بسم الله الرحمن الرحيم
نخط لكم سخرية جرح بعدسة الواقع
وأعتذر من كل كاتب وأديب يعيش فوق الغيم لو ما فهم من كلامي شيء
أو شعر بجفاف ورقة التوت من على رقعة الوطن العربي الكبير
لكي يفهم وجهة نظر الكاتب الذي يعيش على اتربة الشوارع وأزقتها في الحي الفقير
عليه ان يترك غيمته لحظة فقط ويفتح بصيرته .. معلش يتنازل شويّ عن سموه وجلالته وشهادة
الدكتوراه وينزل عنا .... لا نريد أن يعيش عنا على التراب حتى لا تتسخ نعاله ...
نريد أن يسمع كم كلمة وبعدها يرجع يلبس عباءة السمو والهيبة ويعلق شهادته على صدره
ويطير في السماء .. يرجع الى عرشه في الغيم ويمطرنا من هناك خيرات ...
معلش انتو حبابي .... ممكن نبدأ
في العالم العربي ما عنا لا رئيس ولا حاكم
عنا شيخ وبس
شيخ حمولة بلعب من وفوق وتحت وقدام شيخ الدولة
يعني بصريح العبارة كلها شيخة بشيخة
ان شا الله مفكرين الشيخ ممكن يستقيل من الشيخة بعد أربع سنوات
يا عالم الشيخة في دم اهله وما بيقدر يطلع من جلدو
عمالهم براقبوا ساحة الاحزاب
وكل ما شعروا ان حزب تفوق على حزب
حطو شيخ فيه
بتنتهي مرحلة شيخهم من الحزب كذا
بكونو محضرين ورقة شيخهم بالحزب التاني
ما سمعتوا المقولة (( البركة مليانة والمزراب بشكع ... والشيخة إلنا إلنا ولي يفقع يفقع))
يعني الشغلة غصب غصب
وغصب عنكم كمان
مدير المستشفى شيخ
والكناس اللي بالمستشفى وظفه شيخ
وإذا بدك شيء قبل ماتروح المستشفى
بتقدر ترفع تلفون للكناس
جرب واسمع مني وإذا ما زبطت ادعي عليّ
لكن قبلها لازم تكون عامل علاقات مع الكناس !!
لا تكونوا مفكرين بتكلم عن فلسطين
لا يا جماعة الخير
ولووووو .. انا بحكي عن كل العربان
عشيرة تنطح عشيرة
من عقال الخليج اليعربيّ لعباية المحيط الطيّـلسيّ
يعني لو بكرة صار طويل العمر حميدان شيخ في اي مكان حتى في أصغر حيّ
في بلاد العربان
وكان كاره للدكتاتورية والالتصاق بالكرسي
بعد اسبوع راح يعطوه الناس دروس ودروس حتى يصبح دكتاتور
كل واحد بيحب يشاهد جاره بيتبهدل !!
وكل واحد بيحب يكون عقاله اكبر من عقال جاره
وعلى الحاكم ان يرضي رعيته
بيبهدل الكل
عشان كل واحد منهم يشعر انه قدر يعمل حاجة في جاره وحقق انجاز
هيك بدهم
مش مهم عنا الانتماء لأنا على طول بنقلب معاه
سواء كان الشيخ بيعبد اللي بيعبد ربه
او كان بيعبد اللي بيعبد ماركس
او بيعبد اللي بيعبد عمو سام
ما بهمنا نوع العبادة
نحنا بهمنا قديش في رز!!
ومع مين فيهم بنقدر ننتقم من بعض أكثر!!
مين مأثر فيهم ؟!
ولمين المد اليوم؟!
إذا شيوخ شيوخنا شيوعين نحنا ربنا شيوعي
الله يرحم الادباء والشعراء قبل خمسين سنة ))
كلهم كانوا شيوعيين)) !!!!
إذا شيوخ شيوخنا علمانيين نحنا ربنا علماني
والله يرحم كتابنا وشعرائنا الذين فازوا بجائزة نوبل و الذين رشحوا على ريحتها))
من قبل عشرين عام لليوم وما طابوا))!!!!
وإذا شيوخ شيوخنا اسلاميين نحنا رب الاسلام
والله يبارك في شعرائنا وادبائنا اليوم ))
والله يبارك في كل شاعر وكاتب شيوعي وعلماني
طلع على لحيته اللي كان يكره شعرها شعر )) !!!
المهم عنا كيف نذل بعض بيد السلطة الحاكمةهدفنا ....
كيف دار فلان يرفعوا روسهم ؟ !
وكيف دار علان عم بتفاخرو بفلوسهم أو في محاميهم ودكتورهم ؟
لازم نوطي روسهم
لازم نقول عنهم ....
مش مهم شو نقول عنهم
المهم عيارنا يدوش روسهم
نعملهم الف قضية وقضية
المحامي نطلع عليه حاجة
الدكتور نلفقله حاجة
المناضل فيهم خاين
والتاجر عندهم حرامي
والشيخ فيهم بيشرب خمرة
وبيطقس على البنات
هيك نوطي روسهم
ليش ؟؟
هي بدها ليش
لأنهم قالوا عنا وبهدلونا قبل عشر سنين
فكرك احنا نسينا
خلي .... الرئيس ... مدير الشرطة ... مدير المخابرات
يشتغل فيهم وفينا
واحنا وياهم والزمن طويل
ليش يا عمي ؟ ليش يا سيدي ؟
بس لأنا عرب والواحد فينا ما بيبيت ابنه برة !!!
والعين بالعين
والسن بالسن
والبادي أظلم
عندهم شيخ حمساوي وشيخ فتحاوي
وعنا شيخ حمساوي وشيخ فتحاوي
همي عندهم خون وعندهم وطنية !!
ونحنا عنا خون وعنا وطنية !!
واحنا وياهم والزمن طويل
هكذا هي القبائل العربية
والعداوة عنا ورثة زي ما بنورث الارض !!!
هاي ثقافتنا
الولد عنا برضع هذا الكلام من بطن امه
وبيطلع مالي بطنه علينا !!!
المهم عم بنعيش حالة نفاق شديدة
وكل ما واحد مسك قلم
أول ما بيكتب عن الحرية , والشهامة
والكرامة
عمال الواحد فينا بيتسمح
بالدين
وبالوطن
وبالشرف
بس لهدف واحد ما فيه غيرو
عشان يدعس على جاروا
او العدويين في العائلات الاخرى
وهيك جاروا برضوا راح يلاقي ثغرة يدخل فيها
اسمها شرف
دين
وطن
عشان يدعس على جاروا اللي دعس عليه
وبتكون اصل الحكاية
طوشة على
مكان سطل القمامة باب البيت
ومشان حقوق سطل القمامة
عم بيكتبوا في بعض تقارير من عشرين عام
وعم بمنعوا المساعدات عن بعضهم ..
بالدسيسة والتقارير الكاذبة
والسلاح الفعال التعارف
بتصير شهرة لشيخ انو ماركسي في أقصى الارض
بتسابقو عليه
لو سبق الجار الاول
الجار الثاني بروح على شيخ اسلامي فقع صيتو
وبنقلبها معركة بين الاسلام والماركسية
في الأرياف
بط وحمام وديك رومي
منسف بلحمة بلدية
يعني مسابقة تعارف على الشيخ الجديد
يا ريت بس هيك وبس
إذا صار خلقة شرطي في قرية
و راق له شاب من عيلة فلان يخاصمه أبناء عيلة علان
ويطلعوا عليه ألف إشاعة
مثل إشتروه بالفلوس
يوم يوم بوكل عندهم
وعدوه يزوجوه بنتهم
والشرطي المسكين ما عندو ولا عند بالو
كل الكلام غمز وهمس ولمز
في المدن
عنا معرض في المكان الفلاني
وعنا مطعم
وعنا محل ملابس
المحل محلك
اشتري من عنا
بسعر ما بيحلم فيه حدا
بعدين لو خربت السيارة
ترى اخوي / ابن عمي / خالي
فاتح كراج بالشارع الفلاني
بس أرفع تلفون وأنا بطلب منه يعملها لعبة
(( اللي مش شيخ خسارة فيه التعارف ))
أكيد لأن التعارف لهدف
عشان الأعداء من العائلات الأخرى يشاهدوا مين مصاحب
ويحسبوا حساب أي عملة راح يعملوها ويعرفوا من ساعتها إنها طالعة على روسهم
يعني عشان ما يغلبوا حالهم
بعدين يحضروا حالهم كويس للمشاوير
وخدودهم للكفوف ....
يتبع
المفضلات