عارف أنا إنه قرار موتي!!
عارف أنا
إنه قرار موتي..
ولكن دا القرار نفذ..
ماشي
ما تتجاهلشي إحساسي وبالحرقة اللي أنا فيها بتلذذ
شايف
بياض شعري وأنا عمري ما زال عشرين
بيصرخ.. سامعه يا قلبي
خلاص إوعاك تقول راجع
ولا تقول لي دا كان صاحبي
مفيش صاحبي
مفيش!! سامع؟!
خلاص
اطوي دفاترك واحرق الماضي على سطورها
مرر عليها سنك الحامي
وخليها بسن السن تتوجع
ولحد ما تتوه الملامح جوه في سطرك
صب الدواية..
دواية الفرح اللي كان!
والحزن والحب اللي كان!
لونه بياض ياسمين، وأمسى من بياض شعرك
وانزع أحاسيس الطفولةاللي سقاها قلب ضلعك
ازرع بدلها ألف موجة من دموعك
واكسر قرار الذكريات
واعقل قرارك بالرحيل
انطق وقول
دا اللي يهون
مرة يهون يا صاحبي ميت مرة
زي الصقور تهوى السما،
وان فكرت في الأرض تنساها الطيور
ولا يوم هيتقال انها حرة
هو انت راضي أما ترقص زي ديك مدبوح
عجبي كأنك خدت أنك تنتشي ساعة خروج الروح
اصحى يا قلبي
دا الحب خبى ف ضحكته لحظات دموعنا
لو تسمعه ، ضايع
وترجع لينا روحنا لو رجعنا
مالك بتزرع حب من غير أي مانع
مين اللي يزرع نخلة في أرض الأعادي..
قول لي من دا الزارع؟
هو ابتسامك أو ودادك بين سباع جوعانة قول نافع
يا قلبي اسمعني ولو مرة
لما تعيش في الغابة بالفطرة
لازم تموت
- ....
اخرس.. سكوت
إوعاك تقول: تاني
قوم يا لله من فوق السرير
الملك يا صاحبي هنا محتاج أمير
وانت اشتغلت من البداية كالوصيفات المطيعة للأميرة
قدمت كاسك والطباق اللي شايلها
دورك خلاص انتهى
روح مطبخك بدري
قوم يالله يا صاحبي
أصل الأمير التاني جاي
قالوا انه جاي
البس هدومك يا بطل وامشي وراي
لسه الطريق أطول كليلة ذكريات
والصبر ممكن يرتحل عنا في منتصف الطريق
ازرع في صدرك ألف فدان ورويهم بأنهار الثبات
وان جعت كل منه ولما ينتهي لازم تصوم
قوم يالله قوم
نفذ يا قلبي حسرتي نفذ
دا القبر مستني
وقبل أميرتك الدنيا ما تتنرفذ
عارف يا قلبي
والله نفسي أرجع
لكن وربي
الموت أعز علي من أني أعيش تاني
راح تيجي يا قلبي
راح تيجي ويايه
راح تيجي وتنفذ
ولو العذاب لك لذ
شوف لك مكان تاني
غير الضلوع. وارتعش في حبها واتهز
رد مع اقتباس
[/align][align=center]
الشعراء
المشاركة الأصلية كتبت بواسطة الشاعرمحمدأسامةالبهائي
المفضلات