من غير مقدمات ولا ألعن اللي جي واللي فات ‏
أنا صحيح خلصت مدارس وبفك الخط وعلى الكي بورد بتنطط نط ‏
بس اللي يدعي العلم عبيط وفي حاجات عايز أعرفها لزوم التظبيط
مش عارف.. لحد امتى هيفضل الزبون على حق والمدير على حق ‏
وسائق الميكروباص على حق بدون أي وجه حق
مش عارف.. لحد امتى هفضل أعتذر عن حاجات ما عملتهاش ‏
وأفكر لناس ما يهمونيش وأضحك لزمايلي لزوم الترويش
مش عارف.. لحد امتى هيفضل الكبير كبير، ولحد امتى هيفضل التمكين ‏
والدور عليه امتى في دوامة الروتين
مش عارف.. ونفسي أعرف أنا صح ولا الناس التانيين، ليه الطريق دايما واقف ‏
مع إن ما فيش كمين، والناس دايماً ساكته على ناس تانيين
مش عارف .. لحد امتى كل حد بشوفه بيعمل اللي يشوفه
‏ من غير ما يراعي بقية البني أدمين
مش عارف