العقيم واليتيم

ياللي انت ربك أعطىَ ليك سُلطه ومــــــال
وكتب عليك إنك مُحال حتجيب عيـــــــــال
مالك وجاهك مستحيل يبقـُم حــــــــــــــلال
وعيال كتير مش لاقيه تاكل في البــــــــــلد
إلحَق تصَدَق قبل ما المال يبقــــــــــىَ زال
ــــــــــــــــــــــــ
شوف الملاجئ رُوح وإكفـُل كام يتيـــــــم
خليك شموع ليهم تضيئ نور مُستديــــــم
يمكن يكون ربك أراد إنك عقيــــــــــــــم
علشان تكون رزق العيال وتحبُّهـُــــــــم
ويشِبُّوا على هدْىْ الصِراط المستقيــــــم
ـــــــــــــــــــــ
الواد يحِس بإنه ملفوف باهتِمــــــــــــام
والبنت تشعر بالسكينه والســـــــــــــلام
يبقى أملهم كله باصِص للأمــــــــــــام
بعد ما يلـْقوُا في حنانك أهلـُهـُــــــــــــم
ولا يشعروش أبدا ٍ برغبه في انتقـــام

***************