ليه ننسىَ

إزاى رحَنسلـِّم ................. ونمِد له الكفـِّين

من غير ما نِتألـِّم ......... لاخواننا في فلسطين

دا اللي صحيح مُسلِم .... حيكون ساعتها حزين

وحيبقى يوم أغبَر .......... فيه انكوَىَ الإسلام

ــــــــــــــــــــــ


ليه نِنسَى ناس ماتِت .... كانوا في دير ياسين

دبَحوا بشر كانت ......... في قريه ف فلسطين

جرَحوا قلوب عانِت .. مش عارفه تِشكي لمين

يا ريتنا بنقدَّر ........... معنىَ ان ناس تِنضام

ـــــــــــــــــــ

فاكر أريحا وغزه ؟ ..... فاكر جنوب لبنان ؟

دخلوا عليها بهزه ............... وكأنهُم طوفان

حتى الغريب اتأذ َّىَ .......... والكل كان زعلان

وجنود بتتمخطر ............... ماده السـلاح قـُدَّام

ـــــــــــــــــــ

صابرا وشاتيلا ....... كان ع الكفاف عايشين

راح تسعُميت عيله .... كانوا ف خيام نايمين

ما نجاش وبالتيله ............ إلا ولاد شاردين

مات زرع كان أخضر ... مع طفل كان بينام

ــــــــــــــــــــ

خلـُّوها مرشوشه ........... جُثث كتير خالِص

في اللد وابو شوشه .... وكمان ف خان يونس

وماكنش تهويشه .............. الغاره في تونس

واللي يغيظ أكتر ............... الباشا عمُّه سام

ــــــــــــــــــــ

ننسىَ شباب مصري ... في سبعه وي ستين

ساب القِتال بدري ........... ورفع إيديه لِتنين

خللوه يقوم يجري .... بالضرب في الرجلين

آخرتها يتجرجر ............... والدبابات قـُدَّام

ــــــــــــــــــــ

دا اللي يشوف مُنكر ....... مفروض يغيَّر فيه

مش ننخِدع أكتر .............. ليه السذاجه ليه

ليه العدو يظهر ........... والدم مالي إيديه

ونصدقه بمظهــر ........ إنه يعيش في سلام

ــــــــــــــــــ

ليه نِنسَىَ ماضينا ........ ليه نِنسَى أتراحنا

واللي افترَى فينا ....... ننصُب لـُه أفراحنا

دا اللي جري لينا ........ ما زال مجرَّحنا

ليه العيال تِكبر ......... تِتربَّى جوه خيام

ــــــــــــــــــ

بس العيال ديَّا .......... هتعيش معاها تار

عاقده على النيَّه .... تِقضي على الأشرار

ويزلزلوا الدنيا .......... وهيرجعوا للدار

واهي كل يوم تِكتر ...... وتعِد في الأيام

ـــــــــــــــــــ

إحنا يا ناس نِقـْدر .. .. نحمي الحياه والدين

ليه احنا نتبعتـَّر .......... ومعانا حَبل متين

لو نعتِصِم أكتر .... حنكون شداد جامدين

ليه بس نِتأخر ....... عاوزين نكون قـُدَّام

ــــــــــــــــــ

بالعِلم نِتقدِّم ................ مِتمسِّكين بالدين

نِعرف ونتعلـِِّم ..... منكونش ناس جاهلين

ياللا نقوم نِخدِم ........ علشان نِعلـِّي الدين

ونربِّي جيل أشطر ... م اللي بنىَ الأهرام

***********