ماتش الجزاير
ماتش الجزاير ملتهب من قبل مـــا يبدأ بشهــــــر
إعلامنا شعلِل في الكلام ولـِّد ضغينه ف كل صدر
وكأننا داخلين ف حرب إما شهاده وإمـــــــا نصر
يا اخواننا دُول تسعين دقيقه وهاردلك مين ينهـَزم
دااحنا يا ناس إخوه وعرب والأم دايمًا هـِيا مصر
ـــــــــــــــــــ
لو فـُزنا إحنا أو الجزاير برضو يبقالنا الشـــرف
إن الفريق ومن العرب راح مونديــال وهينعَرَف
وولادنا من نسل العرب راح يختاروها وتحترف
وان كنا عاوزين ننتصِر برضو الجزاير زيِّنــــــا
إعلامنا ليه يعمل قلق ويصيب نفوسنا بالقــــــــــَرَف
ـــــــــــــــــــــــ
جمهورنا واعي عشان أصيل ويحِب إخوانـُه العـرب
تشجيعُه هيكون بالأصول ولا يفتِعِل أبدًا شـَغـَــــــــــب
لو حتى في الماتش اللي فات واحد هناك كان قام ضرَب
دول حبه قِله وسيئين أما الجميع نـــــــــاس طيبيـــــــن
أما انتوا إعلامنا الكرام لو فيه غلط فانتو الســــــــبب
***********
المفضلات