السلام عليكم .. كلام من قلبي
الشاعره الرائعه / حبيبة الرحمن
احترامي وتقديري
أشكرك علي هذا الرد الراقي
وبودي أن أهدي الي صفحتك هذه الكلمات المتواضعه :
ألف خساره يا أمّـه عليكي
......
ومّا سألتك
عن سر الخوف الساكن
جوّا حشاكي
ومسيطرعلي كل جوارحك
وشيطانه دايما مغرور
زارع تحت سماكي شرور
عامل نن عنيكْ خماره
بيحنـّط جوّاها عزيمتك
ويحدّد علي كيفه ملامحك
ألف خساره ياأمّـه عليكي
كنتي زمااااااااان ..!
جوّا عنيكي
بتخبّـينا م النسيان
كنتي يامّه أعلا مناره ..!
أمجادك في الدنيا مداين
وولادك زارعينها جناين
بطولاتك صفحات بتلالي
وتاريخك عناوين وحضاره
طيّب ليه جوّاك محتاره .؟
سايبه الخوف يتحكـّم فيكي
ومْقيّده جوّانا اديكي
إيه السر يا أمّه احكيلي .؟
لو بإشاره
هاتوضّح لي وتشفي غليلي
مع إني مـُتأكد إنك
بمزاجك أوغصبن عنك
شايفه الغوله بتحْكم فينا
في مصيرك دايما بتقرر
عامله زعيمه بتنهي وتؤمر
ساجنه فْ قلبي نبض يقاسي
وبْتـِكـْتم دايما أنفاسي
بس الأقصي اذانه يكبّـر
جوّا قلوبنا أهات تتكرر
وسايبه الغوله هناك بتدمّـر
فجأه لاقيتني
تاه إحساسي
لمّا لقيتك دايسه علينا
ليل ونهار المر ساقينا
حيّرتينا يا أمّه معاكي
أحوالك في الدنيا غريبه
وسْكوتك فيه حاجه مريبه
وبقيتي للغوله حبيبه
جوّا حدودنا بتلعب بينا
ومعاها بتمشي أمورك.؟
وضْـعفـْتي وبقيتي ذليله
خيبانه وقليلة الحيله
والله عجيبه ..!
فين المجد ياأمّـه قوليلي..؟
دانتي أصيله ..!
وجدودنا سايبين الأقصي
في حمايتك من أي ديابه
كنتي زمان بنيان وصلابه
دلوقتي صعبانه علينا
جمّدتينا خوف وكآبه
قيدتينا أسود في الغابه
والأقصي مسجون بأْديكي
ياما أهاته بتصرخ فيكي
وانتي الرعب مقصّر جهدك
وبعدّتي عن سنّه وفرض
وخويتي نقاض العهد
ربنا قادر يغفر ليكي
يصفح عنّـك
تفكّـي قيودك ..
وتعودي للحق مُريده
نفسي ياأمّه تفوقي بجد
قبل ماكـُلّـك يسكن لحد
تتمني لو كنتي شهيده
واللا خلاص بدّلتي الأرض.؟
ودفنتي جوّاها الذمّـه
والله دي عيبه
بعتي الأقصي ، وهان العـِرض .؟
وهاتفضلي عنوان للخيبه .؟
برضه يا أمّه الصبر عليكي
مش هايودع فينا المجد
في وقت الجد
هاتلاقي حواليكي اللمّه
اللي تحطم فيكي الغمّه
وتصحّي في قلوبنا الهمّـه
اللي تجدد فينا غلاوتك
والله ساعتها الغوله بتعرف
إنك ساكنه جوّا قلوبنا
مهما الدنيا لعبت بيكي
ومّا تفوقي وتحيي الوعد
وتروحي للقدس الأشرف
والأقصي هايعود لحضانتك
وتبقي يا أمّه صونتي كرامتك
ورب العرش أكيد هايصونك
........
أشكرك يا حبيبة الرحمن
وللجميع تحياتي
[glint]ضياء الدين البري[/glint]
( كلام من قلبي )
[glow1=FFCC99][glow1=FFCC99]كام حرف يبقوا كلمة
والكلمة تبني أو تهد
والوطن شمسه نعمة
فيه نهرب وجوَّاه نمد[/glow1][/glow1]
أشكركم وللجميع تحياتي
المفضلات