مش لا قيه مكان





متمدش إيدك ياجناينى

ولا تقطف فل ولا ريحان

ولا تسقى الحوض اللى انا فيه

من ميه بكدب الإنسان

متبصش ليه وتستغرب

طول عمرى بقلبى الحزنان

ورده فــ بستان

مش لاقيه مكان

سلبوها عبير الأزهار

سلبوها جمال الألوان

الليل بيعدى كأنه جبل

واقف على راسى ددبان

والموت غلباوى ومدارى

واقف فــ العتمه لأنه جبان

لولسه فاكرنى ياجناينى

إرحم حالى وابعد عنى

الحلم وضاع سرقوه منى

قتلوه وسابوه من غير أكفان

لولسه فاكرنى ياجناينى

لا تقولى أحبه ولا حبان

مش هما فـ يوم اللى قالولى

فارقينا وموتى أو انسينا

مالناش فيكى ولاعدلك فينا

وسقونى مرار الحرمان

أنا عمرى ماكنت بقلب حجر

أنا كنت غمامه وضل شجر

أفعال الناس جابت أخرى

غيرت شكلى وملامحى

وادى الإخوان وادى الصحبان

خلونى كرهت الأهل

خلونى كرهت البيت

واســتــنــيــت

لحـد ماجـيـت

بعـنـيـك بصيت

لـقـتـنـى بـقـيـت

ورده فــ بستان

مش لا قيه مكان

سلبوها عبير الأزهار

سلبوها جمال الألوان




شـــــعــــــــر

على عبدالحميد المسرت

ali_abdelhamed@hotmail.com