ليـــــــه يا جبــــــــل
ليــــــــه يا جبــــــــل
زعلان وشايل م الفقير
زعلان قوى ليه مِننا
ماهو دول غلابه ومطحونين
حالهم ملخبط زينا
ممصوص تمللي دمُهم
ماهو دمهم من دمِّنا
الأغنيا فوق الجبل
عايشين بُعاد قوى عننا
واحنا يا ناس يا مطحونين
ملناش مكان إلا هِنا
ملناش مكان إلا الجحور
أو أي حاجه تِضِلِنا
أو تحت صخر يكون عجوز
يغفل ف يوم ويهدِّنا
شوف الغني بيبُص فوق
مبسوط وواكِل حقِنا
قاعِد ف قصر تقول فاروق
وكأنه معزول عننا
مع إنه مخلوق من تراب
معجون في ميه زيِّنا
يرمي خراب من غيرأسف
والغيظ يفور ويجـِنـِنا
والصرف برضه بيصرفه
نازل يغرَّق رجلنا
واللا زبالة حضرته
يرميها دايمًا جنبنا
وكأننا ملناش وجود
أو حضرته بيذلـِّنا
يا مقطم ارحم فقرنا
قطمت ليه في رزقِنا
كل الجبال بتجيب ف خير
وانت بتاخد مننا
تماثيل فراعنه ومن زمان
تحكي أصالة شعبنا
واقفه متينه وف الأمان
لو حتى فات مليون سنه
إشمعنى إنتَ اللي اتهريت
صخره هِنا وصخره هِنا
عاوزين وزير ويكون أمين
ويخاف كتير من ربنا
ينهض يعوضنا اللي فات
أكتر كتير من ميت سنه
عشنا خلالهم كام سنه
قوميه واحده تضـُمِنا
ثرنا وكانت ملحمه
رجـَّعنا فيها أرضِنا
وبنينا صرح الاقتصاد
باذلين عرقنا وجهدنا
طلعت علينا دياب بناب
تنهـِش وتاكل لحمنا
ومعاها مصاص الدِماء
يشرب كمان من دمنا
لا لقينا حد يقول حرام
ولا حد يرحم ضعفنا
كترت سكاكين الحيتان
والعِجل مستسلم هِنا
والسِرقه كِترت ف البلد
تنهب حصيلة عُمرنا
مسئول خزانه ينام يقوم
يفرض ضريبه ف دخلنا
لمَّا الفقير مبقاش معاه
مليم يوحِّد ربنا
بترول كمان واتباع لناس
حاربتنا ياما ف أرضنا
قاعدين بعين متربصين
يئذوا شرفنا وعرضنا
وعلمها م النيل للفرات
وكأنها مش مِلكِنا
واللا اللي خد مِنا الفلوس
وبنى مدينه مزيِّنه
حنقول فنون أحضان وبوس ؟
آهو شيء قـُرَيِّب لِلزنا
واللا اللي باع في ورثنا
من غير رضانا وخـُطرنا
شركات كتير متخصخصه
بأتمان قليله وهيِّنه
صبح الشباب بقي ع المعاش
وادوه مكافأه مطيِّنه
واللا اللي ساب سِعر الحديد
يعلا وسَلـِّم دقننا
واللي يهرَّب ف الأثار
وف إيده مفتاح كنزنا
واللي بينقل كل يوم
تِمثال هِنا يجيبه هِنا
واللي بيجروا سعرانين
من غير ما يرعوا ربنا
ياكلوا ف حق المطحونين
ياخدوا دقيق من دعمِنا
علشان جاتوه أو بيتيفور
يبيعوه لأغنى مِننا
والشاب يُخرج م العلام
يلقى ظروفه ملخفِنه
لا لاقي هِدمه تستره
ولا لاقي شـُغلـَه يتقـَنىَ
يضطر يسرح بالشوال
ويبيع سوداني وبالضنا
أو يشتغل قاطِع طريق
يخطف مصاغ من بنتِنا
أما اللي خاف من ربنا
صبره ينام مع صبرنا
ونقول يا رب يامُستعان
يسَّرْ وفرَّج كربنا
يا رب إبعِد عننا
قِلة حيلِتنا وضعفِنا
هُوّا قضاء واللا قدرْ
واللا الغلط من عندِنا ؟
لا دا حنا عارفين السبب
وبندِّعى على ربنا
علشان كده خللى الجبل
شاهِد عيَان على فِعلنا
شاهد على اللي بيفتري
ويحُط فارُه ف عِبِّنا
شاهد على قطر انقلب
م الرعب متنا ف جلدِنا
شاهد علي مركب غرق
الأم تبكي على الضنا
أصوات تثور وقلام تقول
ليه حمِّلوا بدون اعتِنا
تيجي البراءه من القضا
وكأنها متقننه
وعليها كله في التمام
ماهي دي طبيعة شعبنا
شاهد على أتوبيس وقع
فيه ناس كتير متعجِّنه
شاهد على كوبري رمى
من فوقه لوري تحتنا
شاهد على تاجر جشِع
باع الهوى اللي ف صَدْرنا
شاهد علي مسئول طلع
بقرار يزوِّد قهرنا
شاهد على حال البلد
اللي جرالها بجهلنا
آخر الكلام نسأل سؤال
إيه اللي هيصير بعدِنا ؟
********
رد مع اقتباس
المشاركة الأصلية كتبت بواسطة خميس
المفضلات