رباعيات للثورة والثورة المضادة
شعر\ سمير الأمير
1
حكموك بداء الكره والتكفير
ضحكوا فى وش العدو و سابولك التكشير
باسم الإله العادل ظلموك بلا رحمة
ولخبطوك ف الزحمة وحرموا التفكير
***
2
هُما وقطر لايقين على الحالة
و إسرائيل أمهم ومرضعاهم زبالة
و متغاظين من مصر والحقد ماليهم
علشان ماهيش ليهم.. وفيها رجالة.
****
3
الجهل قال اللى غالب يكتب الدستور
بيكرعونا الحجارة وبيحلبولنا الطور
مادام بتمشى كده بالكدب والتجرمه
تسع سنين دى ( مر ه ؟) وتركب الحنطور!!
****
4
الشعر دار ع الشُعرا شاعر شاعر
لقى اللى فيهم أصيل واللى عويل داعر
سألته: طب ياشعر نسمع مين؟
فرد قال: الاتنين.. حتى الصلاه بتجوز للبر والفاجر!
.
****

5
كان احتفال النصر مولد مالوش اصحاب
فيه الجيران والقرايب وشلة الأحباب
حتى اللى قتلوا السادات اتصدروا الصورة
كان ماتش كورة .. بس الحكم كداب
*****
6
حتى اللى شكله قبيح قالوا عليه صِديق
يوسف كمان يا غجر ما فلتش م التلفيق؟
يا كدابين أغبيا إياك تمسوا الرسول
وخلاصة القول ياجهله.. مسيركم التعليق.
****
7
عيل صُّغير بدقن ولسانه سم حِناش
بيفتى ع اللى جه وع اللى لسه مجاش
طب تفهم ايه إنت يا فَسل ف الإسلام؟
قصر الكلام الدين بيشوهوه أوباش.
*****
8
إيه دَخّل الإسلام فى آل ثانى وآل سعود
ودول قبايل وبينهم تار ونار وحدود
عُملا لأمريكا ...مكرعاهم جاز
فهمت يا أستاذ والا الدماغ محدود؟
******
9
بيقول باصلى الفجر ..طب نعمل إيه إحنا؟
ربك عليه الحساب عالم بأرواحنا
مين اللى قال لجناب معاليك
إن الصلاة تديك الحق تدبحنا؟
10
آه يانى من شعبها ومن هبالاته
كأنه عيل بيلعب فى خيالاته
وبينخدع بمزاجه مش مغصوب
ومن العبط بيدوب فى حسن نياته
****
11
حسب قانون العرض زى الطول
الشعب والثوار غجر و فلول
أما اللى باعوا الثورة واتمسكنوا
بالكدب اتمكنوا ، وبقى الهبل معقول
*****
12
متلخبطة أمورك على بعض بلا تمييز
الحب فوق الكره والتفاح على الجميز
عضيت قفا الكل أصحاب على أعداء
عيان،، و أصل الداء,, إنك ما لكش عزيز
****
13
من قبل "يوليو" رباية استبداد
جزم فى رجل فاروق وقبل منه فؤاد
خانوا آمال الطلبة والعمال
من أجل راس المال وقفم مع الجلاد
****
14
أول تبرع كان من الكوبانيه
يعنى الحكاية لا دين ولا وطنية
منذ البداية متكرعين تمويل
وتفرق إيه إسرائيل عن السعودية؟
****

15
آه م الهباله وآه من تقل خيبتكو
مافيش مصيبه اكبر من مصيبتكو
سلمتم الثورة للى نيته نيله
ماتت قتيله بحسن نيتكو
*****
16
إزاى حمى الثورة وشرد الثوار؟
بالضبه والمفتاح سلمها للتجار
هوه اللى عاقل بيقول كلام مجنون؟
دول نشنوا ع العيون من غير خجل ولا عار.
*****
17
الشعر مش إلحق وحلق حوش
ماجلاكش على مهله ما تكتبهوش
ربك بنى الدنيا ف ست ايام
لو ما استواش الكلام ,, الناس ما تسمعهوش

****
18
اتحالف العسكر مع التجار
قفلوا بيبان الثورة ع الثوار
دبحوا الأمل ف الوطن جابوا عاليه فى واطيه
واتحكموا المعاتيه وعصابة الأشرار.
***


19
قالوا عليه ده حكيم يشبه تمام لقمان
كلام كما المأمأة طالع من الخرفان
مابيفرقوش الحق م الباطل
ومخ عاطل.. يسمع طنين النحل فى زنة الدبان!
****

20

ليه سيبتها يا ثورجى للجيش؟
سلمتها لابوجهل والدرويش
وهى كانت ثورة مدنيه
من أجل حريه وكرامه وعيش!
***

21
من غزوة الصندوق لغزوة الدستور
مقسومه مصر اتنين والمطحنه بتدور
ولا حد سامع عقل ولا حد سامع دين
وكأننا شعبين مضروب ما بينهم سور
****
22
الحُرمه عروها أمام الناس
مخاليق غريبه لا حس ولا إحساس
راكعين أمام العدو وع البنات شاطرين
وباسم أشرف دين اتنطعوا الأنجاس.

******
23

بتقول "نظام سابق" يا عم هاتلى دليل
لسه الوطن مسروق والشعب لسه عليل
ولسه سوق النهب مفتوح على الواسع
والفرق شاسع بين النهار والليل.

****

24
وجعنى قلبى قوى " مش على الشهداء"
ف الجنه هُما عند ربهم أحياء
وجعنى قلبى على أهالي المقتولين
لحظة خروج المجرمين أبرياء.