طالع معاش
لو كانت الغمزة
الوصلة أوام
م الرمش الحالم
مرسال لغرام
تدخل في القلب
بدون استئذان
فتخللي الواحد
في لحظة
مدمن توهان
فيبان مبسوط
سعيد فرحان
يلف كلامه متذوَّق
بحبة تحابيش
وكأنه شارب
كاس خمرة لذيذة
و لاحشيش
****
يشد نفسه بقوة
فيخش المعني لجوة
يضخ ف عروقه مروة
ويخَّرج همُّه الكاتم
علي روحه
مع نفسه الخارج
م النخاشيش
****
ينشك عقله
و يهضم كم حكمة
علي كم طرفة
فيغسل روحه
من جوة بضحكة
رايقة و صافية
لو كان بدنه
ميت بصحيح
يصحي من تاني
ويعيش
****
لا عمري ركبت طيارة
مع إني بشوفها
فوقي يوماتي
لمَّا تعدي
منا ساكن
فوق ضهر عمارة
مع ناس علي قدي
ولا مرة
حجزت سيارة
من ضيق الإيد
ولا شفت
من جوه المجري
أبو غرف النوم
سياحةوفرش جديد
منا أصلي راكب
من بدري
ويَّا الصعاليك
قطر القشاش
ابو كرسي حديد
ولقمة ناشفة
وهدومنا الخيش
سترانا نعيش
****
من كتر الركنة
علي الكرسي
العضم اتنخْور
بقي زي الشاش
صبحت عجوز
ومكحكح
وشوفي طشاش
مرفود م الجيش
****
فاضل لي جمعة
وقطري الميري
يوصل لرصيفي
خالع ف دروسي
وف عيد ميلادي
طالع ف معاش
من شغل حكومي
واكل العيش

****
بمدغ في رغيفي
بالراحة علي كيفي
علي طقم اسناني
اللي شاريته
بسنين عمري
نقد وكاش
****
اسنانه مرصوصة
دهبي ولولي
شبه الألماظ
اللي عمل هولي
بمهارة الصنعة
فنان حساس
بيخَللِّي الضحكة
عالية مدوية
ساحرة ومغرية
تسحر نسوان
ملمومة حواليَّة
ومراتي الحلوة
بصه وأنزاله
وعينها عليه
صابرة يا ولداه
نفسها ف سنانه
بيتقول لحماتي
أصل أنا عوزاه
فتقول للغالية :
الصبر يا خايبة
جوزك الهفتان
هايقضي الباقي
من عمره الباقي
وحيد غلبان
يستني الموت
مطروح في فراش
فاضل له يومين
بكتيره لو عاش
نورث في التركة
الطقم الساحر
والسبحة البركة
ومعاش للورثة
دا ميراث ببلاش
****
الرجل الخايب
امله كداب
بقرأ في تراجم
منشورة ف كتاب
عن سر لخلطة
تعدل له مزاجه
يمكن تعويذة
ترده شباب
وحياة غلاوتك
وسحر جمالك
جوزك يابنتي
رجل بكَّاش
****
لابد ومبحلَّق
علي شاشة النت
يمكن تطلع له
مرة أو بنت
سنيورة هيمانة
لبسة و عريانة
طب بصي عليه
باين في عنيه
الشايفة طشاش
أهو حب و طب
شوفي حال البيه
تمثال ومخشب
وباينه مهنج
علي صوره ست
استرها يا رب
صاب جوزك الخايب
فيروس غشاش
****
طنشت حماتي
وقلت لمراتي
قدري و مكتوب
وأنا نفسي اتعلم
قبل ما موت
من غيرم اتعذب
أقرا المكتوب
****
رسمالي الحاجب
هلال مقلوب
حوالين العين
دقيق ومحدد
عين ورموش
رغم إنه مرتب
وده مش مرغوب
والكحل ومولع
قلب المحبوب
أنا لمَّا قريته
شفته مرعوش
****
نوره الساطع
مزغلل عيني
زاهي ومولعْ
وكأنه مفيش
لا انا شايف
حرفه المتلمع
ببياض ورنيش
ولا قادر أحدد
للمحبوب
ملامح وش
بمحاسن
أو حتي عيوب
ولا عارف
حتي أرسم له
صورة ف خيالي
ولا شايف حتي
من اصله
مين اللي قبالي
منا شايفه مافيش
شفتوا اللي جرالي
غرقان لشوشتي
في الأوهام
و لا حد جنبي يقرالي
بختي اللي ف كفي
وأديله بقشيش