معنويات عالية

[Jihad Al-Jayyousi]

بسم الله الرحمن الرحيم

الأخوة والأخوات،

وصلني إيميل طريف ذو مغزى ومصدره غزة الصمود، وأحببتً أن أشرككم فيه.

جهاد الجيوسي

بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...
اترككم معه..!!
ويقول:

واجا اليوم العشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي أصير غني..


ونشوفكم على خير..

[محمد مرتضى حسن]

يا رب إن السيل قد بلغ الزُبى -------- و الأمر في كاف لديك و نون

باسم الفراخ الزغب هيض جناحهم -------- فقدوا الأب الحاني بغير منون

بدموع أم روعوها في ابنها -------- و بكل دمع في العيون سخين

بدعاء شيخ شردوا أبناءه -------- ما بين معتقل و بين سجين

بسهاد زوج غاب عنها زوجها -------- فدعت لفرط جوىً و فرط حنين

رباه رد علي مؤنس وحشتي -------- و أغث بعودته جياع بنيني

يا من أجبت دعاء نوح "فانتصر" -------- و حملته في فلكك المشحون

يا من أحال النار حول خليله -------- روحاً و ريحانا بقولك: كوني

يا من أمرت الحوت يلفظ يونساً -------- و سترته بشجيرة اليقطين

يا رب إنا مثله في كربةً -------- فارحم عباداً كلهم ذو النون

[عائشة صالح]

الأخ الفاضل جهاد الجيوسي
بوركت على هذا النقل
لقد ابكاني هذا الوصف خاصة أنني عشت في غزة وأعرف ما يعانونه وأعاني معهم واشعر بآلامهم وهمومهم ومعاناتهم التي لا تنتهي.
صحيح أنني لم أحضر الحرب الأخيرة ولكنني شاهدت طائرات الأباتشي وهي تقصف من قبل بعام .
شاهدت الناس عندما يشاهدون طائرة الأباتشي الجميع تحلق عيونهم للسماء ويراقبون أين سيقع الصاروخ الأن.
كيف يحددون أين سيسقط الهدف بالضبط من طريقة وقوف الأباتشي واتجاهها وعلى بعد كم متر!
ما هي نوع الطائرة التي تحوم في السماء وكل طائرة لها اسم عندهم
والزنانة التي كانت لا تهدأ ولا يكتم صوتها إلا عند التغيير لبضع دقائق.
في زيارتي الأخيرة لغزة لم أعرف النوم كنت أحتاج لحبوب منوم ولم أجدها لأنني لم أتعود بعد على صوتها الذي يؤذي الأذن ولا أدري كيف أهل غزة ما زالوا يسمعون بآذانهم ولم يصابوا بالطرش!؟

كنت نائمة في بيت أختي وكانت الشابيك بلا ستائر وطائرة الأباتشي تكشف كل شي وتقصف أمامي
لم استطع النوم وأنا أراقب أين ستقصف ،وأقول لابنة أختي كيف تنامين ألا تخافي أنظري أن الطائرة أمامنا وممكن لها أن تغير اتجاه القصف.
فكان ردها خالتي نامي ارتاحي هي ستقصف في تلك الناحية ألا ترين اتجاه الأباتشي؟!!!!!
لا قوة إلا بالله
كننت أضع رأسي على المخدة ولا أعرف أغمض عيني فما أراه لا يمكن أن يوصف ولا يمكن أن يتحمله بشر.
لكن أهل غزة أعانهم الله عندهم قوة وعزيمة وصبر تساوي قوة العالم أجمع.
أعانهم الله وصبرهم ونصرهم ولعن الله الطغاة وكل من والاهم وكل من يؤيدهم وكل من يتحالف معهم وكل من يضع يده بيدهم.
اللهم أنت المنتقم وأنت القادر القهار وأنت الجبار أهزم أعداء الأمة الحاقدين الغادرين
اللهم انصر المقاومة والمقاومين واهزم أعداء الدين
اللهم آمين