رمضان كريم
رمضان كريم
رمضان يا أحلى شهر في الدنيا
بيهل نورك يجمع الأحباب
وفانوس ينور قلب أطفالنا
وأغاني بيها تنتشي الألباب
ومسحراتي ماشي بيطبل
ع الطبله دقه ودقه فوق الباب
بيقول أغاني كلها أذكار
ويَّا المواعظ اللي فيها عتاب
كانت زمان الناس بتسمع له
أما النهارده اتقفـِّلت لبواب
وكأنه ماسك قربه مخرومه
عمال بينفخ والنفس مِنساب
الدِش خللىَ الناس ما هيش فايقه
بقت المسائل فيها ( أوفر لاب )
ألفين قناه مزحومه بالمغنى
والرقص لهلِب والهوى غلاب
ومسلسلات فيها الخمور عادي
وسؤالنا ليه , لكنْ ما تلقى جواب
وكليب واحده شِبْه عريانه
بتقول أغاني تِلهبْ الأعصاب
والتمثيليه فيها رب البيت
وعياله تشعُرْ إنهم أغراب
وحاجات كأن البيت بقي ملهىَ
وشكيرا قالعه لابسه بس الكاب
ومادونا ترقص واللا تتحنجل
أشياء كتير راح تنتهي بخراب
الطبله دايره والعقول غايبه
وكأنها ناويه على الإضراب
جوه الملاهي يقضوا سهرتهم
حتى النواصي اتلغمِت أصحاب
أو ناس كئيبه هايمه ف الشارع
وكأنهم حبة قطط وكلاب
دا النور منور جوه في الجامع
والله بيغفِر للي جاله وتاب
الشهر كله التوبه مفتوحه
والخدمه مجانـًا بدون أتعاب
المولى طلب الشهر نفضىَ له
نهجر معاصي واحنا لسه شباب
قبل السنين ما تمر وتعدِّي
بذنوب كتيره تنكِتِبْ ف كتاب
وتفوت ونندم ع اللي فات منا
ونلاقي صحيفتنا اتملت بهباب
وذنوبنا تسبق جوه في حُفره
فيها ملايكة بيبتدوا بعذاب
رمضان دا فرصه تِنمِحي ذنوبنا
ويا بخت مِن صامه بصدق وتاب
الآيه واضحه تمام ومحفوظه
بكلام إلاهي جوه أغلى كتاب
فالحقْ يا صاحبي وبُص للآخره
واحجِز في جنه قصر ما ينساب
أوعىَ تبُص لواحده وبشهوه
واوعىَ النميمه واوعىَ يوم تِغتاب
واوعىَ تِجالِس شِله ف القهوه
ناسيين يصلـُّوا أصلهم خيَّاب
واوعىَ تروح فوق مكتبك تِنعِس
وتسيب مصالِح ناس بدون أسباب
والحِجه دايمًا ( أصل انا صايم)
رغم انه مطلب ينقضي بخطاب
واوعى تِخانِق والسبب صايم
وتقول لجارك لفظ كله سُباب
رمضان بريئ من كل أفعالك
لاكِن ده أصله طبعك الغلاب
فيه إيه يا صاحبي لو تكون هادي
وتسِد ع الشيطان جميع لبواب
فيه إيه يا صاحبي لو تشوف جارك
محتاج للقمه .. مش ضروري كباب
أو حتى هدْمه تِنفع اولاده
أو كام قميص أو بنطلون وشراب
رمضان كريم كرمه ما لوش آخِر
صنعِة عظيم واجد كريم وهاب
الكل زايل إلا أعمالنا
ما حيبقىَ منا إلا حِفنْ تراب
ربك رحيم عادل بأحكامه
حتى ولو أخد الكتير أو جاب
رمضان كريم وحقيد كمان شمعه
علشان نِلم الأهل والأصحاب
رمضان كريم ف عيوني كام دمعه
خايف أكون زي اللي تاه أو خاب
ترك الساعات عدت كدا بسرعه
من قبل ما يكون هوه نفسه تاب
رمضان كريم والدعوه مقبوله
فيه السما مفتوحة الأبواب
رد مع اقتباس
المفضلات