كيزان عسل ... زى العسل
كيزان عسل .. زى العسل
ــــــــــــــــــــــــــــــــــــــــــ
كيزان عسل .. كيزان عسل
البنت ماشيه تقول وتصرخ ع الملأ
كيزان عسل ...
الشمس حرقِت وشها
لسعِت إيديها وكِتفها
والصوت جميل من بُقها
كيزان عسل .. كيزان عسل
الشوك مشوِّك جسمها
ماهو أصله تين شوكي يشوك
أي واحد جنبها
واللي حصل ..
إن البُنيّه من التعب
حتى لعينيها الشوك وصل
أصل البنات ماشيه بتسعى لرزقها
حتى وإن كانت حتِفقِد حُسنها
لكنها , وعشان تساعِد أهلها
خرجت تجيب قوتها بعرقها وكدها
والشاب واقف ع النواصي بدون عمل
عمال يوزع ع البنات كلمات غزل
وان جيت تقوله إنت ليه زي الجمل
تقدر تزحزح ف الجبل
واقف هنا وبدون عمل
ممكن يقول لك هوه فين بس العمل
كل الوظايف في الحكومه بتنشغل
ليه يا بطل ؟
يائس وفاقد للأمل ؟
اطلع وكافح واقتحم سوق العمل
أو حتى شيل فاسك وكسَّر ع الجبل
وان جه قليل برضو رضا
يكفينا تكسير الملل
وكمان معاك لقمه حلال زي العسل
ليه يا شباب دانتو الأمل
خدتوا الشهاده في الخيابه وفي الفشل
عايشين عواله ع البلد
متمرمغين جوه الكسَل
قاعدين بتاكلوا ف قته محلوله ونايمين ف العسل
والأب واقف في طابور العيش
مصمم ع الجَلد
عايز يجيب العيش لإبنه
بس هيكون انجلد
محتار يأكِل مين ؟
ابنه الطويل زي الجمل
واللا الوليد اللي اتولد
أصل الطويل حاطِط إيديه في ميه بارده بدون خجل
يطلب مطالب من أبوه اللي بيشقى في العمل
لا يا بطل
انت النهارده تنسى كل اللي جرى واللي حصل
تِحمل سلاحَك للحياه
تحمل معاول للعمل
بطل كسل
شغل دراعك إللي مليان بالعَضل
والرزق حيجيلك أكيد من غير جدل
أبسط ما فيها انك تساوي بنت شابه رهيِّفه
خرجت تنادي بصوت جميل زي العسل
كيزان عسل .. كيزان عسل
مستني ليه إن الحكومه تشغلك
إسعى يا شيخ دا الخير كتير مالي البلد
واسمع كلام قاله المثل
قال لك دا من جدَ وجد
وامشي ورا خطوات رشيده لأي جد
فلـَّح أراضي للبلد
كان لما يمشي في الصحاري البذره شجره بتتولد
يرويها من عرَقه ويحضن غصنها
وكأنها زي الرضيع اللي اتولد
تكبر وتسعى لرزقها
من جوه باطِن أرضها
تبحث وتبعت جدرها
لبعيد قوي علشان توفر ميه تروي جزعها
وبجهدها
تقدر تدبَّر أكلها
تِنتج ثمار من كدها
تفرح وتدي لأهلها
ماهو أهلها همَّ اللي قاموا بزرعها
السعي واجب يا ولد
مفروض كمان من ربنا
إللي خلق واللي وجد
لكن وقوفك ع النواصي بدون عمل
وبدون خجل
وبتِدِّعي إنك خلاص ما بقيتش تؤمن بالأمل
طب لما ابوك حيموت حتِعمِل إيه ؟
وتاكل إيه , وتِلبس إيه ؟
ممكن يسيب لك كام ولد
لسه صغار , وهموم كتير ملهاش عدد
طب يجرى إيه لو إنت أصلا ً تلقى شـُغله تنعَمَل
وتحُط حصوة ملح ف عنيك اللي لازم تنقفل
وتروح تدوّر عن عمل
في أي مصنع أو تبيع حتى بصل
والبدء دايمًا يبقى صعب
بس الإيراد حيكون وصل
دا الألف ميل تبدأ بخطوه صغيَّره
إبدأها إنت علي العجل
علشان تعوض اللي فات وقت الكسل
توصل قوام
والمال ترصه كوام , كوام
تِفتح بيوت
تملاها قوت
وشباب كتير تمشي وراك على خطوتك
والناصيه تغرق في السكوت
وان جيت ف مره تزور مكان الناصيه
وتشوف العمود
تلاقيه أكيد ملهوش وجود
حيكون شعور راضي وسعيد
علشان لقيت
شفت بعينيك
إن النواصي بقت تموت
تِرجع وتِملا مكتبك
وتقوم تشغـَّل مصنعك
فيه ألف عامل .. بالريموت
وتبص م الشباك تلاقي بنت حلوه
ماشيه في الشارع تنادي بأعلى صوت
كيزان عسل .. زى العسل
****************
مُسْعَدالنحلة
رد مع اقتباس
المفضلات