ذَابْتْ الْكَلْمَة فْىالذّاتْ
لَغْميزْ عُوّضْ اَلكْلاَمْ
الحَرْفْ اغْراقْ فْى السّهاتْ
لاِشَارَة هْزّاتْ لَعْلاَمْ
الّْلسَانْ سْمَانْ بْالسّْكَاتْ
مْنْ شَحْمُه صْنَعْنَا يْدَامْ
ظُلْمَة عْلَى الّنوْر طْغَاتْ
بْلَى شَرْجْ لْجَمْنَا لْجَامْ
عْلّة فْىالْقَلْبْ سُكْنَاتْ
مَا يْدَاوِيوْهاَشْ لَبْكَامْ
يَاسْيَادْنَا يَا لرُّواتْ
هْزّو بِنَا لَعْلاَمْ
/////////
غَنِّيوْفيْ طِيبْةْ الزّْهُو
سْلِيوْ الْقَلْبْ السَّاهْدْ
رْشّو لْلْمَصْروعْ وَجْهُه
بْ سْبولْ الّليلْ الشّارْدْ
أصْعَقْ مْنْ طْشاشْ نَبّْهُه
اسْقِيوُهْ عْصرْ عْنَاقْدْ
يِغْرَفْ مْنْ كَاسْ السّْهُو
يَسْقي الْقَلْبْ الْوَاقْد
لَهْوَى يْعَمّرْ مْنَزْهُه
يَفْرَشْ فْارْكَانُه مْعاْبدْ
/////////
- ذْ – الثُّوبْ وَاشْ يْوَاِتينا..؟
أخْشِينْ مَا لِيهْ الْوانْ
- كِيفاشْ يْمْكْن ْيَرْضِينا..؟
نْزَوّقوهْ بْريشْةْ الْعَمْيَانْ
لْبَسْتُه تَحْلَى فْى عيِنِينا
تْطِيبْ الْقَعْدَة وْ تَزْيانْ
مْنْ الدّا دْوَا يْداِوينَا
قَالوها لْنا الْعَدْيانْ
الفَلْسْ عْزيزْ عْلينا
مَعْبودْنا وْحاكْمْ الزّمانْ
مْنْ غِيرُه شْكونْ يَبْغِينَا ..؟
لاَ أصْحابْ لاَ أحْبَابْ لاَ جِيرَانْ
////////
عْلَّة فْالْقَلْبْ تْنَخّْصْنِي
إيْلَ شْفْتْ ذَاتْ رْزينَة
خَلِّيوْني مْغَمّضْ عِينِي
شوفَة فْىالْحَقِيقَة غْبِينَة
طِيبَةْ الزّهُو تْنَسِّينِي
نَغْمَةْ صَابا حْزِينَة
مْنْ يُومِي جَرْح ْفىْ جْبينِي
فْىاْلقَلبْ مْنْ الْقوتْ سَكِّينَة
صِيفْةْ النَّعامَة تْنَعَّـمْني
ْونَغْطَسْ فْى رَمْلَة سْخِينَة
نَفْرَشْ رِيشْهَا يْدَفِّينِي
مْنْ جْرِيحْةْ لاِيَّامْ الصّْنِينَة
///////
آشْ نُه ذَنْبْ الْمَهْبولْ
إِذَا اخْفىَ ضَرُّه مْنْ النّاسْ
رَتّقْ مْخَارْجْ الْقولْ
صَكّ ْعْليها لاَضْراسْ
بْلاَ طْبِيلَة بْلاَ طْبولْ
حْضَرْتُه تْحْرّْكْ الرَّاسْ
ايْلَ نْطَقْ بْكلامْ مَغْزولْ
لَخْيوطُه أَلْفْ رَاسْ
يْنْسَجْ فْى دْرَازْ لَمْثولْ
مْرَامُّه مَا عْلِيهَا عْسَّاسْ
خْرَاقْ يْلَبْسوها لَفْحُولْ
صُوفِيَّة تْــدَفِّي لاَنْفاسْ