يـا شعب خـــــــــــــــــــــــــــــــايف
يا شعب خــــــــــــــايف
يا شعب خايف مِ اللي عمره ما يحرك إنمَلَة
يا شعب خايف، خوفك أساس البهدلة
من يوم ما جيت الدنيا شايف
شعب مطحون بس خايف
خيَّط العين والشفايف
وبقى وِدان
وبقت حياته دهولة في دهولة
ومرارُه بحر كبير
ماله نهاية وماله أوِّلَة
رزقه يادوب قطمير
وكرامته متهلهلة
يا شعب خايف مِ اللي عمره ما يحرك إنمَلَة
يا شعب خايف، خوفك أساس البهدلة
من ايه تخاف؟
على إيه تخاف؟
إنصح بقة
واكبر وشيل المَريَلة
إطلع وثور
زمجر وفور
فك القيود
هد السدود
لازم كرامتنا تعود
دي مش نهاية شعب يشهد له الزمن
إزاي يموت م الجُبن أو فيه يندَفَن
إزي يعيش الذل مكسور مُمْتَهَن
يسمع إهانته بودن من طين أو عجين
ويعيش على حاضر وماشي
ومعلشي يا زمن
يا شعب خايف مِ اللي عمره ما يحرك إنمَلَة
يا شعب خايف، خوفك أساس البهدلة
علِّم ولادَك يصرخوا لأة قوية
يبقوا دراع واحدة
والهِمَّة أبية
يتلموا عِيلة زي زمان
منهم غني وميسور
ومنهم الغلبان
كلهم من طينة واحدة طيبة
من أرض مصر
المصراوية
بطل تخيط بقهم
سيبهم يطالبوا بحقهم
لو شئ يصبهم يا جدع
ماهي هِيـَّـا هِيـَّـا
فيه أوحش ايه مِ اللي انت فيه
واللي انت فاكره أو ناسيه
ضاعت أمانة الخلق واتقلبت خيانة
والناس بقيت بتشم في نفوسها العفانة
وناس تبيع لحمها أو حتة من جسمها
ويفور دمِّها، لكن استِكانة
وانت بتشحت لقمتك مع إبرتك والخيط
علشان تِسكِّت كل كلمة وتمشي جنب الحيط
واللي تخافه ما يخاف الله
بيحب يسمع آه
للطاعة أو من وَجَع
ويعيش حياته حياة
يا شعب، آخر دلع
وانت بتخدم زي عبد حقير
يخدم ف سِيده، أو يلمَّع جزمِتُه
أخرس ذليل وضرير
واللي تخافه ضعيف
لكن كلامه مخيف
لو تنتفض يا شعبنا بصباح
قبل ارتفاع الظل تبقى شريف
إللي تخافه ما يحرك إنملة
شايخ نظامه ما يحَلحَل حَلحَلة
لو قلت لأَّة بصوت يزلزل زلزلة
يِرحلْ، تشوفو يِنكفي مِ الهَروَلة
بسِّ انتَ إرجع تاني
لمصر يا مصراوي
إرجع لأصلك دانتَ إبن النيل
إرجع وقول الحق دا حقنا
إرحل يا ظالم إنت مِش مننا
إنته بقايا من عجين مسموم
عجنو غريب من حقد أهل الروم
دسوه علينا ف أرضنا
خرَّب كِلانا وكـِبدنا
وانت بتحكم بالحديد والنار
في شعب صابر مارده جبار
فجّر يا شعب أصيل
بركانك الفوَّار
اصرخ بصوت يفزعه
للثورة والثوار
ترجع تنور شمسها
مصر مَبينِ الامصار
رد مع اقتباس
المفضلات