الحال المايل

كتبتلكم وانا محتار
وقلت اوصف لكم حالي
وقلت احكي على أهلي
وعن عمي .. عن اخوالي
وانا باحكي ومسترسل
لقيت الكل مستغرب وبيقوللي
وانا مالي
ما دام المشكلة دي بعيد ......
ساعتها
جه على بالي
ابويا وامي واعيالي
بكل مرار شربت الكاس
وعم سلامة قاللي خلاص
كلتهم أمنا الغولة
جريت للغرب مش عارف
جريت للشرق مش عارف
ومش داري انا بحالي
لقيت الكل بيقوللي
بلاش تزعل
بلاش تزعل يا عم أمين
دي عادة أمنا الغولة في كل يومين
بتعمل نفسها إنسان
بتعمل نفسها ماشيه في حالها وبس
وتمشي في الطريق على طول
محدش حس
وحجتها تقولك إيه
عشان تعدل في حال الناس
وقالت أمنا الغولة سيبوني يا ناس
وسيبو كتابي والكراس
ومين غيري يكون ليكم كما الحراس
فقلنا نسكت النوبة
و نعلنها خلاص توبة
ما نتكلمش في سياسة
ولا حراسة
ولا نوبة و.......
ساعتها فهمت
وقلت خلاص بقا فوقو كفاية هوان
دي عادة أمنا الغولة في كل يومين
بتعمل نفسها إنسان
كما في القدس
في غزة
كما ف بغداد وف البصرة
بتعمل نفسها إنسان
فقير غلبان
وبيكمل عشاه بالنوم
وهم يا عيني مش داريين
ولا عيالهم كمان فاهمين
خلاص فوقو بقه م النوم
سمعتم أمنا الغولة تقول هتافات
جريتوا وراها وتردوا مع الهتافات
لحد ما أمكم ماتت وابوكم مات
كلتهم أمنا الغولة ومحدش حس
ناديت ليهم على غفلة وقلت يا ناس
في إيه مالكم
كفايه بقا .. وفوقوا خلاص من الغفلة
واوعوا تآمنوا للغولة على عيالكم
على حالكم
على دينكم وراس مالكم
وقولو خلاص .. نوينا نعلن التوبة
نوينا يا رب
وبعد ما تعلنو التوبة
يبان الحب
ويعدل حالكم المايل إله الكون
فقالوا ازاي
وكيف ما تكونش طول عمرك
ف حال مايل ولا مكسور
فدليتهم على القرآن
وع السنة الشريفة كمان
وبعد خلاص
ماكان حالهم بئيس وحزين
عدل حالهم إله الكون
وبان الحب ف عيونهم
ونور أرضنا نورهم
ورحت بنفسي هنيتهم
وقلت لهم ... متين مبروك
ما عادش خلاص
في حاجة عليها نتحايل
ما عادش خلاص
فيه حال مكسور ولا مايل
* * *