ماليش دعوه
انا مالى
ماليش دعوه
انا فى حالى
انا قاعد على القهوه
مادام الشيشه جايالى
ومارس الطاوله يحلالى
وادينى باربى فى عيالى
واضبط فى دماغى العالى
مافيش حاجه تانى على بالى
غير الاكل والشهوه
بيحكم مين
وانا مالى
فين القوانين
ماليش دعوه
مادام البن ماغليشى
وسعر الفحم ماعليشى
وفى الشيشه نار ماتطفيشى
صداع الراس ماحبوشى
ورأى فى شئ ماعنديشى
وفكر فى مخى ده مافيشى
ومبدأى هو تطنيشى
وبلا مناهده
حياخدو القدس
وانا مالى
مادام فيه عدس
ماليش دعوه
تقول دستور
حقول كستور
ياعم انا عايز اعيش مستور
ولااحتاجش اشوف دكتور
ولو كان رمشى ده مكسور
وتفكيرى كمان محصور
فى حق اللقمه والهدمه
تقوللى عراق
وانا مالى
حدودى بولاق
وماليش دعوه
هعيش فى سكوت
صابر مكبوت
عامل مبسوط
ولو مضغوط
ماشى مظبوط
خايف من الحوت
لحد لما يجى الموت
على سهوه
دكتور
عادل عيد
المفضلات