبقى كله تحت أمري..
واهنا بالعمر الطويل..
رابح:
الطلب ده جه فجائي..
إغتصاب.. موقف عدائي!!
الأميرة:
هوا ده طلبي النهائي..
رابح: (بتوسل)..
واما اقدملك رجائي.
تطلبي الشئ البديل..
وصيفة 3:
إنت مشكلتك في مالك..
واضح انه مش حلالك..
رابح:
مش حلالي؟!!..
بالعرق والجهد جالي..
وصيفة 1:
لما زادت بيك آمالك..
شفت مال الناس حلالك..
وصيفة 2:
خدت منه ما بدالك..
الأميرة:
أما بفلوسك بخيل!!..
رابح :
لو سمحتي أنا تحت أمرك..
حرضى بالطلب البديل..
الأميرة:
لما تتبرع بمالك..
مش حشوف إنسان مثالك..
وصيفة 3:
تبتدي إنسان نبيل..
تبقى طاهر بالدليل..
رابح: (غاضبا)..
رأي مش مقبول يا شابه!!..
فكره ماهش مستحبه..
صعبه وهزارك تقيل..
مش حكون للناس سبيل..
وصيفة 1:
جاي تخطب الأميره..
ادفع المال يا أصيل..
رابح:
كنت جاي أخطب.. يجوز..
بس أقولك ع الحقيقة..
خطتي كانت جريئه ..
كنت طامع في المعالي والنفوذ..
عادي والدنيا منافع..
والذكاء قدام أميرتي..
إنكشف وماعادش نافع..
في النهايه طلعت كوز!!..
أبتسم وافرد قلوعي..
تتهم صنفي ونوعي!!..
(وهو يتأهب للخروج)..
طب متستنوش رجوعي..
عمري ما اتعودت أبدا..
الجميل يضربلي بوز..
(يخرج)..
الأميرة:
ماستريحش لحسابنا..
والنتيجه.. خرج وسابنا!
وصيفة 1:
إللي زيه كتير عليه..
إنه يظهر عند بابنا..
وصيفة 2:
بكره يرجع تاني لجل سواد عنيكي..
وصيفة 3:
والحقيقه ان المواطن كان شاريكي..
بس غير رأيه لما سمع طلبنا..
الأميرة: (بتأثر)..
كنا عايشين في هنا وخلو بال..
مين قلب حالنا وخلا البخت مال؟!
لأ.. أكيد فيه شيء غلط..
ربما حلول الوسط..
ربما برده التطرف..
لليمين أو للشمال..
خلوا حالنا فوق احتمالنا..
ببن تسيب وارتجال..
والفضيله بقت قليله..
بينكو يا ولاد الحلال!!..
اللي رابح واللي خاسر..
واللي مأسور واللي آسر..
كل واحد م اللي جونا..
هّوا وبذاته مثال!..
مجتمع وعرفنا داؤه..
هل صحيح نملك دواؤه؟!..
فيه أمل تاني في شفاؤه..
دا السؤال؟؟!
وصيفة 1: (تواسيها)..
شئ طبيعي يجينا ناس على كل لون..
اللي طامع.. واللي راغب..
واللي شايلك في العيون..
واحنا نتحمل غلطهم..
كله لجلك راح يهون ..
وصيفة 2:
بس يا سمو الأميره..
النظام ده مش عاجبنا..
رغم إنه في البدايه..
من اقتراحنا وبسببنا..
وصيفة 3:
مين حضر للقصر زارنا؟
واللا إيه حيكون قرارنا؟..
وصيفة 1:
ولا مين كان حيناسبنا؟..
وصيفة 2:
كل ده لازم يسجل..
ينكتب فورا في محضر..
وصيفة 3:
هّوا يعني العقل دفتر!!
الأميرة:
يا أمين القصر احضر..
(يتقدم ويقف أمام الأميرة)..
(للأمين)..
ممكن اعرف اللي جونا كام؟..
ومين؟؟..
الأمين:
كلهم عندي.. بإيدي مكتوبين..
أسئلتهم أو ردودهم..
الانصراف.. لحظة وجودهم..
وحسب تاريخ ورودهم..
في الجداول مثبوتين..
الأميرة :
الأمين من صنف نادر..
قام بشغله من سكات..
كل شئ كاتب وحاسب..
كمبيوتر معلومات..
وصيفة 1:
اتحاصرنا بالشباب..
وان ماكنش حد ناسبك..
نفتحوا من تاني باب..
برده دول مش كل شعبك..
الوصيفات:
لجل تبقى الفرصه كامله..
والجميع ياخد مكان..
نبتعد عن المجامله..
ونفتح الدايره كمان..
الأميرة:
إقتراح يمكن يفيدنا..
هو ده نهاية الكلام..
(يلتففن حولها، ويهمسن في أذنها،
وهي تبتسم وتحرك رأسها دليلا
على الموافقه)..
بلغوا الخبر الإذاعه..
تعلنه ع الشعب كله..
بدري وف حفله مذاعه..
الوصيفات:
تأمري واحنا معاكي..
كلّنا سمعا وطاعه..
(يخرجن جميعا من المسرح، وبعد
لحظات تدخل المذيعه وفي يدها
ميكرفون، وفي الأخري ورقة
وتبدأ في قراءة البيان وكأنها
تخاطب الجمهور)
المذيعة:
سيداتي.. آنساتي.. سادتي..
كل عام والشعب طيب..
كل عام وانتم بخير..
حظي أقابلكو بموده..
في الميعاد ده..
والنهارده..
وكل يوم زي النهارده..
عيد سعيد..
يحتفل بيه المواطن..
القريب والبعيد..
الإماره ازينت في توب جديد..
شايفه كل الناس بتضحك..
كل بيت عايش في عيد..
يوم تاريخي جينا نفرح بيه سوا..
فتره م البث المباشر..
نبقى فيها ع الهوا..
مره نمرح.. مره نفرح..
لو حقيقي ظروفنا تسمح..
والفرح للاكتئاب هّوا الدوا..
واما يوصل الاكتئاب..
والحياه تصبح عذاب..
ضهرنا للحيط وشايف..
إن قدامك سراب!..
لم تنده صوت يجيلك..
في الصدا أصوات كلاب..
يبتدي دور الإذاعه..
واحنا برنامج أمين..
واللي يوصلنا بشجاعه..
ننقله للسماعين..
واللي عندي بيان أميري!!
إختاروني..
ماختاروش ليه حد غيري..
والبيان ده رغم طوله..
لما أقوله..
راح تكونوا مبسوطين ..
رغم إنه والسلام..
إنشا ومجرد كلام..
قصدنا يعني الثقافه..
وانتو مش ناقصين علام..
إحنا بنمارس سياده..
لا أقل ولا زياده..
والكلام وشبعنا منه..
قلنا يامه وقلتوا أكتر..
تقدروا تستغنوا عنّه..
وانا برده مش حكتر..
ماشي يا ولاد العرب!!..
اللي يخطب الأميره..
بالصريح يكتب طلب..
والطلب مشفوع بدمغه..
و بشهادة حسن سير..
و بشهادة حسن سمعه..
مسأله سهله وبسيطه..
مافتكرش فيه ممانعه..
الطوابع تشتريها.. (ببساطه)..
مش مهم يا سيدي عشوه..
والشهاده ازاي تيجبها.. (تفكر)..
مسأله تحتاج لرشوه..
واللي حيكمل دوسيهه..
عند باب دار الإماره..
يبقى ييجي بعد جمعه..
يبقى ييجي بعد جمعه..
ستار

الفصل الثالث
المنظر:
قاعة الاجتماعات في القصر الأميري، القاعة تستعد لاستقبال الموكب الأميري، الحرس والحجاب يأخذون أماكنهم، رجال الإعلام في ترقب واستعداد.
مندوب الصحافة: (للصحفيين)..
ضروري الصحافة تكون في الصداره..
تفيد المواطن وتشبع فضوله..
وتدّي الإجابه عن الأسئله..
دا يومي ويومكم..
وكل اهتمامي أشوف اهتمامكم..
(ولو حد قصّر حلومه والومكم..
وإوعوا الإذاعه تشكل منافسه..
صحفي 1: (للمندوب)..
دي قايمه طويله..
(يلوح بالأسئلة)..
لو الوقت ضيّق؟!..
المندوب:
ما فيش مشكله..
تجاوب بنفسك..
وخليك تملّي تسأل تجاوب.
تجاوب وتسأل..
لو الرد غامض..
ما فيش حد يفهم..
مافيش حد يزعل..
ومكسبنا نملا الورق بالكلام..
وخلّيك هُمام..
وخليك لبق..
صحفي 2: (للمندوب)..
ممكن تفيدنا وتضرب مثال..؟!
المندوب:
قول الله أعلم..
دا موضوع جواز..
وخللي جوابك بتعبير مجاز..
وجايز وممكن..
وبافرض ويمكن..
وعندي احتمال..
وأما مؤكد ده تعبير محدّد..
مافيش له مجال..
ماينفعش أبدا إجابة سؤال..
المذيعة: (لنفسها حالمه)..
وحخطفها منهم على بساط حرير..
واخدها أمانه ف سمانا واطير..
وأعمل معاها حوار في الأثير..
ويشهد علينا القمر والنجوم..
لو الجو رايق مافيش فيه غيوم..
وأعرف طلبها واسمع جوابها..
واشيل من حسابها القلق والهموم..
دي خطه بديعه..
أحقق في شغلي مكاسب سريعه..
وفرصه تخليني أشهر مذيعه..
وأكبر مقام..
ونرجع نقول ع الصحافه السلام..
دي مهنة كلام..
بنعمل معاها مداعبه طريفه..
وتدخل في باب المنافسه الشريفه..
الحاجب: (يشعر بقدوم الموكب
الأميري، فيعلن عن ذلك)
هلت الأنوار علينا..
حاجه تشرح النفوس..
اهتفوا وسموا وصلوا..
وزغرطوا لأجمل عروس..
(تُسمع زغاريد)..
كله يتبسم ويضحك..
ينطرد برّه العبوس..
(تدخل الأميرة المسرح في ثوب عروس،
بين وصيفاتها وحاشيتها، في جو من الغناء والزغاريد والفرح)
الحاشية: (للأميرة)..
م الفرحه احلوت دنيتنا..
وعشانك جايين من بيتنا..
بنبارك ونهني..
بشموعك نورتي ليلتنا..
وفرشتي الورد في سكتنا ..
وجت الفرحه بطرحه زارتنا..
وبقى الكل يغني..
ليلا جميلا ونور على نور..
وصباح نادي وكله سرور..
يدوم علينا ..
وتحلى لينا ..
ونشوف إدينا تحضن إدينا..
والفرح يملا كل المدينه..
ونمشي دايما بين الزهور..
الأميرة: (تشير بيديها في شتى
الاتجاهات، فيتوقف الغناء تدريجيا )
أحيي الإماره واحيي الجميع ..
في شعبي العظيم الودود المطيع..
وقف جنبي دايما في كل الظروف..
وانا قلبي ساعكم وبيحيي باعكم..
في ساعة رضاكم..
في ساعة عطاكم..
في ساعة عملكم بتشكيل بديع..
أحيي الإماره وأحيي الجميع ..
لو اختار مابينكم راح احتار ما بينكم..
جميلكم ودينكم في قلبي الوديع..
أحيّي الإماره واحيّي الجميع..
لشعب الإماره حقول كلمتي..
وحاعلن هنا ع الجميع رغبتي..
ومين اللي حينول شرف خطبتي..
وبينكم حيظهر..
بمظهر وجوهر..
مؤكد حييجي يعدّي الصفوف..
وياخد بإيدي بهمّه ومهاره..
بدون أي رهبه بدون أي خوف..
صحفي 1: (بحسد)..
نشوف الخطيب.. وصاحب النصيب..
ونتأكد انّه إنسان مناسب..
الأميرة:
حتعرف كده في الميعاد المناسب..
(يلتف الإعلاميون حول الأميرة، بالأوراق وأجهزة التسجيل وأجهزة التصوير، ويسألون ولا يعطون لها فرصه للرد)
صحفي 2:
سمو الأميره تصرح بإسمه..
وتوصف ملامحه وشكله ورسمه..
صحفي 3:
ونعمل ريبورتاج معاه قبل كتب الكتاب ..
صحفي 1:
ومين اللي كان السبب في وصوله..
وفتح له باب؟!..
صحفي 2:
وطوله وعرضه وتاريخ الولاده..
ومكان الميلاد؟..
صحفي 3:
وصورته معاكي تكون للغلاف..
المندوب:
عرفنا اختيارك.. حقيقي موفق..
ما فيش اختلاف..
(تدفعه المذيعة ، وتسأل الأميرة،
ولا تعطيها فرصه للرد)
المذيعة :
لازم يا فندم خطيبك مهندم..
مسمسم وشيك..
وجيتي النهارده بتوب الفرح..
أكيد اختيارك لإنسان خيالي..
وفارس رومانسي..
نسيت بس نفسي..
نسيب الخصوصي..
نروح للأهم..
ظروف التعارف وإزاي حصل..
وناخد مثل من غرام الملوك..
لجمهور شبابنا عشان يرشده..
حيعلى بذوقه.. ويعرف طريقه..
وحيقلده.. وده يسعده..
صحفي 2: (للأميرة)..
عرفته يا فندم بلمحة ذكاء..
ثقافه وهمّه وعلم ووفاء..
في طبعه استقامه ..
في شكله وسامه ..
وأما عن الأصل.. قول.. لا ملامه..
المذيعة : (لصحفي 2)
وضح كلامك.. وبين علامه..
صحفي 2:
صمام الأمان..
وحارس عموم البيوت والحارات..
صحفي 1:
نشوفه بعنينا.. يسلم علينا..
ويلمس إدينا..
صحفي 2:
بطل فوق حصانه..
وزعيم مش أونطه..
ومالي مكانه..
وفوق اسمه شَرْطَه..
(يدخل صاحب الشرطه، وفي يده
الملف الذي يعني طلبه ليد الأميرة)
وصاحب معالي.. وشايفه قبالي..
سيادته المكرم..
(يصيح).. رئيس أعلى شرطه..
العميد: (للأميرة بغزل)..
يا زهرة تمر حنّه..
كوني مطمئنّه..
الأمن في بلدنا..
مافيش فيه أي إنّه..
شيلي الناس من حسابك..
وفكري في شبابك..
أنا قمت بكل واجب..
من غير مااتعب جنابك
وجايلك النهارده..
جاهز أكتب كتابك..
مافيش أعمال ورايه..
وادي الدوسيه معايا ..
الأميرة: (تقاطعه)..
الأمن مش كفايه..
العدل برضه غايه..
العميد:
العدل ساد وكامل..
بقى ف بلدنا شامل..
عاقبنا المتحامل..
وكافئنا المجامل..
جوّا بطون الحوامل..
خوّفنا الأجنّه..
الأميرة:
بقى بعد تاريخنا كله..
والمجد والعراقه..
تنسى معنى التعاون..
والحب والصداقه..
وتركز ع التشدد..
وبتقولها بصفاقه..
كان قصدي وانت منهم..
تبني بينهم علاقه..
كنّا استفدنا أكتر..
وما احتجناش يا عنتر..
لا سيف ولا بندقيه!!..
العميد:
أنا وفيت لك بعهدي..
وادّيتك كل جهدي..
ماقصرتش في واجب..
وبقيت قد التحدي..
يمكن أعيش لوحدي..
لو زودناها سنّه..
الأميرة: (لنفسها)..
إحنا افترضنا فيك..
إحساس بالمسؤلية ..
لكن عميت عنيك..
وبيحسبوك عليه..
(للعميد)..
سايباك واخد براحك..
شاهر دايما سلاحك..
(ساخره)..
ودا مش معقول يا شاطر..
ولا ده دليل نجاحك..
العميد:
مخلص من كل قلبي..
لازم أأدي واجبي..
وماليش في الحكم غايه..
غير بس في النهايه..
أكسب وأفوز بمنّه..
(يقف في مواجهة الأميرة في وضع إنتباه، وملفه في يده، تماما كدبلوماسي يقدم أوراق اعتماده لرئيس دولة، قد يحدث تغير في الأماكن أثناء الأداء المسرحي والاستعراضات، لكن يعود الوضع
إلي النظام المتبع لحظة تسليم الدوسيه
للأميره، التي تسلمه بدورها لأمين شئون القصر، وينسحب هذا النظام على
الشخصيات التاليه في مثل هذا الموقف)
الأميرة: (تتسلم الدوسيه)..
استنى حييجي دورك..
وحننظر في أمورك..
العميد:
أستبشر يا أميره..
واحلم أحلام عريس؟؟..
الأميرة:
استعجلت البدايه..
والعبره بالختام..
حتقف آخر طابورك..
وحننظر في أمورك..
(ينتظر في عمق المسرح)
صحفي 2: (للأميرة ويشير إلي العميد)..
مافيش حد غيره وأحسن ما فيهم..
سابوله الحكايه.. وفيه الكفايه..
(يشير إلي الجمهور)
وحتى اسأليهم..
الأميرة: (لصحفي 2)..
بدأت القصيده بفكره غلط!.
بتعمل مكيده.. ومخك ظلط..
وعامل معلم.. وعمال تنجم..
بلاش الخيابه وبطل عبط..
صحفي 1: (للأميرة ويشير إلي العميد)..
عرفناه يا فندم.. بنستبعده..
(يشير إلي صحفي 2)..
وأما صاحبنا.. اللي مخه تاعبنا..
فدا من واجبنا اننا نرشده..
وراح من دماغنا اللي كان يقصده..
صحفي 2: (للأميرة)..
مجرد توقع..
وحاجه فرضها علي الذكاء..
دي جت فكره عارضه..
وانا بعتذرلك إذا كنتي رافضه..
صحفي 1: (للأميرة)..
صحافة معارضة!!
بيلوي الحقايق.. وقابض ورايق..
و م الصبح فايق..
وشخص اللي كان رشحه..
نرفضه..
صحفي 2:
مالوش في الصحافه..
و لا في الكنافة..
بيملا كلامه بإنشا وسخافه..
ومعروف بإنه مغرور وفاضي..
مثال للتخلف..
دا من عصر ماضي ..
صحفي 1:
مايعرفش أبسط أصول المعامله..
مالوش في المجامله..
وأمي صحافه..
خريج قوه عامله..
دي كانت مؤامره علينا وتمت..
ترشح نمرن وبعدين نعين..
كان الأولى يفتح له دكان مزين..
ومحسوب علينا..
مَهِي المهنه لمت!!
صحفي 2:
بشرفي لابد اشتكيك في النقابه..
و أكشف صلاتك بناس مشبوهين..
صحفي 1:
تهاجم وتشكي.. وبعدين بتبكي..
وبتبان كأنك في آخر طيابه..
مَهِي الدنيا غابه..
الأميرة: (تصيح غاضبة)..
سكوت يا صحافة آخر الزمان!!
كفايه تطاول.. كفايه امتهان..
خسرتوا الحقيقه .. وخسرتوا الرهان..
المندوب: (لهما موبخا)..
غلطم وفيه احترام للأميره..
وقبله يكون احترام للمكان..
سماح يا أميره..
ودول ناس جُداد..
ولسه يا دوب مكتوبين بالرصاص..
غلابه على شط بحر الصحافه..
وبحر الصحافه عليهم غميق..
وانا باسمهم باعتذرلك خلاص..
الأميرة : (غاضبة)..
تمادوا وزادوا.. وقالوا وعادوا..
وعكروا الصفو في المهرجان..
أسامح كمان؟!..
المندوب:
يا فندم دي فرحه وكان فال سعيد..
لكل الإماره ويوم مفترج..
نهني نفوسنا ونلبس جديد..
ومن بعد ضيقه جانا الفرج..
(يسترسل)..
حنجيب المأذون..
وندي أجازه للقانون..
ونفتح السجون..
ونفرج عن كل مسجون..
المجرمين..
والمسجونين السياسيين..
اللي كانوا منسيين!!..
كله ف فرحنا لازم يشارك..
وييجي لدار الإماره يبارك..
الأميرة:
نسيب القانون!!
دا يبقى جنون!!.
المندوب:
مافيش فيه قانون ولا يحزنون..
سيادة الأميره سيادة القانون..
وحتى ف فرحنا..
حنعزف موسيقى بكمان مش قانون..
الأميرة:
إنت النهارده كلامك غريب!!..
بتعمللي حفله بترتيب عجيب!..
ولسه فرحنا مانعرفش وقته..
وماحددناهوش.

ويمكن كلامك ودقة نظامك..
تروح ع الفشوش..
المندوب : (بثقة)..
مافيش عندي كلمه..
إلا لازم تصيب..
الأميرة :
حتنسجلي قصه!!..
إذا كنت لسه مابانليش حبيب..
المندوب:
حييجي الخطيب الحسيب النسيب..
ماشفتش مثاله بعيد أو قريب!..
معلي علمنا وفارض سلامنا..
وناظر بعينه وكاشف أمامنا..
بقوة سلاحه ننول احترامنا..
حامي حمانا ف ظروف مستحيله..
وكاسر بصبره الدراع الطويله..
بيحمي حدوده وفارض وجوده..
ولو حد هاجمه يزيد عن حدوده..
الأميرة:
ماعرفش حد بالوصف ده..
دا من خيالك.. ومتأكده..
المندوب:
شفته بعنيه وما علي ملامه..
" أسد علي وفي الحروب نعامه“
فارس زمانه وأمره مطاع..
ومالي مكانه وقائد شجاع..
(يخطب)..
كأنه علم في رأسه علم..
إذا هجم ع الأعادي استسلموا وعموا..
قد قال حسادنا وبئس ما زعموا..
اتعلموا وافهموا كل الشعوب فهموا..
" يا أمة ضحكت من جهلها الأمم"..
ودا حقد طبعا..
وجايز إفترا وخداع..
عايشين في عالم بيغلي..
بين حروب وصراع..
(يرى المهيب داخلا)..
شايفين أملنا ف بطلنا..
خطير وخط دفاع..
حاسين معاه بالنجاه..
والرأي ليه إجماع..
المهيب: (يتقدم وفي يده الدوسيه،
ويقف في مواجهة الأميرة)
(للأميرة)..
كل إخلاصي وحبّي..
إنتي عارفه مالوش حدود ..
دا الوجود من غير وجودك ..
يا أميره مالوش وجود..
سبت قلبي معاكي دايما..
أما عيني على الحدود..
(يبكي فجأة)..
يبقى ليه بتعذبيني..
وقسمتي منك صدود..
حسّي بيه.. إنصفيني..
حتى لو بالروح أجود..
واللا علشان انّي بارد..
اتعديتي بالبرود..
الأميرة : (ضاحكة)..
مش غريبه يكون برودك..
وانت سلطان البارود!..
المهيب:
فين مكاني يا أميرة؟..
أعرفه عندك وأعود..
الأميرة :
لجل ماتبهدلش لبسك..
إتركن جنب العامود..
(يسلم ملفه للأميرة، ويذهب
حيث أشارت، ويقف)
المندوب: (يشير إلى المهيب)..
فارس كامل في زيّه..
ودايما ملتزم..
ما تلقيش حد زيّه..
وعمره ما ينهزم..
الأميرة: (للمندوب موبخة)..
بتبنوا الخرافه.. وتتكلموا..
ومن قبل حتى ما تفهموا!..
واشوف كل واحد بياخده حماسه..
ويركبلي راسه..
يرشحلي واحد محدد مقامه..
وفاهم نظامه..
وبيقول كلامه الغلط من أساسه..
ولما أحاسب بتتندموا!!..
ما تتعلموا!!..
(يبتعد المندوب خجلا، بينما تتقدم المذيعه
إلي الأميرة وتسألها، وتقدم لها الميكرفون وتسترده دون أن تعطيها فرصة للرد)
المذيعة:
سمو الاميرة.. الإذاعة معاكي..
على موجه هاديه.. وشعبك وراكي..
مفتح ودانه عشان يسمعك..
يشوف اختيارك ..
ويعرف قرارك..
دا شعبك يعزك..
وجالك لدارك..
يشوف اختيارك وصل عند مين؟؟
ومين اللي راح يبقى م المحظوظين؟؟
يا بخته الليلادي وما أسعده..
كل الشباب ده راح يحسده..
وشعبك مقدر وفاهم وواعي..
وانا واجبي احضر له إنجاز إذاعي..
يبقى سكوتك مالوش أي داعي!!..
نقولها بصراحه..
ونسمع معاكي الكلام المفيد..
بلاش يا أميرة حياء العذارى..
وإن كان تمللي هنا مستحب..
فأنا بالنيابه أحيي الأميره..
وانا بالنيابه أحيي الأدب..
وانا بالنيابه أفضل أجاوب..
لأني عرفته بسرعة بديهه..
الأميرة: (ساخرة)..
واضح ذكائك.. وإنك نبيهه!!..
المذيعة :
وحيد في الشياكه..
فريد في الجمال..
مافيش حد شافه إلا ومال!!..
برقه يعامل.. وناعم وكامل..
رقيق العواطف.. ودايما يلاطف..
ودايما يجامل..
وهوّا النموذج.. وهوّا المثال..
(يدخل السفير يحمل حقيبة دبلوماسية، ويقف بالقرب من الأميرة، ويخاطب المذيعة)
السفير: (للمذيعة)..
أكيد تقصديني..
وأعلنتي رأيك بصدق وشجاعه..
سمعت الخبر من بعيد في الإذاعه!..
تأكدت إنك في غاية البراعه..
رقيقه وشِعرِك جميل زي شَعرِك..
ومن ربع ساعه هنا بتوصفيني..
وبتقدميني..
كأني قصادك وبتكلميني..
فجابني نداكي.. وجابني حنيني..
المذيعة :
رقيق زي مانتا..
ومدهش يا إنتا..
وهادي وزي الحمل في الوداعه..
الأميرة: (لنفسها)..
دي واقعه في حُبّه!!..
وإيه العمل؟!..
وباين شعورها.. موضح أمورها..
ومن غير خجل!!..
مايقسمش ليّه.. ويحرم عليّه..
(للمذيعة)..
أنا باتنازلك ومبروك عليكي..
حتتهني بيه.. ويتهني بيكي ..
(تضع يد كل منهما في يد الآخر)..
عريس شيك وبيه..
وبيه بهاديكي..
المذيعة:
طب ازاي دا يحصل؟!..
دا راجل شاريكي!!
الأميرة: (في حزم)..
أنا بتنازلك.. ماحدش شريكي..
المهيب: (للسفير ويقلده ساخرا)..
جود مورنينج..
العميد: (يقلده شامتا)..
فيري جود نايت..
السفير: (لهما وقد ذهبت رقته)..
يا نهار أهاليكم مش فايت!!
كل دا يحصل.. تفرحوا فيّه..
وبتتغامزوا بنكته عليّه!!..
اللتنين هبل وأغبيه!!..
كده.. على كيفكم..
هه.. أورايت..
برده انا والله طلعت بحاجه..
بنت جميله .. عروسه ألاجه..
وانتو حتاخدوا م إيه؟!.. ولا حاجه..
واقفين زي الأكل البايت!!
الحاجب:
ولفض الإشتباك.. ببن الساده الملاك..
نعلن عن وصول القارئ الأمجد..
والمثقف الأوحد.. أحد خطاب الأميره..
(يصيح).. الشاعر أبو حصيره..
(يدخل أبو حصيره بمظهره المعروف والموصوف سلفا، يحمل كتبه والدوسيه المطلوب، ويتفحص المكان فلا ينتبه
لوجود صاحب الشرطة، فيتشجع
ويقترب من الأميرة)
أبو حصيرة:
أتيتك أمدح كالعاده..
وأبوس أياديكي البيضاء
وأقدم شعري بزياده..
حتى لو ضاع الشعر هباء..
(بغزل)..
من مثلك يا قمري غاده..
تمثال الحسن بكل بهاء..
أتيت بعزم وإراده..
أقتنص الحسن من البلهاء..
أنا لست كغيري يا ساده..
أختال بعنتظزة وغباء..
أختال بفن ورياده..
في كل مجالات الإنشاء..
(يلمح صاحب الشرطة الذي بهدده
بالإشارة فيرتبك)
ن.. ن….نشفتم ريقي يا ساده..
أفمن يعطيني شربة ماء…
الأميرة:
شكرا.. نعتز بشاعرنا..
في زمن يهزأ بالشعراء..
قد قلت بما أثلج صدري…
ويقول خصومك محض هراء..
(تشير)..
فلترجع للخلف وتجلس..
تفترش صحائفك الصفراء..
(يسلم الدوسيه، ويجلس فوق كتبه
حيث أشارت)
الحاجب:
ودلوقت جه دور ممثل الفلاحين الصناديد..
في الوجه البحري والصعيد..
ابن البلد العتيد..
مانتو عارفينه من زمان..
(يصيح)..
الزعيم أبو حمدان..
(يدخل أبو حمدان وفي يده ملف أوراقه،
ويتجه إلي الأميرة)
حمدان:
يا جميله وناعمه خالص..
يا فطيره مشلتته..
قاعده في العز عايمه..
ونايمه ومتستته..
سايباني لوحدي دايخ..
وبقيت م الهم سايخ..
حتقولي عليه بايخ..
ماعرفش الا كده..
الأميرة:
بابحث عنك تمللي..
وتعبت من الندا..
حمدان:
خديني تحت إيدك..
يمكن في يوم أفيدك..
روحي الله يزيدك..
منصورة على العِدَا..
الأميرة:
أنا حطّاك تحت رمشي..
حمدان:
يرضي المحبوب مانامشي..
طب عديني أمّا أمشي..
يمكن ملفوف في نعشي..
وهاتيلي معدّده..
الأميرة:
إسمالله على الحليوه..
حمدان ابن البلد..
شفتك خدتك نقاوه..
وبحبّك للأبد..
يا راجل سيب ظنونك..
معقول قلبي يخونك؟!
طب مين امال يصونك..
الله يكون في عونك..
شايلينك للمدد..
حمدان:
سدوا البيبان في وشّي..
مالقيتش اتعشي طُرشي
والمش ما اتوجد..
وبياكلوا حلاوه طازه..
وجاتوه آخر لزازه..
والمزّه والقزازه..
يوعدهم بالهدد
المذيعة: (تغني فجأه)..
"ياكلوا حلاوه.. ياكلوا جاتوه..
ياكلو كل اللي يحبوه"..
الأميرة:
مفتوح لك بدري بابي..
في حضوري وف غيابي..
وف تشكيلنا النيابي..
حنزود العدد..
حمدان: (يضحك)..
مبسوط من قلبي آنهْ..
الأميرة:
نورت الدار حدانه..
حمدان:
أقدر دلوقت أروّح؟..
الأميرة:
خليك هنا أمانه..
نتشرف بالعمد..
(يسلم الدوسيه للأميرة،
وينتظر في عمق المسرح)
الحاجب:
والآن وكما هو وارد في الرول..
المدون في الكنترول..
تستقبل القاعه.. في هذه الساعه..
المكافح العظيم..
الذى لا يملك ولا مليم..
الرجل النباتي بالاضطرار..
ولا فخار..
الذي يأكل العيش الحاف..
وسلاحه في مواجهة الظلم والإجحاف..
قلمه الجاف.. أفكاره مقلوبه..
وعواطفه مشبوبه..
وإذا فرغ قلمه غيّر الأنبوبه..
فهو لا يملك تمن القلم..
في زمن الغلاء..
وربنا يكفينا شر البلاء. .
كان من الضروري..
أن أقدّم له بمثل هذا المنظوم..
فهو البائس المحروم..
شهيد الإماره..
وأهم ترس في عجلة الإداره..
الرجل المهموم..
(يصيح)..
الأستاذ مظلوم..
(يدخل مظلوم على هيئته التي ظهر
بها من قبل، يحمل الدوسيه وينظر
في شتى الاتجاهات في خوف
فتشير له الأميرة بالاقتراب)
صحفي 1: (لمظلوم)..
انتبه.. فتّح عنيك.. الأميره بتناديك..
مظلوم:
يا صديقي أنا برده شايف..
بس انا مرعوب وخايف..
انصدم تاني برئيسي..
صحفي 2:
حد قدّام الأميره يخشي..
واحد م الرعيّه..
المندوب:
إنت حتكون في الحمايه..
عمر ما تطولك أذيّه..
مظلوم:
ما تأزيت وبذنب غيري..
وانا جاي صاحي النوبادي..
واللي مكوي من مديري..
ييجي ينفخ في الزبادي..
صحفي 1:
الشجاعه شيء جميل..
مظلوم:
الجبان عمره طويل!!..
واحنا خدنا الجبن..
لينا شعار رئيسي! ..
الأميرة:
إنت في قصر الأميره..
مش في مكتب حضرته..
مظلوم:
مهما غيرت في طريقي..
التقيني في سكته..
وانا جاي لمحت عنيّه..
بدله تشبه بدلته..
في الحقيقه كنت حرجع..
بس قلت اعمل فدائي..
الأميرة:
مش ضروري يكون رئيسك ..
التعارف يا مواطن.
بالملامح والصفات..
والطبيعي تشوف ملامحه..
واللا تلمح خلقته..
يبقى موضوع لو موظف..
جه مغير بدلته..
تطردوه أو تمنعوه..
يثبت حضوره بإمضته!!
مظلوم:
من يغير بدلته؟؟!..
يجهلوه في قلب بيته..
ويجهلوه في حتته..
بدلته من روحه أبقي..
دا السعيد منّا اللي يلقي..
هدمه تستر جتته..
تبقي قدام المعارف..
من معالم جثته..
و رئيسي الله يسامحه..
مش ضروري اشوف ملامحه..
أعرفه من بدلته..
إحنا في قلم الوظايف..
كل واحد عنده طقم..
ساكنه دايما.. صيف شتا..
زي رسمي وغير موحد..
المندوب: (صائحا)..
وحدوه…
مظلوم: (بخشوع)..
لا إله إلا الله..
الأميرة:
ياخي افهم..
وحدوا الزي الوظيفي..
تبقي ظاهره ملفته!..
إقتصاد.. ترشيد..
كويس يا موظف با أصيل! ..
حتي لو حتعيش مفلس..
راضي وشعورك نبيل..
المندوب:
كلنا نحيي المواطن..
انفرد بشعور حضاري..
لسه فيه عنده انتماء..
حاله خاصه للولاءإ..
مظلوم:
أشكرك ودا فضل منك..
بس ده وضع اضطراري..
واحنا راضيين بالقضاء..
ربنا يخفف علينا..
والعشم في الله كبير..
الأميرة:
في الحقيقه إنّك مثالي..
إترسم وضعك في بالي..
مظلوم:
راضي بالمقسوم يا فندم..
بس لو يرضوا الحبايب..
طب رضيت بالسخره أخدم..
فوق كده أدفع ضرايب؟!..
الأميرة: (مندهشة)..
مين يقول تدفع ضرايب؟!..
إنت عندي تستحق..
أعلى نسبه في الذكاه..
مش تدافع عن حقوقك..
في الحقيقه إنت خايب!..
مظلوم:
لأ يا فندم..
رأيي مش مطلوب..
عشان الخصم مني..
كل ده إجراء..
بيحصل غصب عني..
والبنود يامه.. تعدي؟!
اللي رسمي واللي ودّي..
ده ضرايب.. ده معاش..
ده حنعمل حفله بكره..
للي طالع ع المعاش!!..
ودي قفله جات في غفله مع رئيسي..
الجميع هنا بيعارضني..
ويطاردني..
زي مأكون لص في مسلسل بوليسي..
أمضي ع المكتوب وآجي أستلم..
مالقاش فلوسي!!..
الأميرة : (متأثرة)..
إنت وضعك مش كويس..
وانا حاتصرف وأكتب..
مظلوم: (سعيدا و يتأهب للجري)..
أجري ع المأذون يا فندم؟؟
الأميرة:
لأ.. بقول لك..
إني حاكتب باللي قلته مذكره..
مظلوم: (وقد أحبط)..
كنت فاهم إن حان كتب الكتاب..
الأميرة: (مداعبه)..
لسه بدري يا سكره..
(يسلم الدوسيه للأميرة وينتظر في عمق المسرح، بينما يدخل رجل مندفعا، في ثباب رثه، يحمل أغراضه الخاصه في جوال أو خرج، وفي يده الدوسيه، ويتجه إلي الأميرة، ويخاطب الجميع)
الشحات :
كملت الأوراق بالزور..
لفيت يامه و جسمي اتهدم..
لجل اتقدم والحق دور..
شفت الموضوع زي مسابقه ..
فيه ناس رايحه..
وفيه ناس سابقه ..
قلت أما الحق دور في طابور..
لفيت يامه وآدي ملفي..
نضف جيبي ونضف كفي..
حيوفي المطلوب ويكفي..
وانا يا ناس عبد المأمور..
ماستخسرتش ممتلكاتي..
كل فلوسي وكل حياتي..
أغلى ماعندي يا بلدياتي..
وان قصرت أكون معذور..
مانا ياهوه راجل علي قدّي..
قد ماباخد.. قد مابدّي..
يعني تقول على طول بالبلدي..
زي بقيت الناس مقهور..
بس كمان باقي على عهدي..
لفيت يامه ووفيت وعدي..
حضرت الأوراق مختومه..
زي ماقلتوا تمام يا حكومه..
أنا وفرت الوقت لصالحي..
وحضرت في ساعتي المعلومه..
صحفي 1: (ينظر إليه من أعلى لأسفل مشمئزا)..
شرفت ونورنا ظهورك..
تقصد إيه يا همام بحضورك؟!..
الشحات:
أنا طالب الحلوه دهيه..
(يشير إلي الأميرة فيفاجئون)
مالكم كده واقفين حواليه!!..
يقدر حد يقول مش ليّه؟!
دنا اقوم ع الدنيا قيامه..
وأخدها واخرج بسلامه..
كان قصدكو أعجز واتخازل..
واللا في يوم عن حقي اتنازل!!
العبوا غيرها.. كفايه مهازل..
مش حتكون للغير مقسومه..
صحفي2:
تطلع مين والنبي بسلامتك..
داخل فارد رافع قامتك..
الشحات :
الشحات شحته الشحات..
صحفي 1:
شكل اللبس محدد قيمتك..
حتهز العالم بوسامتك..
الشحات:
كنت يا إبني كبير في زماني..
زي الباشا ومالي مكاني..
على أيامكو الكل نساني..
يعني الحظ تركني وفات..
بس حيرجع يتبسملي..
لما الحلوه دهه تقسملي..
الأميرة:
قوللي وظيفتك إيه بالذات؟!..
الشحات :
على حالي وراجل متسول..
يعني كده شحات متجول..
صحفي 1:
كان ناقص تفتح دكان!!..
المندوب: (باحتقار)..
طب مش كنت تقول م الأول..
داخل تستعرض وتهول..
وبتفترض ان انت الأول..
وانت بتشحت في الطرقات!!
صحفي2 : (بضجر)..
اللي بنصبح فيه بنبات..
أما صحيح اللي اختشي مات..
الشحات : (بثقة)..
ماله الشحات بقى يا حبيبي؟..
حنشوف جيبك ونشوف جيبي..
ناقص إيد أو ناقص رجل؟!..
(يشير إلى السماء ويقبل ظهر يده)
كله تمام والفضل لسيدك..
وانا قدامك زي العجل..
الأميرة :
واضح لنا إن انت خساره..
تقدر تدي كتير بجداره..
لكن لو شفناك في الحاره..
مش راح تسلم م العاهات..
الشحات:
ده تمثيل.. والشغل مهاره..
واللي بيتقن شغله شطاره..
أنا راح اقولك سر المهنه..
ممكن فجأه اتحول كُهنه..
واما بشوف الخلق اتلموا..
بدّعي إني انصبت في غاره..
واني مريض طول الأوقات..
حاجه بناخد منها مكاسب..
حرفه عظيمه وشغل مناسب..
وانا على فكره جاي أناسب..
أنا باتحدى بكل ثبات.
الأميرة: (موبخة)..
وبتاكل عيشك من كدبك؟!..
مين حيعاملك؟!..مين حيناسبك؟!
مظلوم: (يقترب منه)..
دور على نصابه تناسبك..
أو توب بقى عن قولة هات..
الشحات:
مش معقول إنك تتكلم..
دنا علشانك عشت أتألم..
حتقوللي مهندس ومعلم..
لو تشحت تكسب ألوفات..
دوس على شغلك وارمي وسلم..
وتعالى نلف الطرقات..
حالك يصعب ع الأموات..
مظلوم:
غور من هنا دي وظيفه شريفه..
الشحات :
لكن ما معاك ولا تعريفه..
(يمد له يده)
إيدي في إيدك..
مظلوم: (يبتعد)..
شغله سخيفه..
الشحات:
لكن تبني لنا العمارات..
صحفي 3:
حيشد الراجل لضلاله!!
صحفي 1: (لصحفي 3)..
إنت تطول تعمل في مجاله؟!..
المندوب:
والنبي ماسمعتش إيه قاله؟!..
إختار المظلوم لغوايته..
صحفي 2:
فاهم وضعه ودارس حالته..
صحفي 3:
الراجل دفيان ومدكن..
في الميادين تلاقيه يتمسكن..
المندوب:
ياخد قوت الناس بسذاجه..
رغم يا عيني الناس محتاجه!.
صحفي 1:
ماحنا يا روحي شعب حنين..
صحفي 2:
وجاي هنا بدري عشان يتمكن..
صحفي 3:
يكسب ويزود أمواله..
ياخد ويكوش لعياله..
المندوب:
ده مولود والدته دعياله..
الأميرة : (للشحات)
حكتب اسمك في الخطاب..
بس ضروري تغير عملك..
الشحات:
يعني انا حعمل إيه؟!..
حطاب؟!
صحفي 1: (للشحات)..
ربنا ياخي يخيب أملك..
الشحات: (للصحفيين)..
يعني عليه بقيتوا صحاب!!
الأميرة:
أيوه تشوفلك شغله شريفه..
الشحات:
طيب اعمل إيه؟!.. يعني أسرق؟!
واللا أشيل علي ضهري وأعرق..
آخد برد..
دنا عيان..
متبصيش للطول والعرض..
(يخرج جميع مواهبه في تصنع واختلاق العاهات، فيبدو أعمي مرة، وأعرج مرة
ثانية، ومقعد ثالثة، و……..)
مش معقول تتمني ان اتعب!!
عايزه تجيبي دماغي الأرض؟!..
تكسبي إيه؟!..
مش حتحمل قسوة قلبك..
دا انتي أميره..
وانا بالذات راح اموت من حبك..
وحكونلك الزوج المخلص..
فاضي وقاضي ودايما جنبك..
الأميرة:
المقصود..
الشحات: (مقاطعا)..
المقصود ان أكون باكسب..
وانا مولود رزقي ومبسوط..
اللي يجيبه فريق في يومين..
آنا اجيبه لوحدي ف ثانيه..
(بفخر)..
دنا شحات أبا عن جدا..
والشحات له نص الدنيا..
العميد: (للأميرة)..
ممكن نلقي القبض عليه؟
الشحات: (بثبات)..
أيوه يا باشا بتهمة إيه؟!
العميد:
راح نعملك جنحه تسول..
الشحات:
حد يقول ان انا متسول؟!..
العميد:
إنت بنفسك وادي شهود..
(يشير إلي الجمهور)..
الشحات:
كنت بهزر..
ممنوع يعني ان افتح بقي..
لو أتكلم واللا اتنفس..
يا نصيبه دقي!!..
كنت بهزر ودا من حقي..
باخزي العين..
لجل اضمن رزقي..
إنت شايفني بضيع وقتي..
جاي دلوقتي تقول متسول..
حاجه غريبه.. (لنفسه)..
جاتكم خيبه وستين ويبه..
تدوم وتطول..
(للعميد)..
سيبك م الموضوع ده.. وحول..
العميد:
برده مسيرك تيجي في إيدي..
الشحات:
لمّا نعيش..
إبقي امسكني يا شيخ متلبس..
واما أجيلك.. إشفي غليلك..
بس حترجع تفرج عني..
ياما وقعنا يا سيدي في ضيقه..
حاجه بتبقى لزوم الشغل..
أو تحسبها متاعب مهنه..
(بود).. وبرده وجودك بيطمني..
العميد:
بكره تجيني يا ويلك مني..
الشحات:
إنت حاططني ليه في دماغك؟!..
قلبك أبيض..
واضح إنك مقموص مني..
تقصد بين الخلق تهيني!
الأميرة: (للعميد)..
روح في مكانك..
(يتحرك ببطء فينفعل الشحات)
الشحات:
إبعد عني.. حاجه تجنن!
إبعد عني.. انا مش مطمن..
جاي لجوازه..
راح يقلبها سيادته جنازه..
أفتح راسي يا ناس بقزازه!!..
واللا بمطوه قرن غزال..
وارجع أرمي بلايا عليه..
كل دا ليه؟!..
إبعد عني.. يا سيدنا البيه..
إبعد عني أنا مش قدك..
(لنفسه).. داهيه تهدك..
صحفي 1:
شوف ياخي الراجل وعمايله!
صحفي 2:
هوّا كمان عمال بيحاور!
صحفي 3:
وشاغلنا بكلام متناقض..
مره مكسح.. مره فتوه..
ساعه مريش.. ساعه فقير..
المندوب:
جاي بيناور واهي محاوله..
صحفي 1:
يمكن تمشي وياخد الجوله..
المندوب:
هوا دا برده كلام يتقال!!..
الشحات: (للأميرة بغزل)..
نفسي اسمع ردك يا غزال..
الأميرة : (بجفاء)..
بطل بقى من دا الموال!!
الشحات:
ممكن أسأل حتى سؤال؟..
الأميرة :
معروف طلبك..
ومافيش داعي ان انت تكمل..
الشحات:
فاتح قلبي وقاصد خير..
أنا مش زي الغير بتجمل..
العفو ان خاني التعبير..
والمفروض اننا نتأهل..
يبقى كافحنا وربنا عوض..
أنا م الزملا جاي مُفوض..
الأميرة :
سيب لنا ورقك وانت اتوكل..
الشحات:
آدي ملفي أهه.. يا مسهل..
(يسلمها الملف، ويتظاهر بالخروج،
ثم يندس بين المنتظرين، بينما يدخل
الشاب مجدي يحمل في يده ملف
أوراقه ويتجه إلي الأميرة)
مجدي :
خريج م الجامعه بقالي زمان..
مش لاقي الفرصه ف أي مكان..
عديت..
لفيت ومشيت وجريت..
ورجعت بقلب كسير حيران..
وعشان كده..
جايلك يا أميره..
أشواقي وأحلامي كبيره..
إن القى فى قربك كل أمان..
خديني لبّرك.. رسيني..
أنا أملي كبير ماتصديني..
الحسبه ماجاتش معايا تمام..
كل الأحلام صبحت أوهام..
أنا ضعت صحيح..
مش بس كلام..
أنا واقع وانتي اتلقيني..
أنا جيتلك بملفي المطلوب..
كان عندي مصوغ تعييني..
كل المرغوب عندك مكتوب..
وجميع طلباتك على عيني..
الأميرة:
ماتزيدش في موضوعك..
قصر..
صادق وكلامك بيأثر..
ومادمت بتشكي وتتحسر..
لو تطلب أنا أمدلك ايدي
مجدي: (سعيدا)..
أهو دا المعقول..
أهو دا المأمول..
الأميرة:
واستني معاك.. راضيا وشارياك..
مجدي :
أنا فرحان.. من فضلك عيدي!!
الأميرة:
أنا عايزاك تحفظ مواعيدي..
وبإيدك تصنع يوم عيدي..
برده انت شباب..
بحماس غلاب..
وبنيت في قصور..
وقريت في كتاب..
وتعبت وجِيتنا لحد الباب..
نرسملك خط وتمشي عليه..
ونشوف يا حبيبي حتعمل إيه..
يابو دم خفيف..
ياللي اسمك إيه؟!..
مجدي :
خدّامك مجدي المتأني..
قدامك بمواهبي وفني..
إديني الفرصه واستنّي..
وضروري قريب راح تتهنّي..
مقبوله وسنك من سني..
وانا جاهز من كله وراضي..
ويدوبك بس الجيب فاضي..
ومافيش في القلب إلا هواكي..
واهو باللي معايا ومعاكي..
نعلن أفراحنا ونغني..
المهيب: (يقترب بخطوات منتظمة)..
يا واد انت اتفضل شوف عيشك..
يا داوشنا بعبطك وبطيشك..
إدخل في جدل مع ناس قدك..
واعرف قدرك والزم حدك..
(يشير إلي العميد)..
أدي واحد أهه في مقام جدك!..
العميد:
تتحدى أبوك.. (يشير إلى المهيب)..
بقى ده اسمه سلوك؟!..
المهيب:
وياريت على كده قضيت جيشك..
تتجوز مين إنت يا كتكوت..
طب مين امال ع الجبهه يموت!!
ويضحي عشانا ويبقى شهيد!!
العميد:
مطلوب تجنيد..
يا تسلم لنا يا تروح في حديد..
(يجذبه)..
خليك جنبنا.. ماتروحش بعيد..
مش تهرب وتدوخنا عليك!..
ودي فرصه ألاقيك..
عصفور في الإيد..
مجدي:
غلطان يا عميد..
ماسمحش تزيد..
بانت خطاياك..
تفضح نواياك..
وكشفت ملفك بالتأكيد..
أنا أصلي معاف..
اكمني وحيد ..
وشهادة المعافاه في دوسيهي..
(يرفع الدوسيه)..
السفير:
طالب تعيين.؟!
(يشير إلي الباب)..
اتفضل من فضلك مشكور..
استنى حييجي عليك الدور..
مجدي :
المسأله حتطول لسه؟؟..
السفير:
أبدا.. ويدوبك بس سنين ..
ترتاح يا حبيبي من التعليم..
والقاف والميم..
وقعود وقيام..
واضرب تعظيم..
مستعجل ليه؟!..
صح انت غشيم!!.
وحتاخد كام؟!.. اسأل مظلوم..
ياخي دانت شباب..
اصبر يا جميل..
العمر قصادك لسه طويل..
مجدي :
ويضيع في فراغ؟!..
السفير :
بلا قلب دماغ..
بطل تهويل!..
روح اسهر واللا العب كوره..
وان كنت مصمم تبقى عظيم..
هاجر في بلاد المعموره..
حتشيل وتلم..
وحيفرحوا بيك أولاد العم..
وحتبقى خبير..
إنما عندنا مهما تقول لنا..
عمرنا بنبوغك ماحنهتم..
العميد:
صدقت يا عم؟!..
اسكت.. اتلم..
مجدي:
أنا جاي من بدري بقلب جرئ..
(يشير إلي الأميرة)..
لجل اطلب إيد الأموره..
السفير:
غلطان يا جرئ..
ومالكش طريق..
أهي دي الأفكار المحظوره..
حتروح هنا فين انت يا مسكين؟!..
الأمر خطير!..
لا انت المقصود ..
ولا خدت وعود..
ولا إنت أمير..
والناس قدامك في الطوابير..
فيهم بشوات.. فيهم طراطير..
والوضع بحاله نظامه غموض..
ولا نعرف حتى لدلوقتي..
مين المقبول؟.. مين المرفوض؟!..
حيكون إيه الرأي المفروض؟!..
ولا إمتى حتتضح الصوره؟!..
مجدي: (بتحدي)
عارف الموضوع بحاله..
ومتابعكو ف كل قصه ..
كلكم طالبين إيديها..
بس لسه الحسبه نافصه..
إحنا مستقبل بلدنا..
طب يا ناس ادّونا فرصه..
واعرفوا قيمة الشباب..
افتحوله أي باب..
إنتو خدتوا كل ميزه..
واختصرتوا الأمر بينكم..
في مزايده وف مناقصه..
لمّا عايزين تحرمونا..
أو غرضكو تضيعونا..
كنتو ليه بتعلمونا..
واللا ليه تدّونا رخصه؟!..
أبو حصيره: (يقفز مصححا)..
ماسمهاش رخصه يا إبني!!..
دي شهاده..
بيها حتشق الطريق..
تشتغل يعلى مقامك..
يبقى ليك بيها بريق..
إعتمد على النفس وابدأ..
خللي ليك في الدنيا مبدأ..
عمر يوم ما تضيع وتغرق..
خد كلامي كلام صديق. .
واحفظه وارجع إليه..
لو سمحت الإسم إيه؟..
لجل نبقى أصدقاء..
إحنا تجمعنا الثقافه..
وانا من طبعي الوفاء..
مجدي:
اسمي مجدي واللا حمدي..
واللا تامر واللا وجدي..
مش مهم الإسم إيه؟!..
المهم اللي باقيلي..
زي جيلي..
إني متخرج وعاطل!..
واللي أبيض شفته أسود..
واللي صح بشوفه باطل..
لجل متخرج وعاطل..
والحكومه تقول نعين..
تاني يوم ترجع تماطل!
طب نروح فين بشهاداتنا؟!..
دبرونا يا أفاضل؟!..
المندوب:
إنت يا بني.. (لا يلتفت إليه)
إنت يا بني..
يا تاعبني يا بو لسانين..
(ينتبه له)
انتظرنا انك تفيدنا..
واللا من علمك تزيدنا..
جيت تاخدنا في حبتين..
زي ما تكون بتعاندنا..
طب يا ريت فيه شئ في إيدنا..
كنا عيناك أمين..
لجل تهدا وتستكين..
عيب تكون ناقم وثاير..
والحكايه في كلمتين..
خدت من بلدك شهاده..
إنت لو عندك إراده..
راح تشوف الشغل فين..
واللي أبيض يبقي أبيض..
واللي صح تشوفه زين..
مش تجينا نعينك..
ونسكنك ونمكنك..
يا تبات حزين!!..
مجدي:
ليّه أكتر من سنه..
وانا داير كعب داير ع العمل..
مالتقيتش اللي يناسبني..
كل باب شفته اتقفل..
الأميرة :
بالمناسبه..
إيه بقي الشغله المناسبه لحضرتك؟!..
مجدي:
أي شغله تكون مريحه وجنب بيتي..
هيّه إيه؟..
دي مش حكايه..
اللي مطلوب في النهايه..
أنام في بيتي واخد مهيتي..
الأميرة : (عاتبة)
اللي جاي ياخد بإيدي..
تاه وضاع منه الهدف!!..
كنت فاكراك م الشباب..
جيت بوضع مختلف..
مجدي:
شئ ضروري آخد وآدي..
فرصه اقدم اللي عندي..
واطرد النوم والكسل..
كل ده وحياة عيونك..
بعد ما نقضّي العسل..
الأميرة: (ساخرة)..
والعلام اللي انت خدته..
كان في إيه؟!..
في العسل؟؟!..
مجدي: (بفخر)
آنا خريج الزراعه..
وبتفوق.. خدت جيد ..
الطبيعي ان اعلى بينهم..
فوق جبينهم وابقى سيد..
الأميرة:
الزراعه يعني تزرع..
تصلح الأرض الجديده..
المندوب :
تستفيد وتفيد بعلمك..
فرصتك بينا أكيده..
أبو حصيرة:
انت واحد م الشباب..
والشباب يعني الأمل..
المندوب :
اقتحم وابدأ وغامر..
الحياه دايما تجارب..
أبو حصيرة:
إصنع الفرصه لنفسك ..
ماتلاقيش حد ينافسك..
الأميرة :
إبتدي بمشروع صغير..
تبقى سيد.. حر نفسك..
مظلوم:
وانسى موضوع الوظيفه..
المندوب:
مش ضروري تكون يا شاطر..
للفتى مظلوم خليفه..
مجدي : (للأميرة)
حبتدي احقق طموحي..
واعمل المطلوب يا روحي..
بعد مشروع الجواز..
(يقدم للأميرة ملف أوراقه)
المهيب :
الجواز؟!..
إبتدا يعزف نشاز!..
العميد:
الجواز!!..
ليه بترمي الطوب علينا..
وانت بيتك من قزاز!. .
حمدان :
الجواز!!..
كنا مرتاحين يا ولدي..
ليه تعكر المجاز؟!..
السفير :
الولد ناوي ومصمم!..
مظلوم:
والله دا موضوع خطير!..
حنتظر ولحد إمتى..
رايح أعيش بجناح كسير..
حمدان:
وانا مش ممكن أتني..
في القفص زي الأسير..
يعني تبقي الأرض أرضي..
واشتغل فيها أجير..
الشحات :
أنا شحات يا جماعه..
طلعوني م المعارك..
بس بعد النصر برده..
في الغنيمه دي أشارك..
يعني ابارك واستبارك..
أبو حصيرة :
آنا في صدر المسيره..
بالأمور واعي وخبير.
واللي حيوقف طريقي..
أفحمه بقصيد مثير..
فلتكن ليّا الأميره..
وارثة عرش الجزيره..
ماتخافوش أنا حالغي اسمي..
مش راح ابقى أبو حصيره..
من النهارده أبو الفخار..
حابقى واحد م الكبار..
والمراكز تحت إيدي..
كل واحد منكو عندي..
وف مجاله مستشار..
(لرجال الإدارة)..
ده مستشار.. ودا مستشار
ودا مستشار..
كان ذكي..
أو كان مايعرفش المدمس م الخيار.
المهم ان المناصب للحبايب والقرايب..
واللي مش عاجبه كده..
يغادر الديار..
ماهي هوجه..
مش مهم تيجي عدله واللا عوجه..
حد كان سائل في حد..
اللي بتطوله تنوله..
والمسائل وضع يد..
وانا ثابت كالجدار..
المهيب:
آنا قبله..
أي صوت يعلى عليّه حسكته..
واللا يمكن أموته..
واشويه في نار..
مظلوم: (لنفسه)..
لازم اكسب م الغنيمه..
وابتدي آخد قرار..
حتي لو كان انتحار..
مجدي: (للجميع)
يا جماعه القطر فاتكو..
دي محطتكو الأخيره..
لو حلاوه الروح خدتكو..
برده أيامكو قصيره..
والحكايه مش هزار..
(يلتهب الموقف)
المهيب :
الولد زاد عن حدوده..
العميد:
إبتدا يسئ الأدب..
السفير:
ريحونا من وجوده..
مظلوم:
ينطرد في الحال..
أبو حصيرة :
.. وجب..
المهيب :
.. ينطرد..
العميد :
.. ينحبس..
المهيب:
.. ينقتل..
السفير:
لأ..
كفابه ينام في بيتهم خالي شغل..
نقتله بسلاح جديد..
ماضي.. مفعوله أكيد..
راح يصيبه بالشلل..
المهيب:
طب وساكت بس ليه؟!..
إفتح النيران عليه..
والسلاح ده اسمه إيه؟!..
السفير :
.. الملل!!..
(أثناء هذا النقاش ينفرد مجدي بالأميرة في جانب من المسرح، ويدور بينهما حوار غير مسموع ، وتبدو الابتسامه على وجهيهما، وكأن الاتفاق قد تم، يكتشف السادة الأمر فجأة، فينزعجون ويهرولون ناحية الأميرة وقد انفرط عقدهم تماما، وأصبحوا يتصايحون ويتشاجرون، وخلال اضطراب النظام يدخل المسرح بعض المواطنين لطلب يد الأميرة، دون أن تكون هناك فرصة للتعرف على هوياتهم، وتصبح الأميرة محاصرة بالطلب الملح)
مظلوم:
آنا أيوه..
الشحات:
هوّا لأ..
العميد:
… أصله إنسان من ورق..
المهيب:
آنا مكتوب قبل منّه..
العميد:
...مش حينفد لو نطق..
مواطن 1:
آنا خدام الأميره..
مواطن 2:
...خيري فارد ع الجزيره..
مواطن 3:
...وانا إنتاجي عظيم..
العميد:
آنا باعمل في تفاني..
مظلوم:
وانا دايما في السليم..
مواطن 1:
آنا أيوه..
مواطن 2:
… هوّا لأ..
مواطن 3:
..مستحيل راح نتفق..
مواطن 4:
محسوبين دولا علينا..
مواطن 5:
النظام ضاع من إدينا..
مواطن 6:
إحنا ضيعنا الأميره..
مواطن 7:
إحنا غرقنا السفينه..
الجميع:
إنقذينا يا أميره..
يا أميره إنقذينا..
وَصّلي المركب لمينا..
الأميرة: (ترفع يدها وتأتي بإشاره قاطعة، فيصمت الجميع، ويظل كل منهم على
وضعه كتمثال)
قلتوا كلامكم..
ضاع احترامكم..
خدوا كلامي..
وانا بخاطب الكل فيكم..
بدون أسامي..
خدوا الوصايا..
من غير عصايا..
كل الحكايه تعرف مقامي..
تسمع كلامي وتكون عصامي..
وانا لمّا اكلم شعبي المعلم..
أطير واسلم..
أفرد شراعي.. وافتح دراعي..
بقلب صاحي.. وعقل واعي..
وأستمع واطلب المزيد..
يا شعبي يا كل ما أريد..
في كلمه واحده ولن أزيد..
أقول خلافكم.. فاق إئتلافكم..
والكل شافكم.. ساعة المداولة ..
بين المعارك.. بين القضايا..
خسرتوا رايه.. وخدتوا جوله..
بانت حيرتكم.. ضيعتوا بيتكم..
حتى سيرتكم.. بقت من مناوله..
أنا بشاهد من الشواهد..
دا كل واحد كأنه دوله..
مين اللي ياخد..
مين اللي يلحق..
مين اللي يسبق ويبقى أولى..
حاله فريده..
ماهيش رشيده..
ولا مفيده لشرف المحاوله..
مانيش بلومكم.. ولا باتهمكم..
ولا حعوم يوم زي عومكم..
بديكو فكره.. حتبقى ذكره..
خسرتوا بكره وخسرتوا يومكم..
دي مش خصالنا..
ولا عملنا..
ولا طريقنا نبلغ أملنا!!..
دا طبع وافد.. بقلب جاحد..
وانا بناشد فيكو الرشيد..
خلونا نرميه بعيد.. بعيد..
ننحاز لطبعنا الحميد..
يا شعبي يا كل ما أريد..
في كلمه واحده ولن أزيد..
جواب سؤالنا..
هوّا عملنا..
ودراع عاملنا هوّا المفيد..
مانخافش أبدا من المشقه..
ودراعنا يبقى من الحديد..
العقل دايما يعيش في بكره..
والعين بتنظر إلي البعيد..
وعند لغو الكلام حننسى..
ونحفظ الرأي السديد..
يكمل بإيدنا.. تاريخ جدودنا..
اللي مواعدنا.. ياخد بإيدنا..
لدنيا عيدنا..
ويبدأ العصر السعيد..
أهو دا المقرر.. ودا المفيد..
الجميع :
لو سمحتي..
وصال سموك ..
عايزين نعرف..
مين فينا طاله؟؟!..
الأميرة:
كل واحد فيكو بيعزف..
أنا راح أغني على أنغامه..
ويشوف صورتي زي ما يوصف..
لجل استنى فتاة أحلامه..
واللي حيعزف نغمه نشاز..
أو يهبش و يكون نهاز ..
أنا راح اقصر ليه أيامه..
وأحطم له جميع أوهامه..
أما المتفاني وممتاز..
واللي يجيب أكبر إنجاز..
حيشوفني على طول قدامه..
وحكون ليه وحيه وإلهامه..
(تكرر)..
وحكون ليه وحيه وإلهامه..
(ستار)

إبراهيم هلال العساسي