وطن مخطوف.......شعر/ سمير الأمير

[سمير الأمير]

وطن مخطوف

****
نسيت توهة النديم جواك عشان يلاقيك
نسيت طبلة فؤاد حداد
نسيت شعرى ونداياعليك
عشان ترجع وطن تانى وترجع ليك
نسيت كل اللى ماتوا ف سكتك وماضيك ...
وفاكر بس بشواتك و ظباطك !!
-ودول عايشين على فقرك وإحباطك
-ودول سايبين ليوم الدين.. ما ينظبتوش
حراميه وحلق حوش
وبيصلوا مايتوضوش
و خاطفينك وخانقينك وخاينينك
وبيعدوا بحور عينك مايتبلوش
**
تموت عيان، تموت محروق، تموت غرقان
وتتشرد وتتقطع وتتوزع على الاوطان
ومايبانشى ف ليالينا قمر يهديك
ولا ف لياليك

عشان إنت قتيل جهلك .. قتيل بإديك

**
وطن مخطوف على اليافطه
وطن متعبى ف الصندوق
وشُعرا بيدنوا ف مالطه
على القهوه فى باب اللوق!!