الحمد لله الذي لا يحمد على مكروه سواه , كلنا نعلم أن الحياة ألم يخفيه أمل , وأمل يحققه عمل , وعمل ينهيه أجل , وقد انتهى أجل الشاعر الحبيب والأستاذ الكبير الذي كنت أعتبره أبي وهو الشاعر / الشربيني خطّاب , ثم التحقت به ابنته الفاضلة / هالة الشربيني خطّاب .., فزاد الهمّ والأسى في القلب .... فكتب في حالة من الحزن الشديد هذه القصيدة إهداء إلى روحيهما
الدنيا مهما تكون كبيره صغيره
فاهمين بنطلع واحنا آهو راجعين ورا
غاب الحبيب
من غير معاد
خلّى الحروف من يتمها متفجره
متقولنا يا شمسنا
من غير معاد
حبيت تفارق حضننا
كان إيه جرى ؟؟
صدقني لو قلت الحروف متلجمه
متكممه
والدمع سطر ع الورق
أحاسيس ف قلبي مدهوره
يمكن عرفتك
من بعيد .. مش من قَريب
لكن وربي احنا اللي متنا
ورحنا فاتت جلدنا
سكنت معاك المقبرة
بكتب ودمعي ع السطور مالي الورق
بكتب وإيدي بتترعش صوتي اتخنق
جوايا صهد وويل ونار
وف عزّ طوبه وشّي غطّاه العرق
أبكي عليك ؟؟
ولا على قلوبنا اللي ماتت
من لهيبها ع الفراق
أبكي عليك ؟؟
ولا على حرفي العليل
اللي اتكتم جوه ف عروق
قلبي اللي حاسُّه بيتحرق
دفنوك ف قلبي والأنين زار القلق
والألم ويا المرار عملوا اتفاق
يا حلم عمري اللي اتسرق
وانا كنت تلميذك خلاص
الصوت سراب
واليوم ضباب
والفرح غاب
حتى الشباب
هاجر وسابني
ف بحري خايف م الغرق
دفنوك ف قلبي وجمب منك حتّه منك
هيا هاله الغاليه بنتك
منت ابويا وهي أختي
وانت أستاذي اللي ببكي
من أنيني بعد موته
أصل موته
خلّى قلب القلب عندي يتفلق
نص اندفن بين التراب
والتاني حاضن ف الكفن
وأملنا بكره نجتمع
ويّا الرسول فِ جنان عدن
يارب طهّر روحه واقبلها
وصبّر قلبنا
يارب لطفك في المصاب
العقل شاتت مننا
يارب واجمعنا معاهم في النعيم
ويّا الحبيب المصطفى
واغسل ذنوبهم يا رحيم
القلب م الهمّ اكتفى
وعزايا فيهم رحمتك
وبرحمتك تخلفنا خير
بعد المصيبة اللي روت كل القلوب
كاس م الفراق متمرّره
واسكب عليهم من الحلل
أجمل تياب متعطّره
متبخّره
ببخور ملايكه بيضه
زاهيه منوّره
واجعل جناين قبرهم
دايما يا رب مخضّره
واجعلنا نؤمن بالقدر
دي الدنيا مهما تكون كبيره
صغيره
بمداد من ألم ومعين من حسرة
إرتجال ... أحمد سعيد موسى
المفضلات