.
.
.

.

الْكَاغَطْ مَا هَزْ مْعَانِي
حَرْفُو يْدُوبْ بْخَفَّة
يَتْلَوَّى قَابْطَاهْ السَّخْفَة
الْمَشْمَاشْ فَالتَّفَاحْ
بْغَا يَتْشَفَّا
قْلَلْ عْلِيهْ الْعَفَّة
مَاجَابْ كْلَامْ مَوْزُونْ
مَا مَكْسِي بْحَالْ سْيَادُو
بَالجَّلْفَة
قَهْرُو الْبَرْدْ
مَا عْرَفْ يَتْدَفَا
حَرْفُوا قَابْطَاهْ الرَّجْفَة
مَا يْعْرَفْ كِيفْ إِيوْقَفْ
عَلْمُوهْ غيرْ إِيتَكْفَا
التَّفاحْ رِيحْتُو تْشْفِي
صَبَّارْ
الْمَشْمَاشْ سَبْعْ ايَّامْ
هَا هُوَّ طَارْ
الْقَرْطَاسْ لِيهْ مَّالِيهْ
يَتْسَنَّى لَحْرَاْر
لِيلْ وَ نْهَارْ
لَكْلَامْ طَاحْ عْلِيهْ الدَّلْ
وَلَّى يَتَّكْتَبْ
فَلْبَارْ
مَدْيُورْ لِيهْ لْجَامْ
أُو بْغا يْزيدْ لْقَدَّامْ
هْرَبْ مَنُّو لَحْلَا لْ
وَ مْعَنْقُو لَحْرَامْ
تَيَتْمَخْتَرْ فْجُوفُو لَمْرَارْ
مَا لْقَا مَا يْدِيرْ قَلَّب عَلَّغْيَارْ
فَرْقْ كْبِيرْ مَنْ الِّلي حَرْفُوا
بَارَدْ
أُومَنْ الِّلي يَكْوي نَارْ
..
.
.
.
.