:كلمات علي لسان اب عربي لكل طفل تم الاعتداء عليه فضرب او تم تعذيبه او قتل علي يد قوات الاحتلال( رمز للسلبيه العربيه وما آل ايه حالنا اليوم)

سامحني يا ابني




سامحني يا ابني
سامعك بتصرخ
شايفك بتبكي
لكن سامحني
بقيت جبان

ايوه جبان

بشوف اخواتي
بتموت يوماتي
لكني ساكت
عشان جبان

وبشوف خسيس بيعتدي
علي امي واختي وبنات خالاتي
وكله ثابت في ذكرياتي
لكن مصهين
عشان جبان


اخاف ازعق.. واقول كفايه
اروح في توكر
ورا باب مسوجر
او يحبسوني في قوضة الفيران
وانت مجرب قوضة الفيران

وافضل ساعتها انوح واعيط
وام العيال عليه تصوت
ويناموا يومها من غير عشا
اصل ابني يابني..
علاطول جعان
وطالع زي ابوه جبان
يرضيك ابني.. ينام جعان؟


سامحني يابني
ماانا اصلي عربي
وكل عربي بقي زيه زيي
الكل ساكت
الكل شايف
الكل باع
الكل خايف
سيبناك لوحدك

تضيع
تتهان


لكن صدقني
وده وعد مني
انت مت يا ابني ,
هتفضل في قلبي
وف قلب ميت مليون عربي

قصدي...
ميت مليون جبان

سامحني يا ابني
ارجوك سامحني


شيماء النادي بتاريخ 21/10/2007