من كتابي الأول "رحبة... الزمن العتيق"، قُصيدة من وحي الماضي كتبتـها بالعاميّة لتفي بالغرض المطلوب ألا وهو تجسيد الصورة الحقيقية والبسيطة للماضي البعيد عربون شكر وامتنان لأجيالٍ رحلت وقناعة ولّت:

هلّلي يا صبايا
وتلوّي يا أوتار.
بعد البكي والنوى،
رجعو اللي فاتوا الدار.
وسيوفن بالعالي،
والنجوم بتلالي،
وعاراسن...
أكاليل الغار.
ادبكي يا مدقه بالجرن،
وفرقع يا صاج.
ويا مي،
اهدري من العين،
بالجرار.
الفرسان عطشانين،
وريقـهن،
نشّف من عبق الغبار.
اضربي يا طبول،
وغني يا مزمار،
وأيد الصبييّ...
تشبك بأيد الجار.
بالضيعة في عرس،
والعرّاسي كتار.

ويدور المعنّى،
ويركض المختار،
ويتبنى الوجاهة
بصدر الدار.
ويركض الملهوف
تايشوف شو اللي صار،
ويرجع...
بأيدو حلويني،
ويدور...
وينقل حكي وخبار.