ما مرتاح
كاظم اسماعيل الكاطع
ما مرتاح .. ما مرتاح .. ما مرتاح
عيوني تستحي بس الدموع أوكاح
ما مرتاح
منك .. مني .. من الجاي من الراح
ما مرتاح
عركه ويه الزمن ورجعنه مكسورين
وبعيده المسافه وينسي اللي طاح
ما مرتاح
لان شفت الشمس نزلت تبوس الكاع
وبكف الطفل تنلاح
ولان قاضي البلابل مدد التوقيف
ومفتوحه السما
والفيل عنده جناح
ما مرتاح
لان قفل المحبه انباك
وترهّم عليه مفتاح
ما مرتاح
متروك بجزيره وتيهّت بالليل
واجوّا ربعي عليه بقافلة اشباح
وانته اشبيك
لمّن دافعت عن نفسي صابك غيض
مو حتى القنافذ من تحس بالخوف
تستخدم جلدها سلاح
ولاجّن الفجر مثل الفجر محبوب
لوأن الفجر صاير يقبض الارواح
ما مرتاح من ربعي ولا مرتاح
تمساح بنهرهم صاحوا من الخوف
وجازفت بحياتي من سمعت أصياح
صارعت المنيّه وبيده هزني الموت
ومّدمي اطلعت
صفكوا للتمساح
كل هذا وتريد ارتاح
نادووني اركضت ابليل
ايد الرسن بيها وايد بيها سلاح
عثرت مهرتي .. وربعي قبل ما طيح
واحد كال للثاني
ابشرك طاح
ابشرك طاح