عليك نحوّس
كلامك مواسي كيف الزبدة
كي يطلع عليه النهار يذوب..
يوم تقولي انتي العمر و انتي الكبدة
و يوم نصيب اسمي من قلبك مشطوب
يوم تقلي راكي مدايرتلي الرعدة
و يوم تقيم علي الحروب
يوم تعملي قصر و جنة.. و زردة
و يوم تعذبني بلا ذنوب
تمنيت نكون دارك.. في الضيق و الشدة..
و الهنا و الرغدة
و نكون حياتك.. يا المحبوب
نحط راسي و راسك على فرد مخدة
و ما تسمع مني غير الكلام المعذوب
عندي لسان يهد اللي ما يتهدّى
و صوت.. و ضحكة.. يذوبو حتى قاسي القلوب
كي تصد..نحوس على سباب البعاد و الصدة
ما نلقى في نفسي ولا عيب من العيوب
نحبك تجيني و بقلبك لي مودة
ما نحب تكون في عشقنا مغصوب
كون تحب نفني روحي عليك..!! راني مستعدة..
يا اللي عقلي و قلبي بيك مسلوب
أنا صوتك.. إلا سمعتو ما نهدا
نتهول كيما اللي بالجن مركوب
لكن نقولك..
نجيبك.. يا لو كان ندير وعدة..!
و إذا كان عشقك ذنب.. عليه عمري ما نتوب