رقيتك يا غاده** شعر/ سمير الأمير
إلى "غادة عبد الحافظ" مراسلة " المصرى اليوم" فى مدينة المنصورة
** شعر/ سمير الأمير
بيجرجروها خوف من كلامها
تنسى آلامها لما يكتب قلمها
عن ناس غلابه وفلاحين مطرودين
وناس رهاين فى الحبس مرميين
****
الله عليكى يابنتى
يا ضمير بيحرس مدينتى
ورحمة المغدورين ف السجن/ حبيتك
وخفت منى لحسدك بسملت ورقيتك
*******
رقيتك
من عين المرتشى
والمجرم اللى ما يختشى
من المخبرين و العساكر
وعبيد صدور الأوامر
م اللى ضهورهم مطايا
واللى عيونهم وراكى وورايا
***
رقيتك
ياشبه البلاد يا شكل الحنان
يا زينة الصبايا وزينة المكان
رقيتك عشان خايف اشوفك
بتصعب حياتك وتحكم ظروفك
فتمشى ف سكك البنات العاديه
ونخسر حضورك فى يوم القضيه
رقيتك
عشان تبقى دايما شهاده
على عصر دهس البشر بالبياده
رقيتك يا غاده..
رد مع اقتباس
المشاركة الأصلية كتبت بواسطة سمير الأمير
[/align][align=center]
الشعراء
المفضلات