رحيل رمضان
ــــــــــــــــــــــــ
رمضان يا شهر الصوم // رمضان يا شهر الخير
جيت تكـْفل المحروم// وتكفـِّي كل فقير
تِحبسْ شيطان محموم // أصل الشيطان شِرِّير
عايز يضـِّل الناس// بغوايَه وبتأثير
لطريق طويل ملغوم // مِتغطـِّي فوقه حرير
فيه الضلال أصناف // م السِرقه للتزوير
حطيته جوه القفص // وكأنه لص خطير
واديتنا جدول حِصص// في الحق والتنوير
خليتنا في مُدِّتك // ع الدين بقينا نغير
ونصلي في قِبلِتك // بخشوع وفيه تكبير
جامِع بناس يتمِلي // مع إن حوشـُه كبير
والمِسكْ يملا الهوا// ريحةْ إيمان وعبير
نِسمع كلام ربنا // يجعل قلوبنا تطير
يملا نفوسنا رضا // بالآيه والتفسير
وكلام بيسْبحْ بنا // بطلاوه في التعبير
والسبحه في كفـِّنا // يجري معاها الخير
بعد الصلاه والذكا // نِرْجع بدون تقصير
نسعىَ ننول الرضا // مِن رب عاطي كبير
--------
رمضان ياشهر الكرم // الكل فيك مستور
الكل فيك مُلتزمْ // والكل بيك مسرور
فجأه نويت ع السفر // علشان حياه بتدُور
لو كان بإيدي أنا // مارضاش عليك تغيير
تفضل وطول السنه // رمضان طويل وكبير
أصل ِ شهور السنه // زى الطيور بتطير
فيه شهر تتمنى له // ييجي بدون تأخير
وشهر ف مغادرته // ترمي وراه كام زير
----------
رمضان وعدَّى بنا // كان الفؤاد مسرور
كام يوم وفاضلين لنا // وهينجلي المستور
الناس تعود تعتِدي // والظلم تاني يجور
ويضـِّل واحد خـَشـَعْ // والتاني يسرق دور
واللي ينول رشوته // من غير حياء وشعور
واللي تزوغ نظرته // على واحده ناكشه شعور
واللي يحدِّف جيران // وقزازه مش مكسور
واللي تواضـَع قوي // يرجع يصير مغرور
واللي عِقـِّل واهتدىَ // يبقىَ بمزاج موتور
واللي يطيح ف البشر // علشان خطير مأجور
واللي معاه عِدِّته // يهري البنات تصوير
واللي يبيع زمِته // ويخالِف التسعير
واللي يكون مِقـْتِدِرْ // وعامللي فيها وزير
يعمِل قرار فيه قلق // ويخللي يومنا مَرير
-----------
ويلِف بينا الزمن // نفس الأمور هتدُور
رمضان يا شهر وجـِري // علشان قدَر مقدُور
خليك وكون للأبدْ // على طول وتبقى شهور
خللي الغني يهتِدي وغيره يعيش مجبور
بالخير وطول السنه // تِحمِي فقير مقهور
تملا الموائد نِعَمْ // مفهاش طبق مكسور
والدُنيا تِفضل هـَنا // مليانه نور على نور
********
المفضلات