لمين أشتكيك؟ شعر / سمير الأمير
لمين اشتكيك؟
وانت المدى منك اليك
حتى عتابك مل أعتابك
واحنا اللى ياما عصرنا عِنابك
وف الشده عِناك وعِنا بك
وزرعنا فيك عمرنا.. توتك ولبلابك
دى الوقتى ليه فرحان بالصوت الغبى
وبحضور الأجنبى ف غيابك؟
تفتى على العشاق بغيه بك
وتدق قلب العيال الخضر بكعابك
علشان تروق الدنيا لكلابك!!
آه يا وطن بين الضلال والعُهر
يا منتسب للكفر ناسى أنسابك
و أنا اللى كانت روحى أنسا بك
وف ذل ليل القهر انا كنت أنسى بك
رهنتنى للعسكرى المجنون نابنى اللى نابنى
و نابك..
تفتح أيديك للطعون صهيون
وف قلبى أنا نابك!!
ولو صرخت ف يوم
تقولى مين دخّلك؟
مين اللى أنابك؟
طب قولى مين يا وطن
فى عشق طمى النيل؟
بيدوق مرار الويل
وان حط بيه الزمن
علاك و عان لك .. منابك؟
...
رد مع اقتباس
المشاركة الأصلية كتبت بواسطة سمير الأمير
[/align][align=center]
الشعراء
المفضلات