قالوا عندها زْهر* يْهرسْ لْحجرْ
قلت ليهم واشْ شْفتو يا ناسْ حالي؟
فين نْلاقى ازْهر لي نقَطّرْ
واشْجار كُلْها ناشفة تْلالي
ضْرْبات الريح اليابسْ ولْخضرْ
واشْ بْقا لمثالْكْم وامْثالي
لي بغا يا ناس غير ْوْكان يعْصْرْ
يْعصْر دْم لْعروق ودْوالي
راه الصّْبر تشكّى اليوم من الصّْبرْ
وقال ليه خليني يا سيدي فْحَالي
راني تكْويت يا خويا بالغْدْر
وفْ طريق الشوك حْفاوْ نْعالي
قالوا لْوالا *"كْثرة صْبر كتْضبْر"*
وصْبْري يانا خافْ مْن اهْوالي
واش عمْركم شْفتو الصْبر ولّى يْهْضْر*
منْ كْثرة الهَمْ صْبَحْ بوهالي*
الدار يا سْيادي مْضْلمة ضْلمة لْقبْر
ويمكن حال القبر احْسن من حالي
لو كنت لقيتْ يا السّامعين ما نْعصر
كنتْ عْصرت غير الدْمع دْيالي
حتّى دْموعي ولاتْ يا احْبابي حْجْرْ
وكانت كتنزل وتْسيل بلْهطالي*
دارْ الضْمانة* من زمان عطاتنا بالظهر
و خايدة فتْقرقيب النابْ واسْطالي*
وانا وانْتُمْ ولاخرين اكْثرْ
بغينا نعصرو عنْبة ادْوالي*
لْعْنبة نْشْفات واصْبح لونها صْفْر
وسْلالها ما بقاو يا حْبابي سْلالي
الناس عايشة اليوم عيشة البْقر
وبنادم من الجوع ولْعْرا يْلالي
البْقرة لقات فصة والرْبيع لخْضر
وبنادم كياكُل من فْتيل لْحْبالي*
دار الضمانة غاااااااايبة ما تحْضْر
واذا احضرت غير فلالّا ومالي*
بنادمْ يا حبابي اعْيا من كثرة اصْبر
واتْقلابْ على فْراتْتْ* لْوصالي*
وحتى لْوصالي ما بقات اليوم كتعمْرْ
ولا طواجن تْبان على وجه طْبالي
آجيو نغنيو جميع مع شيخ ْلحْضْرْ
وغنا معاه لي ما عندو والي:
"مالي يانا ومالي يانا ما عندي زهر "
.
*الزهر = الحظ
*كثرة اصبر كتضبر= كثرة الصبر تسبب الاذى
*بوهالي = مجذوب (العاقل الحكيم الذي من كثرة حكمته يظن الناس انه مجنون)
* الهطالي = هطالة
*كتهضرْ= تتكلم
فراتت = فتات
الوصالي= الوصلة هي اللوح التي يوضع فيها الخبز لارساله للفرن
*تقرقيب الناب واسطالي= مثل مغربي سائر يعني جعجعة بدون فائدة
*فتيل الحبالي= حكمة تعني الجلد بالحبال المفتولة (كناية عن لتعذيب في السجون)
طواجن= اطباق مغربية مستديرة من طين بغطاء مرتفع ومستدير
*دار اضمانة = تعني الحكومة
*للا ومالي= اللهو
المفضلات