عيد الحب

عملوا للحب عيد
ودوره وصباحيَّة
وخلُّوا أم العيال
تضحك وتلعب بيَّ
سهرانه تعد النجوم
وتغالط ف عددها
وأنا م التعب مهموم
ماعدش لي لزمة
مهدود وغالبني النوم
ولجل راحة بالي
أوافقها علي الحسبة
وأقول لها يا وليَّه
نامي بقي وارتاحي
قلبي م الهوي طاب
ما تجدديش ف جراحي
وخللي قلبك القاسي
يعطف ويحن عليَّا
*****
أسمع بلضمه وزوم
اعمل أنا مهزوم
تقول لي بحنيَّه
بكره عيد الحب
وثبتت الرؤية
حتي " فلن تاين "
شاف الهلال اليوم
هو انت دايماً ناسيني
طب فين الملاغية
بتحبني بصحيح؟
أحلف واتمسكن ليها
: والله قد عنيَّه
طب إيه اللي يثبت لي
خلصت قرورة عطري
هات لي بدالها إزازه
أو عقد ع الفرازة
أو أي حاجة هدية