تْغَرْسَاتْ جْدُورْ الظّْلاَمْ
َوْحدُه الْمَهْبولْ مَا نَامْ
يِتْنَزّْهْ فىْ غَابْةْ لَبْكَامْ
يِجْني مْنْ كْرومْ لاِيّامْ
ثْمَارْ تَتْكَلّمْ بْلَحْكامْ
مَايْتُه مَعْبُورَة رْوَامْ
بَانِيهَا عْلىَ السّلاَمْ
وَاضْعْ سَاسْهَا عْلىَ اقْدَامْ
اقْدامْ الْحَقّْ بَايْنَة.

حَامْلْ قْلْبُه الْمَعْصُورْ
شَمْعَة تَبْكِي لْلْمَقْهُورْ
الّدْمْعَة كْلْمَة تَتْفُورْ
وُالْمَعْنَى تْخَطّطْ سْطُورْ
تْكْتَبْ بْفْتِيلْ النّورْ
يِظْهَرْ الْحَقّ مَنْشُورْ
اعْلاَمْ فْى السّمَا وُطْيُورْ
تْنْفَضْ غْبارْ الزّورْ
مَجْمَرْ يْفُوحْ بْبْخورْ
اِيْنَسّمْ بْطِيبْ السّرورْ
يُوْقَفْ الْحَقّ كْالسّورْ
ذَاتُه تَتْجَلّى بَايْنَة

الْكَلْمَة يْلَ حْبَاتْ فْالصّغُرْ
مَاصَابْتْ طْرِيقْ لْلنّشَرْ
تْشَعْشَعْ وُتْزِيدْ تَكْبْرْ
تَتْعِيشْ وُيْطولْ لَعْمَرْ
تُنْقَشْ لَحْروفْ فْالصّخَــرْ
تْغَرْبَلْ امْوَاجْ لَبْحَرْ
تَبْنِي مْنْ رْمَالْها قْصَرْ
لاَ رِيحْ يْهَدْمُه لاَ مْطَرْ
عَالِي بْاعْلامْ النّصَرْ
وْنَجْمَةْ الْحَقّ بَاْينَة

الْمَهْبُولْ نْسَجْ كْلامْ
وُكْلامُه جَا فْالّرْوَامْ
فَرْقَعْ رَمَّانْ بْلَعْظَامْ
حَبَّة لْكُلّْ مْقَامْ
حْمِيمْ مْنّهَا وُمْدَامْ
سْرّحْ سْوَاقِي مْنْ غْيَامْ
سَالْ مَاهَا، فْىغَابْة ْلَبْكَامْ
عْلَى رْيوسْ الّلسُونْ وْلَقـْلاَمْ
مَزْروع ْفىْدْمَاغْ لَكْرامْ
حَالُه مْنْسي كْالأيْتَامْ
مُوْشومْ فْى جْبِينْ الّلئَامْ
وَشْمَةْ الْعَارْ بَايْنَة

هَذِه خَرْقَة مْنْ صُوفْ
مَنْسُوجَة عْلَى لَحْرُوفْ
حَدّقْ فِيهَا وْشوًفْ
فَاحْتْ مْنْ طِيبْ الجّوفْ
طِيبْهَا يْقُودْ الْمَكْفوفْ
ذْ الْقَلْبْ لاَعْمَى بْالْخوُف
فِيهَا مْيَازْنْ وُصْروفْ
اعْبَارْهَا بْالْمَعْروفْ
كُلّشِي وَاضْحْ مَكْشوْف
صُورْةْ الْحَقّ بَايْنَة